ਟੈਕਸਾਸ, 6 ਮਈ (ਪੰਜਾਬ ਮੇਲ)- ਅਮਰੀਕਾ ਦੇ ਟੈਕਸਾਸ ਸੂਬੇ ਵਿਚ 7 ਸਾਲਾ ਬੱਚੀ ਅਥੀਨਾ ਸਟ੍ਰੈਂਡ ਦੇ ਅਗਵਾ ਅਤੇ ਕਤਲ ਮਾਮਲੇ ਵਿਚ ਸਾਬਕਾ ਫੈਡਐਕਸ ਡਰਾਈਵਰ ਟੈਨਰ ਹੋਰਨਰ ਨੂੰ ਅਦਾਲਤ ਨੇ ਮੌਤ ਦੀ ਸਜ਼ਾ ਸੁਣਾਈ ਹੈ। ਇਹ ਦਰਦਨਾਕ ਘਟਨਾ ਸਾਲ 2022 ਵਿਚ ਉਸ ਵੇਲੇ ਵਾਪਰੀ ਸੀ, ਜਦੋਂ ਹੋਰਨਰ ਅਥੀਨਾ ਦੇ ਘਰ ਕ੍ਰਿਸਮਸ ਦਾ ਤੋਹਫ਼ਾ ਪਹੁੰਚਾਉਣ ਗਿਆ ਸੀ।
34 ਸਾਲਾ ਟੈਨਰ ਹੋਰਨਰ ਨੇ ਪਿਛਲੇ ਮਹੀਨੇ ਅਦਾਲਤ ਵਿਚ ਕਤਲ ਦਾ ਦੋਸ਼ ਕਬੂਲ ਕਰ ਲਿਆ ਸੀ। ਇਸ ਤੋਂ ਬਾਅਦ ਫੋਰਟ ਵਰਥ ਦੀ ਅਦਾਲਤ ਵਿਚ ਚੱਲੀ ਸੁਣਵਾਈ ਦੌਰਾਨ ਜੂਰੀ ਨੇ ਉਸ ਨੂੰ ਮੌਤ ਦੀ ਸਜ਼ਾ ਦੇਣ ਦਾ ਫੈਸਲਾ ਕੀਤਾ।
ਮਾਮਲੇ ਦੀ ਸੁਣਵਾਈ ਦੌਰਾਨ ਜੂਰੀ ਨੂੰ ਉਹ ਆਡੀਓ ਅਤੇ ਵੀਡੀਓ ਰਿਕਾਰਡਿੰਗ ਵੀ ਸੁਣਾਈ ਅਤੇ ਦਿਖਾਈ ਗਈ, ਜੋ ਹੋਰਨਰ ਦੀ ਡਿਲਿਵਰੀ ਵੈਨ ਦੇ ਅੰਦਰੋਂ ਮਿਲੀ ਸੀ। ਰਿਕਾਰਡਿੰਗ ਵਿਚ ਦਿਖਾਇਆ ਗਿਆ ਕਿ ਉਹ ਅਥੀਨਾ ਨੂੰ ਵੈਨ ਵਿਚ ਚੜ੍ਹਾ ਕੇ ਲੈ ਜਾਂਦਾ ਹੈ ਅਤੇ ਉਸ ਨੂੰ ਧਮਕਾਉਂਦਾ ਹੈ ਕਿ ਜੇ ਉਹ ਚੀਕੀ, ਤਾਂ ਉਹ ਉਸ ਨੂੰ ਨੁਕਸਾਨ ਪਹੁੰਚਾਏਗਾ।
ਆਡੀਓ ਵਿਚ ਬੱਚੀ ਦੀ ਡਰੀ ਹੋਈ ਆਵਾਜ਼ ਸੁਣੀ ਗਈ, ਜਿਸ ਵਿਚ ਉਹ ਆਪਣੀ ਮਾਂ ਨੂੰ ਬੁਲਾਉਂਦੀ ਹੈ ਅਤੇ ਘਰ ਜਾਣ ਦੀ ਬੇਨਤੀ ਕਰਦੀ ਹੈ। ਅਥੀਨਾ ਨੇ ਉਸ ਤੋਂ ਪੁੱਛਿਆ, ”ਤੁਸੀਂ ਇਹ ਕਿਉਂ ਕਰ ਰਹੇ ਹੋ?” ਜਿਸ ‘ਤੇ ਹੋਰਨਰ ਨੇ ਜਵਾਬ ਦਿੱਤਾ, ”ਕਿਉਂਕਿ ਤੂੰ ਸੋਹਣੀ ਹੈਂ।”
