ਵਾਸ਼ਿੰਗਟਨ, 13 ਨਵੰਬਰ (ਪੰਜਾਬ ਮੇਲ)- ਅਮਰੀਕਾ ਆਉਣ ਦੀ ਉਡੀਕ ਕਰ ਰਹੇ ਲੋਕਾਂ ਲਈ ਇਮੀਗ੍ਰੇਸ਼ਨ ਨਾਲ ਜੁੜੀ ਇੱਕ ਮਹੱਤਵਪੂਰਨ ਖ਼ਬਰ ਹੈ। ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਸਰਕਾਰ ਵੱਲੋਂ ਦੁਨੀਆ ਭਰ ਵਿੱਚ ਵੀਜ਼ਾ ਇੰਟਰਵਿਊ ਅਸਥਾਈ ਤੌਰ ’ਤੇ ਰੋਕਣ ਤੋਂ ਬਾਅਦ ਹੁਣ ਲੋਕਾਂ ਦੇ ਮਨਾਂ ਵਿੱਚ ਕਈ ਸਵਾਲ ਹਨ। ਸਭ ਤੋਂ ਵੱਡਾ ਸਵਾਲ ਇਹ ਹੈ ਕਿ ਕੀ ਭਾਰਤੀ ਨਾਗਰਿਕ ਅਜੇ ਵੀ ਅਮਰੀਕਾ ਦੇ ਵੀਜ਼ੇ ਲਈ ਅਪਲਾਈ ਕਰ ਸਕਦੇ ਹਨ?

ਇਸ ਦਾ ਜਵਾਬ ਹੈ, ਹਾਂ। ਭਾਰਤੀ ਨਾਗਰਿਕ ਅਮਰੀਕਾ ਦੇ ਵੱਖ-ਵੱਖ ਵੀਜ਼ਿਆਂ ਲਈ ਅਜੇ ਵੀ ਅਰਜ਼ੀਆਂ ਦੇ ਸਕਦੇ ਹਨ।

ਦਰਅਸਲ, 25 ਅਗਸਤ 2026 ਨੂੰ ਅਮਰੀਕੀ ਸਰਕਾਰ ਨੇ ਦੁਨੀਆ ਭਰ ਦੀਆਂ ਅਮਰੀਕੀ ਅੰਬੈਸੀਆਂ ਵਿੱਚ ਇਮੀਗ੍ਰੈਂਟ ਵੀਜ਼ਾ ਇੰਟਰਵਿਊ ਕੁਝ ਸਮੇਂ ਲਈ ਰੋਕਣ ਜਾਂ ਉਨ੍ਹਾਂ ਦੀਆਂ ਤਰੀਕਾਂ ਬਦਲਣ ਦੀ ਕਾਰਵਾਈ ਸ਼ੁਰੂ ਕੀਤੀ ਸੀ।

ਸਰਕਾਰ ਦਾ ਕਹਿਣਾ ਸੀ ਕਿ ਵੀਜ਼ਾ ਅਧਿਕਾਰੀਆਂ ਨੂੰ ਨਵੇਂ ਨਿਯਮਾਂ ਬਾਰੇ ਟ੍ਰੇਨਿੰਗ ਦੇਣੀ ਜ਼ਰੂਰੀ ਹੈ।

ਇਨ੍ਹਾਂ ਨਿਯਮਾਂ ਤਹਿਤ ਇਹ ਜਾਂਚ ਕੀਤੀ ਜਾਣੀ ਹੈ ਕਿ ਅਮਰੀਕਾ ਆਉਣ ਵਾਲਾ ਵਿਅਕਤੀ ਆਪਣੇ ਖ਼ਰਚੇ ਆਪ ਚੁੱਕ ਸਕਦਾ ਹੈ ਜਾਂ ਉਸ ਨੂੰ ਸਰਕਾਰੀ ਮਦਦ ਦੀ ਲੋੜ ਪੈ ਸਕਦੀ ਹੈ।

