ਕੋਚ ਜੋਰਜ ਜੀਸਸ ਨਾਲ ਮਤਭੇਦਾਂ ਤੋਂ ਬਾਅਦ ਕੌਮੀ ਟੀਮ ਤੋਂ ਬਣਾਈ ਦੂਰੀ
ਲਿਸਬਨ (ਪੁਰਤਗਾਲ), 5 ਨਵੰਬਰ (ਪੰਜਾਬ ਮੇਲ)- ਦਿੱਗਜ ਫੁਟਬਾਲ ਖਿਡਾਰੀ ਕ੍ਰਿਸਟੀਆਨੋ ਰੋਨਾਲਡੋ ਨੇ ਵੀਰਵਾਰ ਨੂੰ ਕੌਮਾਂਤਰੀ ਫੁਟਬਾਲ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰਦਿਆਂ ਕਿਹਾ ਕਿ ਉਹ ਹੁਣ ਪੁਰਤਗਾਲ ਲਈ ਨਹੀਂ ਖੇਡਣਗੇ।
ਰੋਨਾਲਡੋ ਨੇ ਛੇ ਫੀਫਾ ਵਿਸ਼ਵ ਕੱਪਾਂ ਵਿਚ ਹਿੱਸਾ ਲਿਆ, ਯੂਰਪੀਅਨ ਚੈਂਪੀਅਨਸ਼ਿਪ ਦਾ ਖਿਤਾਬ ਜਿੱਤਿਆ ਅਤੇ ਕੌਮਾਂਤਰੀ ਫੁਟਬਾਲ ਵਿਚ ਸਭ ਤੋਂ ਵੱਧ ਗੋਲ ਕਰਨ ਦਾ ਪੁਰਸ਼ ਖਿਡਾਰੀਆਂ ਦਾ ਵਿਸ਼ਵ ਰਿਕਾਰਡ ਆਪਣੇ ਨਾਂ ਕੀਤਾ।
ਦੋ ਦਹਾਕਿਆਂ ਤੋਂ ਵੀ ਵੱਧ ਸਮਾਂ ਪਹਿਲਾਂ ਯੂਰੋ 2004 ਤੋਂ ਸ਼ੁਰੂ ਹੋਏ ਉਨ੍ਹਾਂ ਦੇ ਸ਼ਾਨਦਾਰ ਕਰੀਅਰ ਦਾ ਅੰਤ ਹਾਲਾਂਕਿ ਨਿਰਾਸ਼ਾਜਨਕ ਅੰਦਾਜ਼ ਵਿਚ ਹੋਇਆ। ਕੋਚ ਜੋਰਜ ਜੀਸਸ ਨਾਲ ਮਤਭੇਦਾਂ ਤੋਂ ਬਾਅਦ ਉਨ੍ਹਾਂ ਨੇ ਕੌਮੀ ਟੀਮ ਤੋਂ ਦੂਰੀ ਬਣਾ ਲਈ ਸੀ।
ਇਸ 41 ਸਾਲਾ ਮਹਾਨ ਖਿਡਾਰੀ ਨੇ ਸੋਸ਼ਲ ਮੀਡੀਆ ‘ਤੇ ਜਾਰੀ ਇੱਕ ਲੰਮੇ ਵੀਡੀਓ ਸੰਦੇਸ਼ ਵਿਚ ਕਿਹਾ, ”ਪੁਰਤਗਾਲ ਦੇ ਲੋਕੋ, ਉਹ ਦਿਨ ਆ ਗਿਆ ਹੈ, ਜਦੋਂ ਮੈਂ ਆਪਣੀ ਕੌਮੀ ਟੀਮ ਦੀ 7 ਨੰਬਰ ਜਰਸੀ ਵਾਪਸ ਸੌਂਪ ਰਿਹਾ ਹਾਂ।” ਉਨ੍ਹਾਂ ਕਿਹਾ, ”ਮੈਂ ਕਦੇ ਨਹੀਂ ਮੰਨਿਆ ਕਿ ਇਹ ਜਰਸੀ ਸਿਰਫ਼ ਮੇਰੀ ਸੀ, ਪਰ 23 ਸਾਲਾਂ ਤੱਕ ਇਸਨੂੰ ਪਹਿਨਣ, ਇਸਦੀ ਸ਼ਾਨ ਬਰਕਰਾਰ ਰੱਖਣ ਅਤੇ ਦੁਨੀਆਂ ਭਰ ਦੇ ਸਟੇਡੀਅਮਾਂ ਵਿਚ ਇਸਨੂੰ ਆਪਣੇ ਨਾਲ ਲੈ ਕੇ ਉਤਰਨ ਦਾ ਮਾਣ ਅਤੇ ਜ਼ਿੰਮੇਵਾਰੀ ਮੈਨੂੰ ਮਿਲੀ।”