ਰਿਕਾਰਡਿੰਗ ਦੌਰਾਨ ਬੱਚੀ ਦੀਆਂ ਚੀਖਾਂ, ਰੋਣ ਦੀਆਂ ਆਵਾਜ਼ਾਂ ਅਤੇ ਹਿੰਸਾ ਦੇ ਸੰਕੇਤ ਵੀ ਸੁਣੇ ਗਏ। ਮੈਡੀਕਲ ਜਾਂਚ ਅਨੁਸਾਰ ਅਥੀਨਾ ਦੀ ਮੌਤ ਗਲਾ ਘੁੱਟਣ, ਸਾਹ ਰੋਕਣ ਅਤੇ ਸਰੀਰ ‘ਤੇ ਗੰਭੀਰ ਚੋਟਾਂ ਕਾਰਨ ਹੋਈ।
ਪ੍ਰੋਸੀਕਿਊਟਰਾਂ ਨੇ ਅਦਾਲਤ ਵਿਚ ਕਿਹਾ ਕਿ ਹੋਰਨਰ ਨੇ ਜਾਂਚ ਦੌਰਾਨ ਕਈ ਝੂਠ ਬੋਲੇ। ਪਹਿਲਾਂ ਉਸ ਨੇ ਦਾਅਵਾ ਕੀਤਾ ਸੀ ਕਿ ਬੱਚੀ ਗਲਤੀ ਨਾਲ ਵੈਨ ਨਾਲ ਟਕਰਾ ਗਈ ਸੀ ਅਤੇ ਘਬਰਾਹਟ ਵਿਚ ਉਸ ਨੇ ਇਹ ਕਦਮ ਚੁੱਕਿਆ। ਪਰ ਜਾਂਚ ਅਤੇ ਸਬੂਤਾਂ ਨੇ ਉਸ ਦੇ ਦਾਅਵਿਆਂ ਨੂੰ ਝੂਠਾ ਸਾਬਤ ਕਰ ਦਿੱਤਾ।
ਬਚਾਅ ਪੱਖ ਦੇ ਵਕੀਲਾਂ ਨੇ ਅਦਾਲਤ ਨੂੰ ਦੱਸਿਆ ਕਿ ਹੋਰਨਰ ਬਚਪਨ ਤੋਂ ਮਾਨਸਿਕ ਸਮੱਸਿਆਵਾਂ, ਆਟਿਜ਼ਮ ਅਤੇ ਹੋਰ ਬਿਮਾਰੀਆਂ ਨਾਲ ਪੀੜਤ ਸੀ। ਉਨ੍ਹਾਂ ਨੇ ਮੌਤ ਦੀ ਸਜ਼ਾ ਦੀ ਬਜਾਏ ਉਮਰ ਕੈਦ ਦੀ ਮੰਗ ਕੀਤੀ ਸੀ, ਪਰ ਜੂਰੀ ਨੇ ਇਹ ਦਲੀਲਾਂ ਖਾਰਜ ਕਰ ਦਿੱਤੀਆਂ।
ਅਥੀਨਾ ਦੇ ਪਰਿਵਾਰ ਨੇ ਦੱਸਿਆ ਕਿ ਜਿਸ ਪੈਕੇਜ ਦੀ ਡਿਲਿਵਰੀ ਲਈ ਹੋਰਨਰ ਘਰ ਆਇਆ ਸੀ, ਉਸ ਵਿਚ ਅਥੀਨਾ ਲਈ ਬਾਰਬੀ ਗੁੱਡੀਆਂ ਦਾ ਕ੍ਰਿਸਮਸ ਤੋਹਫ਼ਾ ਸੀ।
ਇਹ ਮਾਮਲਾ ਪੂਰੇ ਅਮਰੀਕਾ ਵਿਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਸੀ ਅਤੇ ਬੱਚੀ ਦੀ ਮੌਤ ਨੇ ਲੋਕਾਂ ਨੂੰ ਗਹਿਰੇ ਦੁੱਖ ਵਿਚ ਡੁੱਬੋ ਦਿੱਤਾ ਸੀ।