ਨਿਊਯਾਰਕ, 7 ਮਾਰਚ (ਪੰਜਾਬ ਮੇਲ)- ਭਾਰਤੀ-ਅਮਰੀਕੀ ਤੇਜਲ ਮਹਿਤਾ ਨੇ ਅਮਰੀਕਾ ਦੇ ਮੈਸੇਚਿਉਸੇਟਸ ਸੂਬੇ ਵਿਚ ਅਯਰ ਜ਼ਿਲ੍ਹਾ ਅਦਾਲਤ ਦੇ ਪਹਿਲੇ ਜੱਜ ਵਜੋਂ ਸਹੁੰ ਚੁੱਕੀ। ਲੋਵੇਲ ਸਨ ਦੀ ਖ਼ਬਰ ਮੁਤਾਬਕ ਤੇਜਲ ਨੇ ਇਸ ਅਦਾਲਤ ਵਿਚ ਸਹਾਇਕ ਜੱਜ ਵਜੋਂ ਸੇਵਾ ਨਿਭਾਈ ਸੀ। ਤੇਜਲ ਨੂੰ ਸਰਬਸੰਮਤੀ ਨਾਲ ਜੱਜ ਚੁਣਿਆ ਗਿਆ ਅਤੇ 2 ਮਾਰਚ ਨੂੰ ਜ਼ਿਲ੍ਹਾ ਅਦਾਲਤ ਦੇ ਚੀਫ਼ ਜਸਟਿਸ ਸਟੈਸੀ ਫੋਰਟਸ ਨੇ ਉਸ ਨੂੰ ਸਹੁੰ ਚੁਕਾਈ। ਫੋਰਟਸ ਨੇ ਕਿਹਾ ਕਿ ”ਮੈਨੂੰ ਭਰੋਸਾ ਹੈ ਕਿ ਉਸਦੀ ਅਗਵਾਈ ਵਿਚ ਅਯਰ ਜ਼ਿਲ੍ਹਾ ਅਦਾਲਤ ਲਈ ਸਭ ਤੋਂ ਵਧੀਆ ਪ੍ਰਦਰਸ਼ਨ ਕਰੇਗੀ।
ਤੇਜਲ ਨੇ ਕਿਹਾ ਕਿ ‘ਇਕ ਵਕੀਲ ਦੇ ਤੌਰ ‘ਤੇ ਤੁਸੀਂ ਲੋਕਾਂ ਦੀ ਮਦਦ ਕਰ ਸਕਦੇ ਹੋ। ਹਾਲਾਂਕਿ, ਇਸ ਦੀ ਇੱਕ ਸੀਮਾ ਹੈ। ਇੱਕ ਜੱਜ ਵਜੋਂ ਤੁਸੀਂ ਬਹੁਤ ਕੁਝ ਕਰ ਸਕਦੇ ਹੋ ਅਤੇ ਮੁੱਦਿਆਂ ਦੀ ਤਹਿ ਤੱਕ ਜਾ ਸਕਦੇ ਹੋ। ਤੇਜਲ ਨੇ ਕਿਹਾ ਕਿ ਉਸਦਾ ਟੀਚਾ ਉਸ ਭਾਈਚਾਰੇ ‘ਤੇ ਸਕਾਰਾਤਮਕ ਪ੍ਰਭਾਵ ਪਾਉਣਾ ਹੈ, ਜਿਸ ਨਾਲ ਉਹ ਵੱਡੀ ਹੋਈ ਹੈ। ਉਸ ਨੇ ਹਰ ਉਸ ਅਦਾਲਤ ਦੇ ਕਮਰੇ ਵਿਚ ਉਹੀ ਉਮੀਦ ਅਤੇ ਨਿਰਾਸ਼ਾ ਦੇਖੀ ਹੈ, ਜਿਸ ਵਿਚ ਉਹ ਇੱਕ ਟ੍ਰੈਵਲਿੰਗ ਜੱਜ ਵਜੋਂ ਬੈਠੀ ਹੈ। ਪਰ ਜਦੋਂ ਤੁਸੀਂ ਜੱਜ ਹੁੰਦੇ ਹੋ, ਤਾਂ ਤੁਸੀਂ ਸੱਚਮੁੱਚ ਭਾਈਚਾਰੇ ਨੂੰ ਜਾਣ ਸਕਦੇ ਹੋ ਅਤੇ ਅਸਲ ਪ੍ਰਭਾਵ ਪਾ ਸਕਦੇ ਹੋ।