ਉਨ੍ਹਾਂ ਕਿਹਾ, ”ਅੱਜ ਇਸਨੂੰ ਆਉਣ ਵਾਲੀ ਪੀੜ੍ਹੀ ਨੂੰ ਸੌਂਪਣ ਦਾ ਸਮਾਂ ਆ ਗਿਆ ਹੈ। ਇਹ ਫੈਸਲਾ ਲੈਣਾ ਆਸਾਨ ਨਹੀਂ ਸੀ, ਕਿਉਂਕਿ ਕੁਝ ਫੈਸਲੇ ਸਿਰਫ਼ ਦਿਮਾਗ ਨਾਲ ਨਹੀਂ ਲਏ ਜਾਂਦੇ, ਸਗੋਂ ਉਨ੍ਹਾਂ ਵਿਚ ਦਿਲ ਦੀ ਵੀ ਭੂਮਿਕਾ ਹੁੰਦੀ ਹੈ। ਅਗਸਤ 2003 ਵਿਚ ਸ਼ੁਰੂ ਹੋਇਆ ਸਫ਼ਰ, ਜਿਸਨੇ ਮੇਰੀ ਜ਼ਿੰਦਗੀ ਹਮੇਸ਼ਾ ਲਈ ਬਦਲ ਦਿੱਤੀ, ਹੁਣ ਸਮਾਪਤ ਹੋ ਗਿਆ ਹੈ।”
ਉਨ੍ਹਾਂ ਦੇ ਸਮਕਾਲੀ ਲਿਓਨਲ ਮੈਸੀ ਨੇ ਪਿਛਲੇ ਮਹੀਨੇ ਅਰਜਨਟੀਨਾ ਲਈ ਵਿਦਾਇਗੀ ਮੈਚ ਖੇਡਣ ਤੋਂ ਬਾਅਦ ਆਪਣਾ ਕੌਮਾਂਤਰੀ ਕਰੀਅਰ ਖਤਮ ਕੀਤਾ ਸੀ। ਰੋਨਾਲਡੋ ਦਾ ਪੁਰਤਗਾਲ ਲਈ ਆਖਰੀ ਮੁਕਾਬਲਾ 24 ਸਤੰਬਰ ਨੂੰ ਵੇਲਜ਼ ਖਿਲਾਫ ਰਿਹਾ। ਨੇਸ਼ਨਜ਼ ਲੀਗ ਦੇ ਇਸ ਮੈਚ ਵਿਚ ਪੁਰਤਗਾਲ ਨੇ 1-0 ਨਾਲ ਜਿੱਤ ਦਰਜ ਕੀਤੀ ਸੀ।
ਇਸ ਤੋਂ ਬਾਅਦ ਜੀਸਸ ਨੇ ਅਗਲੇ ਮੈਚ ਵਿਚ ਰੋਨਾਲਡੋ ਨੂੰ ਸ਼ੁਰੂਆਤੀ ਟੀਮ (ਪਲੇਇੰਗ ਇਲੈਵਨ) ਵਿਚ ਜਗ੍ਹਾ ਨਹੀਂ ਦਿੱਤੀ। ਉਨ੍ਹਾਂ ਇਹ ਵੀ ਕਿਹਾ ਕਿ ਅਗਲੇ ਮੁਕਾਬਲੇ ਵਿਚ ਵੀ ਰੋਨਾਲਡੋ ਨੂੰ ਸ਼ੁਰੂਆਤ ਤੋਂ ਖਿਡਾਉਣ ਦੀ ਉਨ੍ਹਾਂ ਦੀ ਕੋਈ ਯੋਜਨਾ ਨਹੀਂ ਹੈ। ਇਸ ਤੋਂ ਬਾਅਦ ਰੋਨਾਲਡੋ ਨੇ ਟੀਮ ਕੈਂਪ ਛੱਡਣ ਦਾ ਫੈਸਲਾ ਕੀਤਾ। ਜੀਸਸ ਨੇ ਹਾਲਾਂਕਿ ਬਾਅਦ ਵਿਚ ਕਿਹਾ ਸੀ ਕਿ ਰੋਨਾਲਡੋ ਦਾ ਟੀਮ ਵਿਚ ਵਾਪਸ ਆਉਣ ‘ਤੇ ਸਵਾਗਤ ਹੈ ਅਤੇ ਵਾਪਸੀ ਦਾ ਫੈਸਲਾ ਉਨ੍ਹਾਂ ਨੇ ਹੀ ਕਰਨਾ ਹੈ।