-ਅਡਾਨੀ ਗਰੁੱਪ ਨਾਲ ਮਿਲ ਕੇ ਬਣਾਏਗੀ ਡਾਟਾ ਸੈਂਟਰ
ਨਵੀਂ ਦਿੱਲੀ, 16 ਅਕਤੂਬਰ (ਪੰਜਾਬ ਮੇਲ)- ਤਕਨੀਕੀ ਖੇਤਰ ਦੀ ਵੱਡੀ ਕੰਪਨੀ ਗੂਗਲ ਨੇ ਕਿਹਾ ਕਿ ਉਹ ਭਾਰਤ ਦੇ ਆਂਧਰਾ ਪ੍ਰਦੇਸ਼ ਵਿਚ ਮਸਨੂਈ ਬੌਧਿਕਤਾ (ਏ. ਆਈ.) ਹੱਬ ਸਥਾਪਤ ਕਰਨ ਲਈ ਅਗਲੇ ਪੰਜ ਸਾਲਾਂ ਵਿਚ 15 ਅਰਬ ਡਾਲਰ ਨਿਵੇਸ਼ ਕਰੇਗੀ। ਇਸ ਵਿਚ ਅਡਾਨੀ ਗਰੁੱਪ ਨਾਲ ਭਾਈਵਾਲੀ ਤਹਿਤ ਇਕ ਗੀਗਾਬਾਈਟ ਦਾ ਡਾਟਾ ਸੈਂਟਰ ਵੀ ਬਣਾਇਆ ਜਾਵੇਗਾ। ਇਹ ਭਾਰਤ ਵਿਚ ਗੂਗਲ ਦੇ ਸਭ ਤੋਂ ਵੱਡੇ ਨਿਵੇਸ਼ਾਂ ਵਿਚੋਂ ਇਕ ਹੈ। ਇਸ ਪ੍ਰਾਜੈਕਟ ਨਾਲ ਆਂਧਰਾ ਪ੍ਰਦੇਸ਼ ਵਿਚ ਪੰਜ ਤੋਂ ਛੇ ਹਜ਼ਾਰ ਰੋਜ਼ਗਾਰ ਅਤੇ ਅਸਿੱਧੇ ਤੌਰ ‘ਤੇ ਕੁੱਲ 20-30 ਹਜ਼ਾਰ ਨੌਕਰੀਆਂ ਦੇ ਮੌਕੇ ਪੈਦਾ ਹੋਣ ਦੀ ਉਮੀਦ ਹੈ। ਵਿਸ਼ਾਖਾਪਟਨਮ ‘ਚ ਬਣਨ ਵਾਲਾ ਇਹ ਏ.ਆਈ. ਹੱਬ ਅਮਰੀਕਾ ਤੋਂ ਬਾਹਰ ਗੂਗਲ ਦਾ ਸਭ ਤੋਂ ਵੱਡਾ ਕੇਂਦਰ ਹੋਵੇਗਾ। ਇਸ ਵਿਚ ਸਵੱਛ ਊਰਜਾ ਨਾਲ ਚੱਲਣ ਵਾਲਾ ਡਾਟਾ ਸੈਂਟਰ ਅਤੇ ਫਾਈਬਰ ਆਪਟਿਕ ਨੈੱਟਵਰਕ ਸ਼ਾਮਲ ਹੋਵੇਗਾ। ਭਾਰਤੀ ਉਦਯੋਗਪਤੀ ਗੌਤਮ ਅਡਾਨੀ ਨੇ ਕਿਹਾ ਕਿ ਉਸ ਦੀ ਕੰਪਨੀ ਅਡਾਨੀਕੋਨੈਕਸ ਇਸ ਪ੍ਰਾਜੈਕਟ ਵਿਚ ਗੂਗਲ ਦੇ ਨਾਲ-ਨਾਲ ਭਾਰਤ ਦੀ ਦੂਸਰੀ ਸਭ ਤੋਂ ਵੱਡੀ ਮੋਬਾਈਲ ਅਪਰੇਟਰ ਭਾਰਤੀ ਏਅਰਟੈੱਲ ਨਾਲ ਭਾਈਵਾਲੀ ਕਰੇਗੀ। ਇਸ ਦੇ ਨਾਲ ਹੀ ਗੂਗਲ ਅਮਰੀਕਾ ਦੀਆਂ ਉਨ੍ਹਾਂ ਵੱਡੀਆਂ ਤਕਨੀਕੀ ਕੰਪਨੀਆਂ ‘ਚ ਸ਼ਾਮਲ ਹੋ ਗਈ ਹੈ, ਜੋ ਭਾਰਤ ਵਿਚ ਨਿਵੇਸ਼ ਵਧਾ ਰਹੀਆਂ ਹਨ।