ਜਹਾਜ਼ ‘ਚ ਭਾਰੀ ਗਿਣਤੀ ਵਿਚ ਗੁਜਰਾਤੀ ਵੀ ਸਨ ਸ਼ਾਮਲ
ਅਹਿਮਦਾਬਾਦ, 3 ਜਨਵਰੀ (ਪੰਜਾਬ ਮੇਲ)- ਫਰਾਂਸ ‘ਚ ਨਿਕਾਰਾਗੁਆ ਜਾਣ ਵਾਲੇ ਏਅਰਬੱਸ ਏ340 ਨੂੰ ਸ਼ੱਕੀ ਮਨੁੱਖੀ ਤਸਕਰੀ ਦੇ ਮਾਮਲੇ ‘ਚ ਲੈਂਡ ਕਰਨ ਤੋਂ ਬਾਅਦ, ਅਧਿਕਾਰੀਆਂ ਨੇ ਖੁਲਾਸਾ ਕੀਤਾ ਹੈ ਕਿ ਗੁਜਰਾਤ ਤੋਂ ਭਾਰੀ ਗਿਣਤੀ ਵਿਚ ਯਾਤਰੀ ਜਹਾਜ਼ ਵਿਚ ਸਵਾਰ ਸਨ, ਜੋ ਗੈਰ-ਕਾਨੂੰਨੀ ਤਰੀਕੇ ਨਾਲ ਅਮਰੀਕਾ ‘ਚ ਦਾਖਲ ਹੋਣ ਦੀ ਕੋਸ਼ਿਸ਼ ਕਰ ਰਹੇ ਸਨ।
ਗੁਜਰਾਤ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਵਿਅਕਤੀ ਕਥਿਤ ਤੌਰ ‘ਤੇ ਇਮੀਗ੍ਰੇਸ਼ਨ ਏਜੰਟਾਂ ਨੂੰ 60 ਲੱਖ ਤੋਂ 80 ਲੱਖ ਰੁਪਏ ਤੱਕ ਦਾ ਭੁਗਤਾਨ ਕਰਨ ਲਈ ਸਹਿਮਤ ਹੋਏ ਸਨ ਅਤੇ ਉਨ੍ਹਾਂ ਨਾਲ ਵਾਅਦਾ ਕੀਤਾ ਗਿਆ ਸੀ ਕਿ ਦੁਬਈ ਰਾਹੀਂ ਨਿਕਾਰਾਗੁਆ ਪਹੁੰਚਣ ਤੋਂ ਬਾਅਦ ਅਮਰੀਕਾ-ਮੈਕਸੀਕੋ ਸਰਹੱਦ ਪਾਰ ਕਰਨ ਵਿਚ ਉਨ੍ਹਾਂ ਦੀ ਸਹਾਇਤਾ ਕੀਤੀ ਜਾਵੇਗੀ।
ਗੁਜਰਾਤ ਪੁਲਿਸ ਨੇ ਕਿਹਾ ਕਿ ਉਸਨੇ ਭਾਰਤੀ ਨਾਗਰਿਕਾਂ ਨੂੰ ਸੰਯੁਕਤ ਰਾਜ ਵਿਚ ਗੈਰਕਾਨੂੰਨੀ ਢੰਗ ਨਾਲ ਲਿਜਾਣ ਵਾਲੇ ਇੱਕ ਵੱਡੇ ਰੈਕੇਟ ਦਾ ਪਰਦਾਫਾਸ਼ ਕੀਤਾ ਹੈ।
ਜ਼ਿਕਰਯੋਗ ਹੈ ਕਿ ਫਰਾਂਸ ਦੇ ਵਿਟਰੀ ਏਅਰਪੋਰਟ ‘ਤੇ ਰਿਫਿਊਲ ਭਰਨ ਲਈ ਰੁਕੀ ਦੁਬਈ ਤੋਂ ਆਈ ਫਲਾਈਟ 260 ਭਾਰਤੀ ਨਾਗਰਿਕਾਂ ਸਮੇਤ 303 ਯਾਤਰੀਆਂ ਨੂੰ ਲੈ ਕੇ ਗਈ ਸੀ। ਇਨ੍ਹਾਂ ਵਿਚੋਂ 96 ਯਾਤਰੀਆਂ ਦੀ ਪਛਾਣ ਗੁਜਰਾਤ ਦੇ ਵਸਨੀਕ ਵਜੋਂ ਹੋਈ ਹੈ। ਇਨ੍ਹਾਂ ‘ਚੋਂ ਜ਼ਿਆਦਾਤਰ ਨੇ 8ਵੀਂ-12ਵੀਂ ਜਮਾਤ ਤੱਕ ਪੜ੍ਹਾਈ ਕੀਤੀ ਹੈ ਅਤੇ ਉਹ ਮੇਹਸਾਣਾ ਅਤੇ ਅਹਿਮਦਾਬਾਦ ਦੇ ਰਹਿਣ ਵਾਲੇ ਹਨ।
