ਮਰਾਨਾ (ਐਰੀਜ਼ੋਨਾ), 21 ਫਰਵਰੀ (ਪੰਜਾਬ ਮੇਲ)- ਅਮਰੀਕਾ ਦੇ ਦੱਖਣੀ ਐਰੀਜ਼ੋਨਾ ‘ਚ 2 ਛੋਟੇ ਜਹਾਜ਼ਾਂ ਵਿਚਕਾਰ ਹਵਾ ‘ਚ ਟੱਕਰ ਹੋ ਗਈ। ਜਾਣਕਾਰੀ ਤੋਂ ਬਾਅਦ ਮਰਾਨਾ ਪੁਲਿਸ ਨੇ ਹਾਦਸੇ ‘ਚ ਘੱਟੋ-ਘੱਟ 2 ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਕੀਤੀ ਹੈ। ਅਧਿਕਾਰੀਆਂ ਮੁਤਾਬਕ ਇਹ ਹਾਦਸਾ ਟਕਸਨ ਦੇ ਬਾਹਰਵਾਰ ਵਾਪਰਿਆ। ਨੈਸ਼ਨਲ ਟਰਾਂਸਪੋਰਟੇਸ਼ਨ ਸੇਫਟੀ ਬੋਰਡ (ਐੱਨ.ਟੀ.ਐੱਸ.ਬੀ.) ਮਾਮਲੇ ਦੀ ਜਾਂਚ ਕਰ ਰਿਹਾ ਹੈ।
ਦੱਸਣਯੋਗ ਹੈ ਕਿ ਦੱਖਣੀ ਐਰੀਜ਼ੋਨਾ ਜਹਾਜ਼ ਹਾਦਸੇ ਤੋਂ ਪਹਿਲਾਂ ਉੱਤਰੀ ਅਮਰੀਕਾ ਵਿਚ ਸਾਲ 2025 ਵਿਚ 4 ਵੱਡੇ ਜਹਾਜ਼ ਹਾਦਸੇ ਦਾ ਸ਼ਿਕਾਰ ਹੋ ਚੁੱਕੇ ਹਨ। ਇਨ੍ਹਾਂ ਵਿਚ ਪਿਛਲੇ ਹਫ਼ਤੇ ਐਰੀਜ਼ੋਨਾ ਵਿਚ ਜਹਾਜ਼ ਹਾਦਸਾ, ਅਲਾਸਕਾ ਵਿਚ ਕੰਪਿਊਟਰ ਜਹਾਜ਼ ਹਾਦਸਾ, ਵਾਸ਼ਿੰਗਟਨ ਡੀ.ਸੀ. ਵਿਚ ਜਹਾਜ਼ ਹਾਦਸਾ ਅਤੇ ਫਿਲਾਡੇਲਫੀਆ ਵਿਚ ਜਹਾਜ਼ ਹਾਦਸਾ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਇਸ ਸਾਲ ਟੋਰਾਂਟੋ ਵਿਚ ਵੀ ਇੱਕ ਜਹਾਜ਼ ਹਾਦਸਾ ਵਾਪਰਿਆ ਸੀ। ਟੋਰਾਂਟੋ ਵਿਚ ਲੈਂਡਿੰਗ ਦੌਰਾਨ ਡੈਲਟਾ ਜੈੱਟ ਪਲਟ ਗਿਆ ਸੀ।
ਪਿਛਲੇ ਹਫ਼ਤੇ ਇੱਕ ਜਹਾਜ਼ ਐਰੀਜ਼ੋਨਾ ਵਿਚ ਰਨਵੇਅ ਤੋਂ ਫਿਸਲ ਗਿਆ ਅਤੇ ਇੱਕ ਕਾਰੋਬਾਰੀ ਜੈੱਟ ਨਾਲ ਟਕਰਾ ਗਿਆ, ਜਿਸ ਵਿਚ ਮੋਟਲੇ ਕਰੂ ਗਾਇਕ ਵਿੰਸ ਨੀਲ ਦੀ ਮਲਕੀਅਤ ਵਾਲੇ ਪ੍ਰਾਈਵੇਟ ਜੈੱਟ ਦੇ 2 ਪਾਇਲਟਾਂ ਦੀ ਮੌਤ ਹੋ ਗਈ ਸੀ। ਇਸ ਤੋਂ ਇਲਾਵਾ ਜਨਵਰੀ ਦੇ ਅਖੀਰ ਵਿਚ ਵਾਸ਼ਿੰਗਟਨ ਡੀ.ਸੀ. ਵਿਚ ਇੱਕ ਫੌਜੀ ਹੈਲੀਕਾਪਟਰ ਅਮਰੀਕੀ ਏਅਰਲਾਈਨਜ਼ ਦੇ ਇੱਕ ਯਾਤਰੀ ਜਹਾਜ਼ ਨਾਲ ਟਕਰਾ ਗਿਆ ਸੀ, ਜਿਸ ਵਿਚ ਸਵਾਰ 67 ਲੋਕ ਮਾਰੇ ਗਏ ਸਨ।