– ਪੁਲਿਸ ਨੂੰ ਲਾਪਤਾ 72 ਸਾਲਾ ਅਜੀਤ ਕੌਰ ਦੀ ਲਾਸ਼ ਹੋਣ ਦਾ ਖਦਸ਼ਾ!
ਸੇਰੇਸ (ਕੈਲੀਫੋਰਨੀਆ), 28 ਅਕਤੂਬਰ (ਪੰਜਾਬ ਮੇਲ)- ਕੈਲੀਫੋਰਨੀਆ ਦੇ ਸੇਰੇਸ ਸ਼ਹਿਰ ਵਿਚ ਅਗਸਤ ਤੋਂ ਲਾਪਤਾ 72 ਸਾਲਾ ਅਜੀਤ ਕੌਰ ਦੇ ਮਾਮਲੇ ਵਿਚ ਦੁਖਦਾਈ ਮੋੜ ਆਇਆ ਹੈ। 24 ਅਕਤੂਬਰ ਨੂੰ ਟਰਲੱਕ ਇਰੀਗੇਸ਼ਨ ਡਿਸਟ੍ਰਿਕਟ ਦੀ ਨਹਿਰ ਵਿਚੋਂ ਇੱਕ ਲਾਸ਼ ਮਿਲੀ। ਪੁਲਿਸ ਦਾ ਕਹਿਣਾ ਹੈ ਕਿ ਲਾਸ਼ ਅਜੀਤ ਕੌਰ ਦੀ ਹੋ ਸਕਦੀ ਹੈ, ਪਰ ਇਸ ਦੀ ਪਛਾਣ ਦੀ ਅਧਿਕਾਰਤ ਪੁਸ਼ਟੀ ਹਾਲੇ ਬਾਕੀ ਹੈ। ਪੁਲਿਸ ਮੁਖੀ ਨੇ ਦੱਸਿਆ ਕਿ ਪੱਕੀ ਪਛਾਣ ਲਈ ਪੋਸਟਮਾਰਟਮ ਅਤੇ ਡੀ.ਐੱਨ.ਏ. ਜਾਂਚ ਕੀਤੀ ਜਾਵੇਗੀ। ਲਾਸ਼ ‘ਤੇ ਮਿਲੇ ਕੱਪੜੇ—ਗੁਲਾਬੀ ਜਾਂ ਆੜੂ ਰੰਗ ਦਾ ਭਾਰਤੀ ਸੂਟ ਅਤੇ ਗੂੜ੍ਹੀ ਗੁਲਾਬੀ ਚੁੰਨੀ— ਅਜੀਤ ਕੌਰ ਦੇ ਲਾਪਤਾ ਹੋਣ ਵੇਲੇ ਪਹਿਨੇ ਕੱਪੜਿਆਂ ਨਾਲ ਮਿਲਦੇ ਹਨ।
ਅਜੀਤ ਕੌਰ 22 ਅਗਸਤ ਦੀ ਰਾਤ ਆਪਣੇ ਅਪਾਰਟਮੈਂਟ ਤੋਂ ਬਾਹਰ ਗਈ ਸੀ ਅਤੇ ਮੁੜ ਘਰ ਨਹੀਂ ਪਰਤੀ। ਪੁਲਿਸ ਮੁਤਾਬਕ ਉਹ ਵਿਟਮੋਰ ਐਵੇਨਿਊ ਨੇੜੇ ਰਹਿੰਦੀ ਸੀ। ਪਰਿਵਾਰ ਨੇ ਉਸ ਦੇ ਲਾਪਤਾ ਹੋਣ ਦੀ ਸੂਚਨਾ ਮਿਲਣ ਤੋਂ ਬਾਅਦ ਭਾਲ ਸ਼ੁਰੂ ਕੀਤੀ ਅਤੇ ਪੁਲਿਸ ਨੇ ਵੀ ਨਹਿਰਾਂ ਤੇ ਆਲੇ-ਦੁਆਲੇ ਦੇ ਇਲਾਕਿਆਂ ਵਿਚ ਤਲਾਸ਼ੀ ਮੁਹਿੰਮ ਚਲਾਈ। ਪਰ ਕਈ ਹਫ਼ਤਿਆਂ ਤੱਕ ਉਸ ਦਾ ਕੋਈ ਸੁਰਾਗ ਨਹੀਂ ਮਿਲਿਆ। ਪਰਿਵਾਰ ਨੇ ਦੱਸਿਆ ਸੀ ਕਿ ਅਜੀਤ ਕੌਰ ਰੋਜ਼ਾਨਾ ਤੁਰਨ ਜਾਂ ਜਾਣ-ਪਛਾਣ ਵਾਲਿਆਂ ਨੂੰ ਮਿਲਣ ਜਾਂਦੀ ਸੀ ਅਤੇ ਉਸ ਦਾ ਇਸ ਤਰ੍ਹਾਂ ਲਾਪਤਾ ਹੋਣਾ ਅਸਾਧਾਰਨ ਸੀ। ਉਸ ਦੀ ਸਿਹਤ ਅਤੇ ਰੋਜ਼ਾਨਾ ਦਵਾਈਆਂ ਨੂੰ ਲੈ ਕੇ ਵੀ ਪਰਿਵਾਰ ਚਿੰਤਤ ਸੀ।
24 ਅਕਤੂਬਰ ਨੂੰ ਦੁਪਹਿਰ ਵੇਲੇ ਨਹਿਰ ਦੇ ਕਰਮਚਾਰੀਆਂ ਨੇ ਸੈਂਟਰਲ ਐਵੇਨਿਊ ਅਤੇ ਕੀਜ਼ ਰੋਡ ਨੇੜੇ ਲਾਸ਼ ਦੇਖ ਕੇ ਅਧਿਕਾਰੀਆਂ ਨੂੰ ਸੂਚਿਤ ਕੀਤਾ। ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਪੁਸ਼ਟੀ ਕੀਤੀ ਕਿ ਇਹ ਮਨੁੱਖੀ ਲਾਸ਼ ਹੈ। ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਹੁਣ ਤੱਕ ਕਿਸੇ ਅਪਰਾਧਿਕ ਕਾਰਵਾਈ ਦਾ ਸ਼ੱਕ ਨਹੀਂ ਸੀ। ਜਾਂਚ ਜਾਰੀ ਹੈ ਅਤੇ ਅਧਿਕਾਰਤ ਪਛਾਣ ਸਾਹਮਣੇ ਆਉਣ ਮਗਰੋਂ ਹੋਰ ਜਾਣਕਾਰੀ ਦਿੱਤੀ ਜਾਵੇਗੀ। ਪਰਿਵਾਰ ਅਤੇ ਸੇਰੇਸ ਵਸਨੀਕ ਅਜੀਤ ਕੌਰ ਦੀ ਸੁਰੱਖਿਅਤ ਵਾਪਸੀ ਦੀ ਆਸ ਕਰ ਰਹੇ ਸਨ; ਹੁਣ ਉਹ ਪਛਾਣ ਅਤੇ ਜਾਂਚ ਦੇ ਨਤੀਜਿਆਂ ਦੀ ਉਡੀਕ ਕਰ ਰਹੇ ਹਨ।