#AMERICA

ਯੂ.ਐੱਸ.ਸੀ.ਆਈ.ਐੱਸ. ਦੀ ਨਵੀਂ ਪ੍ਰੋਸੈਸਿੰਗ ਟਾਈਮ; ਕੁਝ ਕੇਸ ਤੇਜ਼, ਕਈ ਹੋਰ ਲੰਮੇ

ਵਾਸ਼ਿੰਗਟਨ, 21 ਨਵੰਬਰ (ਪੰਜਾਬ ਮੇਲ)- ਯੂ.ਐੱਸ.ਸੀ.ਆਈ.ਐੱਸ. ਨੇ 20 ਨਵੰਬਰ ਨੂੰ ਵੱਖ-ਵੱਖ ਇਮੀਗ੍ਰੇਸ਼ਨ ਅਰਜ਼ੀਆਂ ਦੀ ਨਵੀਂ ਪ੍ਰੋਸੈਸਿੰਗ ਟਾਈਮ ਜਾਰੀ ਕੀਤੀ ਹੈ। ਅੰਕੜਿਆਂ ਤੋਂ ਪਤਾ ਲੱਗਦਾ ਹੈ ਕਿ ਕੁਝ ਸ਼੍ਰੇਣੀਆਂ ਦੇ ਕੇਸ ਤੇਜ਼ ਹੋਏ ਹਨ, ਜਦਕਿ ਅਸਾਇਲਮ ਆਧਾਰਿਤ ਗ੍ਰੀਨ ਕਾਰਡ ਅਤੇ ਵਰਕ ਪਰਮਿਟ ਨਵਿਆਉਣ ਵਾਲੇ ਬਿਨੈਕਾਰਾਂ ਦੀ ਉਡੀਕ ਵਧੀ ਹੈ।
ਅਸਾਇਲਮ ਮਿਲਣ ਤੋਂ ਬਾਅਦ ਦਾਖ਼ਲ ਕੀਤੀ ਜਾਣ ਵਾਲੀ ਆਈ-485 ਗ੍ਰੀਨ ਕਾਰਡ ਅਰਜ਼ੀ ਦੇ 80 ਫ਼ੀਸਦੀ ਕੇਸਾਂ ਦਾ ਫ਼ੈਸਲਾ ਹੁਣ ਲਗਭਗ 36 ਮਹੀਨਿਆਂ ਵਿੱਚ ਹੋ ਰਿਹਾ ਹੈ। ਪਹਿਲਾਂ ਇਹ ਸਮਾਂ 34.5 ਮਹੀਨੇ ਸੀ। ਲਗਭਗ 93 ਫ਼ੀਸਦੀ ਕੇਸ 45.7 ਮਹੀਨਿਆਂ ਵਿੱਚ ਪੂਰੇ ਹੋ ਰਹੇ ਹਨ, ਜੋ ਪਹਿਲਾਂ 43.4 ਮਹੀਨੇ ਸਨ। ਸਾਲ 2025 ਦੇ ਪਹਿਲੇ ਹਿੱਸੇ ਵਿੱਚ 80 ਫ਼ੀਸਦੀ ਅਜਿਹੇ ਕੇਸ 15.5 ਮਹੀਨਿਆਂ ਵਿੱਚ ਪੂਰੇ ਹੋ ਰਹੇ ਸਨ, ਇਸ ਲਈ ਉਡੀਕ ਦੁੱਗਣੀ ਤੋਂ ਵੀ ਵੱਧ ਹੋ ਚੁੱਕੀ ਹੈ।
ਅਸਾਇਲਮ ਬਿਨੈਕਾਰਾਂ ਦੇ ਪਹਿਲੇ ਆਈ-765 ਵਰਕ ਪਰਮਿਟ ਵਿੱਚ ਚੰਗੀ ਖ਼ਬਰ ਹੈ। 80 ਫ਼ੀਸਦੀ ਪਹਿਲੀਆਂ ਅਰਜ਼ੀਆਂ ਲਗਭਗ ਸੱਤ ਦਿਨਾਂ ਅਤੇ 93 ਫ਼ੀਸਦੀ 27 ਦਿਨਾਂ ਵਿੱਚ ਪੂਰੀਆਂ ਹੋ ਰਹੀਆਂ ਹਨ। ਪਰ ਵਰਕ ਪਰਮਿਟ ਨਵਿਆਉਣ ਜਾਂ ਬਦਲਣ ਵਾਲੀਆਂ ਅਰਜ਼ੀਆਂ ਦੇ 80 ਫ਼ੀਸਦੀ ਕੇਸਾਂ ਨੂੰ 19 ਮਹੀਨੇ ਅਤੇ 93 ਫ਼ੀਸਦੀ ਨੂੰ 21.4 ਮਹੀਨੇ ਲੱਗ ਰਹੇ ਹਨ।
ਇਹ ਸਮਾਂ ਕਿਸੇ ਇਕ ਵਿਅਕਤੀ ਲਈ ਪੱਕੀ ਗਾਰੰਟੀ ਨਹੀਂ ਹੈ। ਉਡੀਕ ਫਾਰਮ ਦੀ ਸ਼੍ਰੇਣੀ, ਸਥਾਨਕ ਦਫ਼ਤਰ, ਇੰਟਰਵਿਊ, ਪਿਛੋਕੜ ਜਾਂਚ ਅਤੇ ਮੰਗੇ ਗਏ ਵਾਧੂ ਦਸਤਾਵੇਜ਼ਾਂ ਉੱਤੇ ਨਿਰਭਰ ਕਰਦੀ ਹੈ। ਯੂ.ਐੱਸ.ਸੀ.ਆਈ.ਐੱਸ. ਹੁਣ ਕਈ ਸਰਵਿਸ ਸੈਂਟਰਾਂ ਨੂੰ ਇਕੱਠੇ ”ਸਰਵਿਸ ਸਟੇਸ਼ਨ ਆਪ੍ਰੇਸ਼ਨਜ਼” ਵਜੋਂ ਵੀ ਦਿਖਾ ਰਿਹਾ ਹੈ। ਜੇ ਕੇਸ 93 ਫ਼ੀਸਦੀ ਵਾਲੀ ਮਿਆਦ ਤੋਂ ਲੰਮਾ ਹੋ ਜਾਵੇ ਤਾਂ ਬਿਨੈਕਾਰ ਯੂ.ਐੱਸ.ਸੀ.ਆਈ.ਐੱਸ. ਕੋਲ ਕੇਸ ਇਨਕੁਆਰੀ ਭੇਜ ਸਕਦਾ ਹੈ।