-ਪੀਲੀਭੀਤ ‘ਚ ਮਾਰੇ ਗਏ ਅੱਤਵਾਦੀਆਂ ਨਾਲ ਜੁੜੇ ਹਨ ਤਾਰ
ਤਰਨਤਾਰਨ, 25 ਦਸੰਬਰ (ਪੰਜਾਬ ਮੇਲ)- ਬ੍ਰਿਟਿਸ਼ ਆਰਮੀ ‘ਚ ਤਾਇਨਾਤ ਤਰਨਤਾਰਨ ਦੇ ਪਿੰਡ ਮੀਆਂਪੁਰ ਦੇ ਜਗਜੀਤ ਸਿੰਘ ਦੇ ਸਬੰਧ ਉੱਤਰ ਪ੍ਰਦੇਸ਼ ਦੇ ਪੀਲੀਭੀਤ ‘ਚ ਮਾਰੇ ਗਏ ਅੱਤਵਾਦੀਆਂ ਨਾਲ ਹਨ। ਬੁੱਧਵਾਰ ਸਵੇਰੇ ਐੱਨ.ਆਈ.ਆਈ. ਦੀ ਟੀਮ ਨੇ ਉਸ ਦੇ ਘਰ ਛਾਪਾ ਮਾਰਿਆ ਤੇ ਮਾਪਿਆਂ ਤੋਂ ਪੁੱਛਗਿੱਛ ਕੀਤੀ। ਟੀਮ ਨੇ ਸਰਾਏ ਅਮਾਨਤ ਖਾਂ ਥਾਣੇ ‘ਚ ਜਗਜੀਤ ਦੇ ਪਰਿਵਾਰ ਦੇ ਪਿਛੋਕੜ ਬਾਰੇ ਵੀ ਜਾਣਕਾਰੀ ਲਈ।
ਜਗਜੀਤ ਸਿੰਘ ਖਾਲਿਸਤਾਨ ਜ਼ਿੰਦਾਬਾਦ ਫੋਰਸ (ਕੇ.ਜੀ.ਐੱਫ.) ਦੇ ਮੁਖੀ ਅੱਤਵਾਦੀ ਰਣਜੀਤ ਸਿੰਘ ਨੀਟਾ ਦਾ ਮਾਡਿਊਲ ਹੈ। ਐੱਸ.ਪੀ. (ਆਈ) ਅਜੈਰਾਜ ਸਿੰਘ ਨੇ ਦੱਸਿਆ ਕਿ ਜਗਜੀਤ ਦੇ ਪਰਿਵਾਰ ਦੇ ਰਿਕਾਰਡ ਦੀ ਪੜਤਾਲ ਕੀਤੀ ਜਾ ਰਹੀ ਹੈ। ਇਸ ਦੇ ਨਾਲ ਹੀ ਮਾਮਲੇ ਦੀ ਉੱਚ ਪੱਧਰੀ ਜਾਂਚ ਕੀਤੀ ਜਾ ਰਹੀ ਹੈ।
ਜਗਜੀਤ ਦੇ ਪਿਤਾ ਜੋਗਿੰਦਰ ਸਿੰਘ ਤੇ ਦਾਦਾ ਫੌਜ ‘ਚ ਨੌਕਰੀ ਕਰ ਚੁੱਕੇ ਹਨ। ਵੱਡਾ ਭਰਾ ਗੁਰਜੀਤ ਸਿੰਘ ਵੀ ਰਾਜਸਥਾਨ ‘ਚ ਫੌਜ ‘ਚ ਤਾਇਨਾਤ ਹੈ। ਜੋਗਿੰਦਰ ਸਿੰਘ ਨੇ ਦੱਸਿਆ ਕਿ 10 ਸਾਲ ਪਹਿਲਾਂ ਛੋਟਾ ਲੜਕਾ ਜਗਜੀਤ ਸਟੱਡੀ ਵੀਜ਼ੇ ‘ਤੇ ਬਰਤਾਨੀਆ ਗਿਆ ਸੀ। ਉੱਥੇ ਉਸ ਨੇ ਸਾਫਟ ਇੰਜੀਨੀਅਰਿੰਗ ਦੀ ਪੜ੍ਹਾਈ ਕੀਤੀ ਤੇ ਡਿਪਲੋਮਾ ਕੀਤਾ। ਫਿਰ ਉਹ ਬ੍ਰਿਟਿਸ਼ ਆਰਮੀ ‘ਚ ਭਰਤੀ ਹੋ ਗਿਆ। ਅਫਗਾਨਿਸਤਾਨ ਨਾਲ ਜੰਗ ਵਿਚ ਵੀ ਹਿੱਸਾ ਲਿਆ। ਅੱਠ ਸਾਲ ਪਹਿਲਾਂ ਉਸ ਨੂੰ ਅੰਤਰ-ਜਾਤੀ ਵਿਆਹ ਕਰਨ ਲਈ ਘਰੋਂ ਕੱਢ ਦਿੱਤਾ ਗਿਆ ਸੀ।
ਪੀਲੀਭੀਤ ਮੁਕਾਬਲੇ ‘ਚ ਤਿੰਨ ਅੱਤਵਾਦੀਆਂ ਦੇ ਮਾਰੇ ਜਾਣ ਤੋਂ ਨਿਰਾਸ਼ ਖਾਲਿਸਤਾਨੀ ਅੱਤਵਾਦੀ ਗੁਰਵੰਤ ਸਿੰਘ ਪੰਨੂ ਤੇ ਪਾਕਿਸਤਾਨ ‘ਚ ਲੁਕੇ ਅੱਤਵਾਦੀ ਰਣਜੀਤ ਸਿੰਘ ਨੀਟਾ ਨੇ ਬਦਲਾ ਲੈਣ ਦੀ ਧਮਕੀ ਦਿੱਤੀ ਹੈ। ਮੰਗਲਵਾਰ ਨੂੰ ਪੰਨੂ ਨੇ ਵੀਡੀਓ ਸਰਕੁਲੇਟ ਕੀਤਾ, ਜਿਸ ‘ਚ ਉਹ ਮੁਕਾਬਲੇ ਦਾ ਬਦਲਾ ਮਹਾਕੁੰਭ ‘ਚ ਲੈਣ ਦੀ ਗੱਲ ਕਰ ਕਹਿ ਰਿਹਾ ਹੈ।