ਸੈਕਰਾਮੈਂਟੋ, 27 ਮਈ (ਪੰਜਾਬ ਮੇਲ)- ਸੈਕਰਾਮੈਂਟੋ ਕਾਉਂਟੀ ਸ਼ੈਰਿਫ਼ ਦਾ ਦਫ਼ਤਰ ਨੇ ਦੱਸਿਆ ਹੈ ਕਿ ਔਰੇਂਜਵੇਲ ਦੇ ਇੱਕ ਘਰ ਵਿਚੋਂ ਕਈ ਖ਼ਤਰਨਾਕ ਵਿਸਫੋਟਕ ਸਮੱਗਰੀ ਬਰਾਮਦ ਕੀਤੀ ਗਈ ਹੈ।
ਅਧਿਕਾਰੀਆਂ ਮੁਤਾਬਕ 6700 ਬਲਾਕ ਬੀਚ ਐਵੇਨਿਊ ਵਿਚ ਇੱਕ ਵਿਅਕਤੀ ਨੇ ਆਪਣੇ ਘਰ ਵਿਚ ਸੰਭਾਵਿਤ ਵਿਸਫੋਟਕ ਹੋਣ ਦੀ ਸੂਚਨਾ ਦਿੱਤੀ। ਜਾਂਚ ਦੌਰਾਨ ਪਤਾ ਲੱਗਿਆ ਕਿ ਇਹ ਘਰ ਪਹਿਲਾਂ ਉਸਦੇ ਪਿਤਾ ਦਾ ਸੀ, ਜੋ ਅਮਰੀਕੀ ਫੌਜ ਵਿਚ ਡੈਮੋਲੀਸ਼ਨ ਇੰਸਟਰੱਕਟਰ ਰਹਿ ਚੁੱਕੇ ਸਨ।
ਸ਼ੈਰਿਫ਼ ਦਫ਼ਤਰ ਦੀ ਵਿਸਫੋਟਕ ਆਰਡੀਨੈਂਸ ਡਿਸਪੋਜ਼ਲ ਯੂਨਿਟ ਨੇ ਘਰ ਵਿਚੋਂ ਸੀ4 ਵਿਸਫੋਟਕ ਸਮੱਗਰੀ ਦੇ ਦੋ ਹਾਲਫ-ਬਲੋਕ, ਦੋ ਅੱਗ ਲਾਉਣ ਵਾਲੇ ਗ੍ਰਨੇਡ ਅਤੇ ਇੱਕ ਸਮੋਕ ਗ੍ਰਨੇਡ ਬਰਾਮਦ ਕੀਤੇ।
ਅਧਿਕਾਰੀਆਂ ਨੇ ਚੇਤਾਵਨੀ ਦਿੱਤੀ ਕਿ ਜੇ ਸੀ4 ਵਿਚ ਅਚਾਨਕ ਧਮਾਕਾ ਹੋ ਜਾਂਦਾ, ਤਾਂ 150 ਫੁੱਟ ਤੱਕ ਭਿਆਨਕ ਤਬਾਹੀ ਹੋ ਸਕਦੀ ਸੀ, ਜਦਕਿ ਧਮਾਕੇ ਦੇ ਟੁਕੜੇ ਅਤੇ ਮਲਬਾ 600 ਫੁੱਟ ਤੱਕ ਜਾ ਸਕਦਾ ਸੀ।
ਸ਼ੈਰਿਫ਼ ਦਫ਼ਤਰ ਨੇ ਕਿਹਾ ਕਿ ਸਾਰੇ ਵਿਸਫੋਟਕ ਸੁਰੱਖਿਅਤ ਤਰੀਕੇ ਨਾਲ ਇਕੱਠੇ ਕਰਕੇ ਨਸ਼ਟ ਕਰਨ ਲਈ ਭੇਜੇ ਗਏ ਹਨ।
ਅਧਿਕਾਰੀਆਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਨੂੰ ਕਿਸੇ ਥਾਂ ‘ਤੇ ਸ਼ੱਕੀ ਵਿਸਫੋਟਕ ਸਮੱਗਰੀ, ਫੌਜੀ ਹਥਿਆਰ ਜਾਂ ਕੋਈ ਖ਼ਤਰਨਾਕ ਡਿਵਾਈਸ ਮਿਲੇ, ਤਾਂ ਉਸਨੂੰ ਹੱਥ ਨਾ ਲਾਇਆ ਜਾਵੇ ਅਤੇ ਤੁਰੰਤ ਇਲਾਕਾ ਖਾਲੀ ਕਰਕੇ 911 ‘ਤੇ ਕਾਲ ਕੀਤੀ ਜਾਵੇ।