ਨਿਊਯਾਰਕ, 25 ਅਗਸਤ (ਰਾਜ ਗੋਗਨਾ/ਪੰਜਾਬ ਮੇਲ)- ਨਿਊਯਾਰਕ ਦੇ ਇਕ ਭਾਰਤੀ-ਗੁਜਰਾਤੀ ਵਿਅਕਤੀ ਰਾਮ ਪਟੇਲ ਨੂੰ ਯੂ ਵੀਜ਼ਾ ਧੋਖਾਧੜੀ ਦੇ ਅਦਾਲਤ ਵਲੋਂ ਇਸ ਮਾਮਲੇ ਵਿਚ ਸਜ਼ਾ ਸੁਣਾਈ ਗਈ ਹੈ
ਦਸੰਬਰ 2023 ਵਿਚ ਸਿਆਟਲ ਵਿਚ ਗ੍ਰਿਫ਼ਤਾਰ ਕੀਤੇ ਗਏ ਰਾਮ ਪਟੇਲ ‘ਤੇ ਇੱਕ ਪੰਜਾਬੀ ਨਾਲ ਮਿਲ ਕੇ ਅੱਠ ਨਕਲੀ ਡਕੈਤੀਆਂ ਨੂੰ ਅੰਜਾਮ ਦੇਣ ਦਾ ਦੋਸ਼ ਸੀ।
ਨਿਊਯਾਰਕ ਦੇ ਰਾਮ ਪਟੇਲ ਨਾਮ ਦੇ ਭਾਰਤੀ-ਗੁਜਰਾਤੀ ਵਿਅਕਤੀ ਨੂੰ ਬੋਸਟਨ ਦੀ ਇੱਕ ਸੰਘੀ ਅਦਾਲਤ ਨੇ ਯੂ ਵੀਜ਼ਾ ਲਈ ਨਕਲੀ ਹਥਿਆਰਬੰਦ ਡਕੈਤੀ ਕਰਨ ਦੇ ਦੋਸ਼ ਵਿਚ 20 ਮਹੀਨੇ ਅਤੇ ਅੱਠ ਦਿਨ ਦੀ ਕੈਦ ਅਤੇ 850,000 ਹਜ਼ਾਰ ਦੇ ਜੁਰਮਾਨੇ ਦਾ ਹੁਕਮ ਵੀ ਸੁਣਾਇਆ ਹੈ। 38 ਸਾਲਾ ਰਾਮ ਪਟੇਲ ਦੇ ਨਾਲ, ਬਲਵਿੰਦਰ ਸਿੰਘ ਨਾਮ ਦੇ ਇੱਕ ਪੰਜਾਬੀ ‘ਤੇ ਯੂ ਵੀਜ਼ਾ ਧੋਖਾਧੜੀ ਦਾ ਵੀ ਦੋਸ਼ ਵੀ ਲਗਾਇਆ ਗਿਆ ਸੀ। ਆਪਣੀ ਗ੍ਰਿਫਤਾਰੀ ਤੋਂ ਬਾਅਦ, ਰਾਮ ਪਟੇਲ ਨੇ ਹਾਲ ਹੀ ਵਿਚ ਮਈ 2025 ਵਿਚ ਆਪਣਾ ਅਪਰਾਧ ਅਦਾਲਤ ‘ਚ ਕਬੂਲ ਕੀਤਾ ਸੀ ਅਤੇ 20 ਅਗਸਤ ਨੂੰ ਉਸਨੂੰ ਸਜ਼ਾ ਸੁਣਾਈ ਗਈ ਸੀ। ਹਾਲਾਂਕਿ, ਕਿਉਂਕਿ ਰਾਮ ਪਟੇਲ ਸ਼ਾਇਦ ਆਪਣੀ ਸਜ਼ਾ ਤੋਂ ਵੱਧ ਸਮੇਂ ਲਈ ਜੇਲ੍ਹ ਵਿਚ ਰਿਹਾ ਹੈ, ਇਸ ਲਈ ਉਸਨੂੰ ਕਿਸੇ ਵੀ ਸਮੇਂ ਦੇਸ਼ ਨਿਕਾਲਾ ਦਿੱਤਾ ਜਾ ਸਕਦਾ ਹੈ। ਰਾਮ ਪਟੇਲ ਨੂੰ 13 ਦਸੰਬਰ, 2023 ਨੂੰ ਸਿਆਟਲ, ਵਾਸ਼ਿੰਗਟਨ ਤੋਂ ਗ੍ਰਿਫਤਾਰ ਕੀਤਾ ਗਿਆ ਸੀ। ਨਿਆਂ ਵਿਭਾਗ ਅਨੁਸਾਰ, ਗੁਜਰਾਤੀ ਰਾਮ ਪਟੇਲ ਅਤੇ ਬਲਵਿੰਦਰ ਸਿੰਘ ਪੰਜਾਬੀ ਮਾਰਚ 2023 ਤੋਂ ਜਾਅਲੀ ਡਕੈਤੀਆਂ ਕਰਨ ਦੇ ਕਾਰੋਬਾਰ ਵਿਚ ਸਨ। ਪੁਲਿਸ ਦੇ ਧਿਆਨ ਵਿਚ ਆਇਆ ਸੀ ਕਿ ਉਨ੍ਹਾਂ ਨੇ ਸੰਯੁਕਤ ਰਾਜ ਅਮਰੀਕਾ ਵਿਚ ਅੱਠ ਜਾਅਲੀ ਡਕੈਤੀਆਂ ਕੀਤੀਆਂ ਹਨ, ਜਿਨ੍ਹਾਂ ਵਿਚੋਂ ਚਾਰ ਇਕੱਲੇ ਮੈਸੇਚਿਉਸੇਟਸ ਸਟੇਟ ਵਿਚ ਹੋਈਆਂ ਸਨ। ਇਨ੍ਹਾਂ ਡਕੈਤੀਆਂ ਦਾ ਉਦੇਸ਼, ਜੋ ਕਿ ਸੁਵਿਧਾ ਅਤੇ ਸ਼ਰਾਬ ਦੀਆਂ ਦੁਕਾਨਾਂ ਦੇ ਨਾਲ-ਨਾਲ ਰੈਸਟੋਰੈਂਟਾਂ ਵਿਚ ਹੋਈਆਂ ਸਨ, ਸਿਰਫ਼ ਯੂ ਵੀਜ਼ਾ ਪ੍ਰਾਪਤ ਕਰਨਾ ਸੀ।
ਰਾਮ ਪਟੇਲ ਜਿਸ ਫਰਜ਼ੀ ਡਕੈਤੀ ਨੂੰ ਅੰਜਾਮ ਦੇ ਰਿਹਾ ਸੀ, ਉਸ ਵਿਚ ਨਕਲੀ ਲੁਟੇਰੇ ਸਟੋਰ ਵਿਚ ਕੰਮ ਕਰਨ ਵਾਲੇ ਇੱਕ ਵਿਅਕਤੀ ਨੂੰ ਹਥਿਆਰ ਦਿਖਾਉਂਦੇ ਸਨ ਅਤੇ ਕੈਸ਼ ਰਜਿਸਟਰ ਲੁੱਟਣ ਤੋਂ ਬਾਅਦ ਭੱਜ ਜਾਂਦੇ ਸਨ, ਅਤੇ ਫਿਰ ਲਗਭਗ ਪੰਜ ਮਿੰਟਾਂ ਬਾਅਦ, ਨਕਲੀ ਡਕੈਤੀ ਦਾ ਨਕਲੀ ਪੀੜਤ 911 ‘ਤੇ ਪੁਲਿਸ ਨੂੰ ਕਾਲ ਕਰਦਾ ਸੀ ਅਤੇ ਡਕੈਤੀ ਦੀ ਰਿਪੋਰਟ ਕਰਦਾ ਸੀ। ਰਾਮ ਪਟੇਲ ਵੱਲੋਂ ਆਪਣਾ ਜੁਰਮ ਕਬੂਲ ਕਰਨ ਤੋਂ ਪਹਿਲਾਂ, ਉਸਦੇ ਸਾਥੀ ਬਲਵਿੰਦਰ ਸਿੰਘ ਪੰਜਾਬੀ ਨੇ ਵੀ 22 ਮਈ, 2025 ਨੂੰ ਜੁਰਮ ਕਬੂਲ ਕਰ ਲਿਆ ਸੀ ਅਤੇ ਉਸਦੀ ਸਜ਼ਾ ਹੁਣ 11 ਸਤੰਬਰ, 2025 ਨੂੰ ਐਲਾਨੀ ਜਾਣੀ ਹੈ।