ਵਾਸ਼ਿੰਗਟਨ, 8 ਸਤੰਬਰ (ਪੰਜਾਬ ਮੇਲ)- ਅਮਰੀਕਾ ਨੇ ਭਾਰਤੀ ਨਾਗਰਿਕਾਂ ਲਈ ਵੀਜ਼ਾ ਪ੍ਰਕਿਰਿਆ ‘ਚ ਵੱਡੀ ਤਬਦੀਲੀ ਕੀਤੀ ਹੈ। ਹੁਣ ਨਾਨ-ਇਮੀਗ੍ਰੈਂਟ ਵੀਜ਼ਾ (ਐੱਨ.ਆਈ.ਵੀ.) ਲਈ ਇੰਟਰਵਿਊ ਸਿਰਫ਼ ਆਪਣੇ ਦੇਸ਼ ਜਾਂ ਕਾਨੂੰਨੀ ਰਿਹਾਇਸ਼ ਵਾਲੇ ਦੇਸ਼ ‘ਚ ਹੀ ਦੇਣਾ ਹੋਵੇਗਾ। ਇਸ ਦਾ ਮਤਲਬ ਹੈ ਕਿ ਭਾਰਤੀ ਹੁਣ ਪਹਿਲਾਂ ਵਾਂਗ ਥਾਈਲੈਂਡ, ਸਿੰਗਾਪੁਰ ਜਾਂ ਜਰਮਨੀ ਵਰਗੇ ਦੇਸ਼ਾਂ ‘ਚ ਜਾ ਕੇ ਟੂਰਿਸਟ (ਬੀ1) ਜਾਂ ਬਿਜ਼ਨੈੱਸ (ਬੀ2) ਵੀਜ਼ਾ ਲਈ ਇੰਟਰਵਿਊ ਨਹੀਂ ਦੇ ਸਕਣਗੇ। ਇਹ ਨਵਾਂ ਨਿਯਮ 2 ਸਤੰਬਰ ਤੋਂ ਲਾਗੂ ਹੋ ਗਿਆ ਹੈ।
ਕੋਰੋਨਾ ਮਹਾਮਾਰੀ ਦੌਰਾਨ ਭਾਰਤ ‘ਚ ਅਮਰੀਕੀ ਵੀਜ਼ਾ ਇੰਟਰਵਿਊ ਲਈ ਇੰਤਜ਼ਾਰ ਦਾ ਸਮਾਂ ਕਾਫ਼ੀ ਲੰਮਾ ਹੋ ਗਿਆ ਸੀ, ਕਈ ਵਾਰ ਇਹ 3 ਸਾਲ ਤੱਕ ਦਾ ਹੁੰਦਾ ਸੀ। ਉਸ ਸਮੇਂ ਕਈ ਭਾਰਤੀ ਤੇਜ਼ੀ ਨਾਲ ਵੀਜ਼ਾ ਪ੍ਰਾਪਤ ਕਰਨ ਲਈ ਬੈਂਕਾਕ, ਸਿੰਗਾਪੁਰ ਜਾਂ ਫ੍ਰੈਂਕਫਰਟ ਜਾ ਕੇ ਇੰਟਰਵਿਊ ਦਿੰਦੇ ਸਨ। ਹੁਣ ਇਹ ਸਹੂਲਤ ਖਤਮ ਕਰ ਦਿੱਤੀ ਗਈ ਹੈ।
ਇਹ ਤਬਦੀਲੀ ਉਨ੍ਹਾਂ ਸਾਰੇ ਲੋਕਾਂ ‘ਤੇ ਲਾਗੂ ਹੋਵੇਗਾ, ਜੋ ਟੂਰਿਸਟ, ਬਿਜ਼ਨੈੱਸ, ਸਟੂਡੈਂਟ ਜਾਂ ਅਸਥਾਈ ਵਰਕਰ ਵੀਜ਼ਾ ਲਈ ਅਰਜ਼ੀ ਦੇ ਰਹੇ ਹਨ। ਮੰਨਿਆ ਜਾ ਰਿਹਾ ਹੈ ਕਿ ਇਹ ਫੈਸਲਾ ਡੋਨਾਲਡ ਟਰੰਪ ਦੇ ਦੂਜੇ ਕਾਰਜਕਾਲ ਦੌਰਾਨ ਲਏ ਗਏ ਸਖ਼ਤ ਵੀਜ਼ਾ ਨਿਯਮਾਂ ਦਾ ਹੀ ਹਿੱਸਾ ਹੈ।
ਅਮਰੀਕੀ ਵਿਦੇਸ਼ ਮੰਤਰਾਲੇ ਦੀ ਵੈੱਬਸਾਈਟ ਮੁਤਾਬਕ, ਭਾਰਤ ਦੇ ਵੱਖ-ਵੱਖ ਸ਼ਹਿਰਾਂ ‘ਚ ਇੰਟਰਵਿਊ ਲਈ ਇੰਤਜ਼ਾਰ ਦਾ ਸਮਾਂ ਵੱਖਰਾ ਹੈ:
ਹੈਦਰਾਬਾਦ ਅਤੇ ਮੁੰਬਈ ਲਈ ਇਹ ਸਮਾਂ 3.5 ਮਹੀਨੇ ਦਾ ਹੈ, ਜਦਕਿ ਦਿੱਲੀ ਲਈ 4.5 ਮਹੀਨੇ, ਕੋਲਕਾਤਾ ਲਈ 5 ਮਹੀਨੇ ਅਤੇ ਚੇਨਈ ਲਈ ਇਹ ਸਮਾਂ 9 ਮਹੀਨੇ ਦਾ ਹੈ।
ਕੁਝ ਮਾਮਲਿਆਂ ‘ਚ ਇੰਟਰਵਿਊ ਤੋਂ ਛੋਟ ਅਜੇ ਵੀ ਮਿਲੇਗੀ। ਜੇਕਰ ਤੁਹਾਡਾ ਬੀ1, ਬੀ2 ਜਾਂ ਬੀ1/ਬੀ2 ਵੀਜ਼ਾ ਪਿਛਲੇ 12 ਮਹੀਨਿਆਂ ‘ਚ ਐਕਸਪਾਇਰ ਹੋਇਆ ਹੈ ਅਤੇ ਤੁਹਾਡੀ ਉਮਰ 18 ਸਾਲ ਜਾਂ ਉਸ ਤੋਂ ਵੱਧ ਹੈ, ਤਾਂ ਕੁਝ ਮਾਮਲਿਆਂ ‘ਚ ਤੁਹਾਨੂੰ ਇੰਟਰਵਿਊ ਦੇਣ ਦੀ ਲੋੜ ਨਹੀਂ ਪਵੇਗੀ।