ਨਵੀਂ ਦਿੱਲੀ, 30 ਜਨਵਰੀ (ਪੰਜਾਬ ਮੇਲ)-ਚੋਣ ਕਮਿਸ਼ਨ ਨੂੰ ਦਿੱਤੇ ਅੰਕੜਿਆਂ ਅਨੁਸਾਰ ਦੁਨੀਆਂ ਦੀ ਸਭ ਤੋਂ ਵੱਡੀ ਰਾਜਨੀਤਿਕ ਪਾਰਟੀ ਹੋਣ ਦਾ ਦਾਅਵਾ ਕਰਨ ਵਾਲੀ ਭਾਜਪਾ ਕੋਲ 31 ਮਾਰਚ 2024 ਤੱਕ ਮੁੱਖ ਵਿਰੋਧੀ ਕਾਂਗਰਸ ਦੇ 857.15 ਕਰੋੜ ਰੁਪਏ ਦੇ ਮੁਕਾਬਲੇ 7113.80 ਕਰੋੜ ਰੁਪਏ ਦੀ ਭਾਰੀ ਨਕਦੀ ਤੇ ਬੈਂਕ ਬਕਾਇਆ ਹੈ। 2023-24 ਦੌਰਾਨ ਜਦੋਂ ਲੋਕ ਸਭਾ ਚੋਣਾਂ ਦਾ ਐਲਾਨ ਹੋਇਆ ਤਾਂ ਭਾਜਪਾ ਨੇ 1754.06 ਕਰੋੜ ਰੁਪਏ ਖਰਚ ਕੀਤੇ, ਜੋ ਕਿ 2022-23 ‘ਚ ਖਰਚ ਕੀਤੇ ਗਏ 1092 ਕਰੋੜ ਰੁਪਏ ਨਾਲੋਂ 60 ਫੀਸਦੀ ਵੱਧ ਹੈ। ਇਸ ਦੇ ਮੁਕਾਬਲੇ ਕਾਂਗਰਸ ਨੇ 2023-24 ਦੌਰਾਨ 619.67 ਕਰੋੜ ਰੁਪਏ ਖਰਚ ਕੀਤੇ, ਜੋ ਕਿ 2022-23 ‘ਚ 192.56 ਕਰੋੜ ਰੁਪਏ ਸੀ। ਲੋਕ ਸਭਾ ਚੋਣਾਂ ਦਾ ਐਲਾਨ 16 ਮਾਰਚ 2024 ਨੂੰ ਕੀਤਾ ਗਿਆ ਸੀ। ਚੋਣ ਕਮਿਸ਼ਨ ਨੂੰ ਉਨ੍ਹਾਂ ਦੀਆਂ ਸਾਲਾਨਾ ਆਡਿਟ ਰਿਪੋਰਟਾਂ ‘ਚ ਦਿੱਤੇ ਗਏ ਅੰਕੜਿਆਂ ਅਨੁਸਾਰ ਭਾਜਪਾ ਨੇ ਪਿਛਲੇ ਸਾਲ 1294.15 ਕਰੋੜ ਰੁਪਏ ਦੇ ਮੁਕਾਬਲੇ 2023-24 ਦੌਰਾਨ ਹੁਣ ਪਾਬੰਦੀਸ਼ੁਦਾ ਚੋਣ ਬਾਂਡਾਂ ਰਾਹੀਂ 1685.69 ਕਰੋੜ ਰੁਪਏ ਦੇ ਸਵੈ-ਇੱਛਤ ਯੋਗਦਾਨ ਪ੍ਰਾਪਤ ਕੀਤੇ ਹਨ। ਸੱਤਾਧਾਰੀ ਪਾਰਟੀ ਨੇ ਪਿਛਲੇ ਸਾਲ 2022-23 ‘ਚ 648.42 ਕਰੋੜ ਰੁਪਏ ਦੇ ਮੁਕਾਬਲੇ ਇਸ ਸਾਲ ਦੌਰਾਨ 2042.75 ਕਰੋੜ ਰੁਪਏ ਦੇ ਹੋਰ ਯੋਗਦਾਨ ਵੀ ਦਿਖਾਏ ਹਨ। ਚੋਣ ਕਮਿਸ਼ਨ ਨੂੰ ਦਿੱਤੀ ਆਪਣੀ ਆਡਿਟ ਰਿਪੋਰਟ ‘ਚ ਕਾਂਗਰਸ ਨੇ 2023-24 ਦੌਰਾਨ ਕੁੱਲ 1225.11 ਕਰੋੜ ਰੁਪਏ ਦੇ ਯੋਗਦਾਨ ਪ੍ਰਾਪਤ ਕੀਤੇ ਹਨ, ਜਿਸ ਵਿਚ ਗ੍ਰਾਂਟਾਂ, ਦਾਨ ਤੇ ਯੋਗਦਾਨਾਂ ਰਾਹੀਂ 1129.67 ਕਰੋੜ ਰੁਪਏ ਸ਼ਾਮਲ ਹਨ। ਇਸ ‘ਚ 31 ਮਾਰਚ 2024 ਨੂੰ ਖਤਮ ਹੋਏ ਵਿੱਤੀ ਸਾਲ ਦੌਰਾਨ ਇਲੈਕਟ੍ਰਾਨਿਕ ਬਾਂਡਾਂ, ਜਿਨ੍ਹਾਂ ‘ਤੇ ਹੁਣ ਸੁਪਰੀਮ ਕੋਰਟ ਨੇ ਪਾਬੰਦੀ ਲਗਾ ਦਿੱਤੀ ਹੈ, ਰਾਹੀਂ ਪ੍ਰਾਪਤ ਹੋਏ 828.36 ਕਰੋੜ ਰੁਪਏ ਵੀ ਸ਼ਾਮਲ ਹਨ। ਸਾਲ ਦੌਰਾਨ ਭਾਜਪਾ ਨੇ ਇਸ਼ਤਿਹਾਰਾਂ ‘ਚ 591 ਕਰੋੜ ਰੁਪਏ ਖਰਚ ਕੀਤੇ, ਜਿਸ ‘ਚ ਇਲੈਕਟ੍ਰਾਨਿਕ ਮੀਡੀਆ ‘ਚ 434.84 ਕਰੋੜ ਰੁਪਏ ਤੇ ਛਪੀ ਸਮੱਗਰੀ ‘ਚ 115.62 ਕਰੋੜ ਰੁਪਏ ਸ਼ਾਮਲ ਹਨ। ਸੱਤਾਧਾਰੀ ਪਾਰਟੀ ਨੇ 2023-24 ਦੌਰਾਨ ਜਹਾਜ਼ਾਂ/ਹੈਲੀਕਾਪਟਰਾਂ ‘ਤੇ 174 ਕਰੋੜ ਰੁਪਏ ਖਰਚ ਕੀਤੇ, ਜਦਕਿ 2022-23 ‘ਚ ਇਹ ਰਕਮ 78.23 ਕਰੋੜ ਰੁਪਏ ਸੀ ਤੇ ਇਸ ਸਾਲ ਦੌਰਾਨ ਆਪਣੇ ਉਮੀਦਵਾਰਾਂ ਨੂੰ 191.06 ਕਰੋੜ ਰੁਪਏ ਦੀ ਵਿੱਤੀ ਸਹਾਇਤਾ ਦਿੱਤੀ, ਜਦਕਿ ਪਿਛਲੇ ਸਾਲ ਇਹ ਰਕਮ 75.5 ਕਰੋੜ ਰੁਪਏ ਸੀ।