ਲੰਡਨ, 18 ਜੂਨ (ਪੰਜਾਬ ਮੇਲ)- ਪੰਜਾਬ ਨੈਸ਼ਨਲ ਬੈਂਕ (ਪੀ.ਐੱਨ.ਬੀ.) ਧੋਖਾਧੜੀ ਮਾਮਲੇ ‘ਚ ਭਾਰਤ ‘ਚ ਲੋੜੀਂਦੇ ਕਾਰੋਬਾਰੀ ਮੇਹੁਲ ਚੋਕਸੀ ਨੇ ਲੰਡਨ ਦੀ ਹਾਈ ਕੋਰਟ ਵਿਚ ਭਾਰਤ ਸਰਕਾਰ ਅਤੇ ਪੰਜ ਵਿਅਕਤੀਆਂ ਖ਼ਿਲਾਫ਼ ਮੁਕੱਦਮਾ ਦਾਇਰ ਕਰਦਿਆਂ ‘ਅਗਵਾ’ ਅਤੇ ‘ਤਸ਼ੱਦਦ’ ਢਾਹੁਣ ਦਾ ਦੋਸ਼ ਲਾਇਆ ਹੈ। ਭਾਰਤੀ ਅਧਿਕਾਰੀਆਂ ਨੇ ਇਨ੍ਹਾਂ ਦੋਸ਼ਾਂ ਨੂੰ ਰੱਦ ਕਰਦਿਆਂ ‘ਵਿਸ਼ੇਸ਼ ਛੋਟ’ ਦੇ ਆਧਾਰ ‘ਤੇ ਬਰਤਾਨੀਆ ਦੇ ਅਧਿਕਾਰ ਖੇਤਰ ‘ਤੇ ਇਤਰਾਜ਼ ਜਤਾਇਆ ਹੈ। ਨਾਲ ਹੀ ਉਨ੍ਹਾਂ ਨੇ ਭਾਰਤੀ ਕਾਨੂੰਨ ਅਤੇ ਭਾਰਤੀ ਸੰਵਿਧਾਨ ਨਾਲ ਸਬੰਧਤ ਵਿਸ਼ੇਸ਼ ਸਬੂਤਾਂ ਨੂੰ ਧਿਆਨ ਵਿਚ ਰੱਖਣ ਦੀ ਵੀ ਇਜਾਜ਼ਤ ਮੰਗੀ ਹੈ। ਜਸਟਿਸ ਫਰੀਡਮੈਨ ਸਾਹਮਣੇ ਮਾਮਲੇ ਦੀ ਸ਼ੁਰੂਆਤੀ ਸੁਣਵਾਈ ਦੌਰਾਨ ਅਦਾਲਤ ਨੂੰ ਦੱਸਿਆ ਗਿਆ ਕਿ ਚੋਕਸੀ ਦਾ ਦਾਅਵਾ ਹੈ ਕਿ ਮਈ 2021 ਵਿਚ ਭਾਰਤ ਸਰਕਾਰ ਦੇ ਨਿਰਦੇਸ਼ਾਂ ‘ਤੇ ਅਗਵਾ ਦੀ ਕੋਸ਼ਿਸ਼ ਤਹਿਤ ਉਸ ‘ਤੇ ਤਸ਼ੱਦਦ ਕੀਤਾ ਗਿਆ ਸੀ। ਵਕੀਲ ਹਰੀਸ਼ ਸਾਲਵੇ ਨੇ ਭਾਰਤ ਵੱਲੋਂ ਦਲੀਲ ਦਿੱਤੀ ਕਿ ਚੋਕਸੀ ਦੇ ਇਨ੍ਹਾਂ ਦੋਸ਼ਾਂ ਦਾ ਮੰਤਵ ਹਵਾਲਗੀ ਤੋਂ ਬਚਣ ਦੇ ਯਤਨਾਂ ਤਹਿਤ ਦਬਾਅ ਬਣਾਉਣਾ ਹੈ। ਚੋਕਸੀ ਇਸ ਸਮੇਂ ਬੈਲਜੀਅਮ ਵਿਚ ਹਿਰਾਸਤ ਵਿਚ ਹੈ। ਉਹ ਭਾਰਤ ਨੂੰ ਆਪਣੀ ਹਵਾਲਗੀ ਖ਼ਿਲਾਫ਼ ਲੜਾਈ ਲੜ ਰਿਹਾ ਹੈ। ਚੋਕਸੀ ਦਾ ਭਾਣਜਾ ਨੀਰਵ ਮੋਦੀ ਵੀ ਭਾਰਤ ਵਿਚ ਲੋੜੀਂਦਾ ਹੈ। ਉਹ ਲੰਡਨ ਦੀ ਜੇਲ੍ਹ ‘ਚ ਬੰਦ ਹੈ।