ਬੀਜਿੰਗ, 17 ਅਗਸਤ (ਪੰਜਾਬ ਮੇਲ)- ਚੀਨ ’ਚ ਜਨਮ ਦਰ ਸਬੰਧੀ ਅਜਿਹੀ ਖ਼ਬਰ ਸਾਹਮਣੇ ਆਈ ਹੈ, ਜਿਸ ਨੇ ਉੱਥੋਂ ਦੀ ਕਮਿਊਨਿਸਟ ਪਾਰਟੀ ਦੀ ਸਰਕਾਰ ਦੀ ਨੀਂਦ ਉਡਾ ਦਿੱਤੀ ਹੈ। ਅਸਲ ਵਿਚ ਚੀਨ ਦੇ ਜਨਸੰਖਿਆ ਅਤੇ ਵਿਕਾਸ ਖੋਜ ਕੇਂਦਰ ਦੇ ਅੰਕੜਿਆਂ ਅਨੁਸਾਰ ਦੇਸ਼ ਦੀ ਜਣਨ ਦਰ 2022 ਵਿਚ 1.9 ਦੇ ਰਿਕਾਰਡ ਹੇਠਲੇ ਪੱਧਰ ’ਤੇ ਆ ਗਈ। ਦਰਅਸਲ ਬੀਜਿੰਗ ਦੇਸ਼ ਦੀ ਜਨਮ ਦਰ ’ਚ ਆਈ ਗਿਰਾਵਟ ਨੂੰ ਦੂਰ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ। 10 ਕਰੋੜ ਤੋਂ ਵੱਧ ਆਬਾਦੀ ਵਾਲੇ ਦੇਸ਼ਾਂ ਵਿਚੋਂ ਚੀਨ ਦੀ ਜਣਨ ਦਰ ਸਭ ਤੋਂ ਘੱਟ ਹੈ। ਦੱਖਣੀ ਕੋਰੀਆ, ਤਾਈਵਾਨ, ਹਾਂਗਕਾਂਗ ਅਤੇ ਸਿੰਗਾਪੁਰ ਦੇ ਨਾਲ ਚੀਨ ’ਚ ਪਹਿਲਾਂ ਤੋਂ ਹੀ ਦੁਨੀਆਂ ਵਿਚ ਸਭ ਤੋਂ ਘੱਟ ਜਣਨ ਦਰ ਹੈ।
6 ਦਹਾਕਿਆਂ ’ਚ ਪਹਿਲੀ ਵਾਰ ਚੀਨ ਦੀ ਆਬਾਦੀ ਵਿਚ ਗਿਰਾਵਟ ਦਰਜ ਕੀਤੀ ਗਈ ਹੈ। ਅਜਿਹੇ ਵਿਚ ਬੀਜਿੰਗ ਲਗਾਤਾਰ ਵਿੱਤੀ ਪ੍ਰੋਤਸਾਹਨ ਅਤੇ ਬਿਹਤਰ ਬਾਲ ਦੇਖਭਾਲ ਸਹੂਲਤਾਂ ਨਾਲ ਜਨਮ ਦਰ ਨੂੰ ਵਧਾਉਣ ਦੇ ਤੇਜ਼ੀ ਨਾਲ ਉਪਾਅ ਕਰ ਰਿਹਾ ਹੈ। ਚੀਨ ਦਾ ਕਹਿਣਾ ਹੈ ਕਿ ਉਹ ਆਬਾਦੀ ਦੀ ਗੁਣਵੱਤਾ ਨੂੰ ਸੁਧਾਰਨ ਲਈ ਸਿੱਖਿਆ, ਵਿਗਿਆਨ ਅਤੇ ਤਕਨਾਲੋਜੀ ’ਤੇ ਧਿਆਨ ਕੇਂਦਰਿਤ ਕਰੇਗਾ ਅਤੇ ਆਰਥਿਕ ਵਿਕਾਸ ਨੂੰ ਸਮਰਥਨ ਦੇਣ ਲਈ ਮੱਧਮ ਪ੍ਰਜਣਨ ਪੱਧਰ ਨੂੰ ਬਣਾਈ ਰੱਖਣ ਦੀ ਕੋਸ਼ਿਸ਼ ਕਰੇਗਾ।