ਅਹਿਮਦਾਬਾਦ ਤੋਂ ਦੁਬਈ ਅਤੇ ਫਿਰ ਨਿਕਾਰਾਗੁਆ ਜਾਣ ਵਾਲੇ ਇਸ ਸਫ਼ਰ ਵਿਚ ਹਰੇਕ ਵਿਅਕਤੀ ਨੂੰ 60 ਲੱਖ ਤੋਂ 80 ਲੱਖ ਰੁਪਏ ਤੱਕ ਦਾ ਖਰਚਾ ਆਉਂਦਾ ਹੈ। ਜਾਂਚ ਵਿਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਭਾਰਤੀ ਏਜੰਟਾਂ ਵੱਲੋਂ ਮੈਕਸੀਕੋ ਤੋਂ ਅਮਰੀਕੀ ਸਰਹੱਦ ਪਾਰ ਕਰਵਾਉਣ ਲਈ ਸਥਾਨਕ ਏਜੰਟਾਂ ਨੂੰ 1,000 ਡਾਲਰ ਤੋਂ 3,000 ਡਾਲਰ ਦਾ ਭੁਗਤਾਨ ਕੀਤਾ ਜਾਣਾ ਸੀ।
ਜਾਂਚ ਵਿਚ ਫਲਾਈਟ ਟਿਕਟਾਂ ਲਈ ਵਿੱਤੀ ਲੈਣ-ਦੇਣ ਅਤੇ ਵੀਜ਼ਾ ਪ੍ਰਾਪਤ ਕਰਨ ਦੀ ਪ੍ਰਕਿਰਿਆ ਦਾ ਵੀ ਪਤਾ ਲਗਾਇਆ ਗਿਆ। ਇਹ ਪਾਇਆ ਗਿਆ ਕਿ ਇਨ੍ਹਾਂ ਵਿਅਕਤੀਆਂ ਦੇ ਪਾਸਪੋਰਟਾਂ ‘ਤੇ ਜ਼ਰੂਰੀ ਸਟੈਂਪਾਂ ਦੀ ਘਾਟ ਸੀ।
ਪੁੱਛਗਿੱਛ ਰੈਕੇਟ ਵਿਚ ਸ਼ਾਮਲ ਏਜੰਟਾਂ, ਦੁਬਈ ਦੇ ਵੀਜ਼ਾ ਪ੍ਰਾਪਤ ਕਰਨ ਦੀ ਪ੍ਰਕਿਰਿਆ ਅਤੇ ਇਨ੍ਹਾਂ ਕਾਰਵਾਈਆਂ ਪਿੱਛੇ ਵਿੱਤੀ ਲੈਣ-ਦੇਣ ਦਾ ਵੀ ਪਰਦਾਫਾਸ਼ ਹੋਇਆ ਹੈ।
ਸੀ.ਆਈ.ਡੀ. ਕ੍ਰਾਈਮ ਨੇ ਇਨ੍ਹਾਂ ਵਿਚੋਂ 55 ਵਿਅਕਤੀਆਂ ਦੇ ਘਰ ਜਾ ਕੇ ਬਿਆਨ ਲੈਣ ਮਗਰੋਂ ਪੁੱਛਗਿੱਛ ਲਈ ਬੁਲਾਇਆ ਹੈ।
ਇਸ ਗੈਰ-ਕਾਨੂੰਨੀ ਇਮੀਗ੍ਰੇਸ਼ਨ ਰੈਕੇਟ ‘ਚ ਸ਼ਾਮਲ ਲਗਭਗ 15 ਗੈਰ ਕਾਨੂੰਨੀ ਏਜੰਟਾਂ ਦੀ ਪਛਾਣ ਹੋਈ ਹੈ, ਜਿਨ੍ਹਾਂ ਦੀ ਪੁੱਛਗਿਛ ਚੱਲ ਰਹੀ ਹੈ।