ਤੇਜਲ ਦੇ ਪਿਤਾ ਇੱਕ ਕੈਮਿਸਟ ਸਨ ਅਤੇ ਉਸਦੀ ਮਾਂ ਇੱਕ ਹਸਪਤਾਲ ਵਿਚ ਕੰਮ ਕਰਦੀ ਸੀ। ਤੇਜਲ ਨੇ 1997 ਵਿਚ ਨੋਟਰ ਡੈਮ ਯੂਨੀਵਰਸਿਟੀ ਤੋਂ ਅੰਗਰੇਜ਼ੀ ਵਿਚ ਬੈਚਲਰ ਦੀ ਡਿਗਰੀ ਹਾਸਲ ਕੀਤੀ। ਫਿਰ ਉਸਨੇ ਬੋਸਟਨ ਯੂਨੀਵਰਸਿਟੀ ਸਕੂਲ ਆਫ ਲਾਅ ਤੋਂ ਸਾਲ 2000 ਵਿਚ ਆਪਣੀ ਜੇਡੀ ਪੂਰੀ ਕੀਤੀ। ਲਾਅ ਸਕੂਲ ਤੋਂ ਗ੍ਰੈਜੂਏਟ ਹੋਣ ਤੋਂ ਬਾਅਦ ਤੇਜਲ ਨੇ ਸੁਫੋਲਕ ਕਾਉਂਟੀ ਸੁਪੀਰੀਅਰ ਕੋਰਟ ਵਿਚ ਇੱਕ ਸਹਾਇਕ ਕਲਰਕ ਵਜੋਂ ਆਪਣੇ ਕਾਨੂੰਨੀ ਕੈਰੀਅਰ ਦੀ ਸ਼ੁਰੂਆਤ ਕੀਤੀ। ਇਸ ਤੋਂ ਬਾਅਦ ਉਸ ਨੇ ਪ੍ਰਾਈਵੇਟ ਪ੍ਰੈਕਟਿਸ ਕਰਨੀ ਸ਼ੁਰੂ ਕਰ ਦਿੱਤੀ। 2005 ਵਿਚ ਭਾਰਤੀ-ਅਮਰੀਕੀ ਜੱਜ ਮਿਡਲਸੈਕਸ ਕਾਉਂਟੀ ਜ਼ਿਲ੍ਹਾ ਅਟਾਰਨੀ ਦੇ ਦਫ਼ਤਰ ਵਿਚ ਸਹਾਇਕ ਜ਼ਿਲ੍ਹਾ ਅਟਾਰਨੀ ਵਜੋਂ ਸ਼ਾਮਲ ਹੋਈ ਅਤੇ 2016 ਤੱਕ ਕੰਮ ਕੀਤਾ। ਇਸ ਤੋਂ ਬਾਅਦ ਉਸ ਨੇ ਆਪਣੀ ਪ੍ਰਾਈਵੇਟ ਪ੍ਰੈਕਟਿਸ ਸ਼ੁਰੂ ਕਰ ਦਿੱਤੀ।
ਤੇਜਲ ਮਹਿਤਾ ਮੈਸੇਚਿਉਸੇਟਸ ਬਾਰ ਐਸੋਸੀਏਸ਼ਨ ਅਤੇ ਸਾਊਥ ਏਸ਼ੀਅਨ ਬਾਰ ਐਸੋਸੀਏਸ਼ਨ ਵਿਚ ਮੈਂਬਰਸ਼ਿਪ ਰੱਖਦੀ ਹੈ। ਉਹ ਬਾਰ ਓਵਰਸੀਅਰਜ਼ ਦੇ ਬੋਰਡ ਦੇ ਨਾਲ-ਨਾਲ ਬੈੱਡਫੋਰਡ ਮੋਂਟੇਸਰੀ ਸਕੂਲ ਦੇ ਕਾਰਜਕਾਰੀ ਬੋਰਡ ‘ਤੇ ਵੀ ਹੈ। ਦੱਸ ਦੇਈਏ ਕਿ ਪੂਰੇ ਦੇਸ਼ ਵਿਚ 94 ਜ਼ਿਲ੍ਹਾ ਅਦਾਲਤਾਂ, 13 ਸਰਕਟ ਅਦਾਲਤਾਂ ਅਤੇ ਇੱਕ ਸੁਪਰੀਮ ਕੋਰਟ ਹੈ। ਉਹ ਫੈਡਰਲ ਅਦਾਲਤੀ ਪ੍ਰਣਾਲੀ ਦੇ ਅੰਦਰ ਦੀਵਾਨੀ ਅਤੇ ਫੌਜਦਾਰੀ ਮੁਕੱਦਮੇ ਦੋਵਾਂ ਨੂੰ ਸੰਭਾਲਦੇ ਹਨ।