ਪਰ 10 ਸਤੰਬਰ ਨੂੰ ਅਮਰੀਕੀ ਵਿਦੇਸ਼ ਵਿਭਾਗ ਨੇ ਵੀਜ਼ਿਆਂ ਦੀ ਕਾਰਵਾਈ ਮੁੜ ਸ਼ੁਰੂ ਕਰਨ ਦੀਆਂ ਹਦਾਇਤਾਂ ਦਿੱਤੀਆਂ ਸਨ। ਇਸ ਦੇ ਬਾਵਜੂਦ ਕੁਝ ਥਾਵਾਂ ਉੱਤੇ ਇੰਟਰਵਿਊਆਂ ਵਿੱਚ ਦੇਰੀ ਹੋ ਸਕਦੀ ਹੈ।

ਹੁਣ ਗੱਲ ਕਰਦੇ ਹਾਂ ਭਾਰਤੀਆਂ ਦੀ।

ਭਾਰਤੀ ਨਾਗਰਿਕ ਘੁੰਮਣ ਜਾਂ ਰਿਸ਼ਤੇਦਾਰਾਂ ਨੂੰ ਮਿਲਣ ਲਈ B1/B2 ਵੀਜ਼ਾ, ਪੜ੍ਹਾਈ ਲਈ F-1 ਵੀਜ਼ਾ ਅਤੇ ਨੌਕਰੀ ਲਈ H-1B ਜਾਂ L-1 ਵੀਜ਼ਾ ਅਪਲਾਈ ਕਰ ਸਕਦੇ ਹਨ।

ਇਸੇ ਤਰ੍ਹਾਂ H-4 ਵੀਜ਼ਾ, ਪਰਿਵਾਰਕ ਗ੍ਰੀਨ ਕਾਰਡ ਅਤੇ ਨੌਕਰੀ ਰਾਹੀਂ ਗ੍ਰੀਨ ਕਾਰਡ ਦੀਆਂ ਯੋਗ ਸ਼੍ਰੇਣੀਆਂ ਵਿੱਚ ਵੀ ਅਰਜ਼ੀਆਂ ਦਿੱਤੀਆਂ ਜਾ ਸਕਦੀਆਂ ਹਨ।

ਟਰੰਪ ਸਰਕਾਰ ਨੇ ਪਹਿਲਾਂ 75 ਦੇਸ਼ਾਂ ਦੇ ਇਮੀਗ੍ਰੈਂਟ ਵੀਜ਼ਿਆਂ ਉੱਤੇ ਰੋਕ ਲਗਾਈ ਸੀ, ਪਰ ਅਗਸਤ ਵਿੱਚ ਅਦਾਲਤੀ ਹੁਕਮ ਤੋਂ ਬਾਅਦ ਇਹ ਰੋਕ ਹਟਾ ਦਿੱਤੀ ਗਈ ਸੀ। ਭਾਰਤ ਇਸ ਸੂਚੀ ਵਿੱਚ ਸ਼ਾਮਲ ਨਹੀਂ ਸੀ।

ਸਭ ਤੋਂ ਜ਼ਰੂਰੀ ਗੱਲ ਇਹ ਹੈ ਕਿ ਭਾਰਤੀਆਂ ਲਈ ਅਮਰੀਕਾ ਦੇ ਸਾਰੇ ਵੀਜ਼ੇ ਬੰਦ ਨਹੀਂ ਹੋਏ।

ਜਿਨ੍ਹਾਂ ਲੋਕਾਂ ਦੇ ਇੰਟਰਵਿਊ ਤੈਅ ਹਨ, ਉਹ ਆਪਣੀ ਅੰਬੈਸੀ ਤੋਂ ਤਰੀਕ ਦੀ ਪੁਸ਼ਟੀ ਜ਼ਰੂਰ ਕਰਨ। ਵੀਜ਼ਾ ਮਿਲਣਾ ਹਰ ਵਿਅਕਤੀ ਦੀ ਯੋਗਤਾ ਅਤੇ ਲਾਗੂ ਨਿਯਮਾਂ ਉੱਤੇ ਨਿਰਭਰ ਕਰਦਾ ਹੈ।