ਮਾਹਿਰਾਂ ਦਾ ਕਹਿਣਾ ਹੈ ਕਿ ਲਿੰਗ ਭੇਦਭਾਵ ਅਤੇ ਆਪਣੇ ਬੱਚਿਆਂ ਦੀ ਦੇਖਭਾਲ ਕਰਨ ਵਾਲੀਆਂ ਔਰਤਾਂ ਦੀਆਂ ਰਵਾਇਤੀ ਰੂੜੀਆਂ ਅਜੇ ਵੀ ਦੇਸ਼ ਭਰ ਵਿਚ ਵਿਆਪਕ ਹਨ। ਇਸ ਲਈ ਬਹੁਤ ਸਾਰੀਆਂ ਔਰਤਾਂ ਬੱਚੇ ਦੀ ਦੇਖਭਾਲ ਦੀ ਉੱਚ ਕੀਮਤ ਅਤੇ ਬੱਚੇ ਦੇ ਜਨਮ ਤੋਂ ਬਾਅਦ ਸੀਮਤ ਕਰੀਅਰ ਵਿਕਲਪਾਂ ਕਾਰਨ ਬੱਚੇ ਪੈਦਾ ਕਰਨ ਤੋਂ ਝਿਜਕਦੀਆਂ ਹਨ। ਇਸ ਤੋਂ ਇਲਾਵਾ ਦੇਸ਼ ਦੇ ਜ਼ਿਆਦਾਤਰ ਹਿੱਸਿਆਂ ਵਿਚ ਜਣੇਪੇ ਦੀ ਛੁੱਟੀ ਅਜੇ ਵੀ ਸੀਮਤ ਹੈ। ਹਾਂਗਕਾਂਗ ਦੀ ਫੈਮਿਲੀ ਪਲੈਨਿੰਗ ਐਸੋਸੀਏਸ਼ਨ ਦਾ ਕਹਿਣਾ ਹੈ ਕਿ ਚੀਨ ਦੇ ਵਿਸ਼ੇਸ਼ ਪ੍ਰਸ਼ਾਸਨਿਕ ਖੇਤਰ ਵਿਚ ਬੇਔਲਾਦ ਔਰਤਾਂ ਦੀ ਪ੍ਰਤੀਸ਼ਤਤਾ ਪੰਜ ਸਾਲ ਪਹਿਲਾਂ ਨਾਲੋਂ ਚਾਰ ਗੁਣਾ ਵਧ ਕੇ ਪਿਛਲੇ ਸਾਲ 43.2 ਪ੍ਰਤੀਸ਼ਤ ਹੋ ਗਈ ਹੈ। ਇਕ ਜਾਂ ਦੋ ਬੱਚਿਆਂ ਵਾਲੇ ਜੋੜਿਆਂ ਦੇ ਅਨੁਪਾਤ ਵਿਚ ਵੀ ਗਿਰਾਵਟ ਆਈ ਹੈ, ਅਤੇ ਇਸਦੇ ਸਰਵੇਖਣ ਅਨੁਸਾਰ, ਪ੍ਰਤੀ ਔਰਤ ਬੱਚਿਆਂ ਦੀ ਔਸਤ ਸੰਖਿਆ 2017 ਵਿਚ 1.3 ਤੋਂ ਘਟ ਕੇ ਪਿਛਲੇ ਸਾਲ 0.9 ਦੇ ਰਿਕਾਰਡ ਹੇਠਲੇ ਪੱਧਰ ’ਤੇ ਆ ਗਈ।
