ਸਾਨ ਫਰਾਂਸਿਸਕੋ, 31 ਅਕਤੂਬਰ (ਪੰਜਾਬ ਮੇਲ)- ਅਮਰੀਕੀ ਰਾਸ਼ਟਰਪਤੀ ਚੋਣਾਂ ‘ਚ ਕੁਝ ਹੀ ਦਿਨ ਬਾਕੀ ਹਨ ਅਤੇ ਡੈਮੋਕਰੇਟ ਕਮਲਾ ਹੈਰਿਸ ਨੇ ਆਪਣੇ ਵਿਰੋਧੀ ਰਿਪਬਲਿਕਨ ਡੋਨਾਲਡ ਟਰੰਪ ‘ਤੇ ਤਿੱਖਾ ਹਮਲਾ ਕੀਤਾ ਹੈ। ਹੈਰਿਸ ਨੇ ਟਰੰਪ ਨੂੰ ਅਸਥਿਰ ਮਾਨਸਿਕਤਾ ਤੋਂ ਪੀੜਤ, ਬਦਲਾ ਲੈਣ ਲਈ ਉਤਾਵਲੇ ਅਤੇ ਬੇਰੋਕ ਸੱਤਾ ਹਾਸਲ ਕਰਨ ਦਾ ਸੁਪਨਾ ਦੇਖਣ ਵਾਲਾ ਵਿਅਕਤੀ ਦੱਸਿਆ।

ਕਮਲਾ ਹੈਰਿਸ ਨੇ ਵਾਸ਼ਿੰਗਟਨ ‘ਚ ਆਪਣੀ ਸਭ ਤੋਂ ਵੱਡੀ ਰੈਲੀ ‘ਚ ਟਰੰਪ ‘ਤੇ ਇਹ ਤਿੱਖਾ ਹਮਲਾ ਕੀਤਾ। ਹੈਰਿਸ ਨੇ ਮੰਗਲਵਾਰ ਸ਼ਾਮ ਨੂੰ ਵ੍ਹਾਈਟ ਹਾਊਸ ਦੇ ਨੇੜੇ ਉਸ ਸਥਾਨ ‘ਤੇ 75,000 ਤੋਂ ਵੱਧ ਲੋਕਾਂ ਦੀ ਰੈਲੀ ਨੂੰ ਸੰਬੋਧਿਤ ਕੀਤਾ ਜਿੱਥੇ 6 ਜਨਵਰੀ, 2021 ਨੂੰ ਯੂਐਸ ਕੈਪੀਟਲ ‘ਤੇ ਹਮਲੇ ਤੋਂ ਪਹਿਲਾਂ ਟਰੰਪ ਨੇ ਆਪਣੇ ਸਮਰਥਕਾਂ ਨੂੰ ਸੰਬੋਧਿਤ ਕੀਤਾ ਸੀ।

ਕਮਲਾ ਹੈਰਿਸ ਨੇ ਰੈਲੀ ਵਿਚ ਹਾਜ਼ਰ ਲੋਕਾਂ ਨੂੰ ਕਿਹਾ ਕਿ ਅਸੀਂ ਸਾਰੇ ਜਾਣਦੇ ਹਾਂ ਕਿ ਡੋਨਾਲਡ ਟਰੰਪ ਕੌਣ ਹੈ। ਇਹ ਉਹੀ ਵਿਅਕਤੀ ਹੈ ਜਿਸ ਨੇ 2020 ਦੀਆਂ ਰਾਸ਼ਟਰਪਤੀ ਚੋਣਾਂ ਵਿੱਚ ਆਪਣੀ ਹਾਰ ਨੂੰ ਉਲਟਾਉਣ ਦੀ ਕੋਸ਼ਿਸ਼ ਵਿੱਚ ਯੂਐਸ ਕੈਪੀਟਲ ਵਿੱਚ ਇੱਕ ‘ਹਥਿਆਰਬੰਦ ਭੀੜ’ ਭੇਜੀ ਸੀ।

ਹੈਰਿਸ ਨੇ ਅੱਗੇ ਕਿਹਾ ਕਿ ਇਹ ਵਿਅਕਤੀ ਇੱਕ ਅਸਥਿਰ ਮਾਨਸਿਕਤਾ ਵਾਲਾ ਹੈ, ਉਹ ਬਦਲਾ ਲੈਣ ਦਾ ਜਨੂੰਨ ਹੈ, ਉਹ ਹਰ ਸਮੇਂ ਸ਼ਿਕਾਇਤਾਂ ਕਰਦਾ ਰਹਿੰਦਾ ਹੈ ਅਤੇ ਸਭ ਤੋਂ ਵੱਧ ਉਹ ਬੇਕਾਬੂ ਸ਼ਕਤੀ ਹਾਸਲ ਕਰਨ ਦੀ ਪੂਰੀ ਕੋਸ਼ਿਸ਼ ਕਰਦਾ ਹੈ।

ਸਟੇਜ ‘ਤੇ ਅਮਰੀਕੀ ਝੰਡਿਆਂ ਅਤੇ ਨੀਲੇ-ਚਿੱਟੇ ਬੈਨਰਾਂ ਨਾਲ ਘਿਰੇ ਹੋਏ, ਹੈਰਿਸ ਨੇ ਉਤਸ਼ਾਹੀ ਭੀੜ ਨੂੰ ਸੰਬੋਧਨ ਕੀਤਾ। ਰੈਲੀ ਵਿੱਚ ਬਜ਼ੁਰਗਾਂ ਤੋਂ ਇਲਾਵਾ ਕਾਲਜ ਦੇ ਵਿਦਿਆਰਥੀਆਂ, ਵਿਦੇਸ਼ੀ ਨਾਗਰਿਕਾਂ, ਨਿਊਯਾਰਕ ਅਤੇ ਵਰਜੀਨੀਆ ਆਦਿ ਦੇ ਲੋਕਾਂ ਨੇ ਸ਼ਮੂਲੀਅਤ ਕੀਤੀ। ਕਈ ਔਰਤਾਂ ਆਪਣੀਆਂ ਮਹਿਲਾ ਦੋਸਤਾਂ ਨਾਲ ਗਰੁੱਪਾਂ ਵਿੱਚ ਆਈਆਂ।