ਹੈਮਿਲਟਨ, 26 ਜੂਨ (ਪੰਜਾਬ ਮੇਲ)- ਹੈਮਿਲਟਨ ਦੀ ਸ਼ਾਲਿਨੀ ਸਿੰਘ ਦੇ ਕਾਮਨ-ਲਾਅ ਪਾਰਟਨਰ ‘ਤੇ ਹੁਣ ਸੈਕਿੰਡ ਡਿਗਰੀ ਦੇ ਕਤਲ ਦਾ ਦੋਸ਼ ਲਾਇਆ ਗਿਆ ਹੈ। ਸੋਮਵਾਰ ਨੂੰ ਇਕ ਨਿਊਜ਼ ਕਾਨਫਰੰਸ ਵਿਚ ਡਿਟੈਕਟ-ਸਾਰਜੈਂਟ ਡੈਰਿਲ ਰੀਡ ਨੇ ਕਿਹਾ ਕਿ ਜਾਂਚਕਰਤਾਵਾਂ ਨੂੰ ਲੈਂਡਫਿਲ ਸਾਈਟ ‘ਤੇ ਮਿਲੇ ਅਵਸ਼ੇਸ਼ਾਂ ਦੀ ਜਾਂਚ ਦੇ ਸ਼ੁੱਕਰਵਾਰ ਨੂੰ ਡੀ.ਐੱਨ.ਏ. ਵਿਸ਼ਲੇਸ਼ਣ ਦੇ ਨਤੀਜੇ ਮਿਲੇ ਹਨ, ਜਿਸ ਤੋਂ ਪੁਸ਼ਟੀ ਹੁੰਦੀ ਹੈ ਕਿ ਪਿਛਲੇ ਮਹੀਨੇ ਮਿਲੇ ਅੰਸ਼ਕ ਮਨੁੱਖੀ ਅਵਸ਼ੇਸ਼ 40 ਸਾਲਾ ਲਾਪਤਾ ਔਰਤ ਦੇ ਹਨ, ਜੋ ਪਿਛਲੇ ਸਾਲ ਦਸੰਬਰ ਵਿਚ ਲਾਪਤਾ ਹੋ ਗਈ ਸੀ।
ਰੀਡ ਨੇ ਕਿਹਾ ਕਿ ਸ਼ਾਲਿਨੀ ਸਿੰਘ ਦੇ ਕਾਮਨ-ਲਾਅ ਪਾਰਟਨਰ, 42 ਸਾਲਾ ਬਰਲਿੰਗਟਨ ਨਿਵਾਸੀ ਜੈਫਰੀ ਸਮਿਥ ਨੂੰ ਸ਼ੁੱਕਰਵਾਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਸੀ। ਸਮਿਥ ‘ਤੇ ਸੈਕਿੰਡ ਡਿਗਰੀ ਦਰਜੇ ਦੇ ਕਤਲ ਅਤੇ ਮਨੁੱਖੀ ਅਵਸ਼ੇਸ਼ਾਂ ਦਾ ਅਪਮਾਨ ਕਰਨ ਦਾ ਦੋਸ਼ ਲਾਇਆ ਗਿਆ ਹੈ। ਸ਼ਾਲਿਨੀ ਸਿੰਘ ਨੂੰ ਆਖਰੀ ਵਾਰ 4 ਦਸੰਬਰ ਨੂੰ ਸ਼ਾਮ ਕਰੀਬ 7:10 ਵਜੇ ਸੁਣਿਆ ਗਿਆ ਸੀ। ਉਸਦੇ ਪਰਿਵਾਰ ਵੱਲੋਂ 10 ਦਸੰਬਰ ਨੂੰ ਲਾਪਤਾ ਹੋਣ ਦੀ ਰਿਪੋਰਟ ਦਿੱਤੀ ਗਈ ਸੀ। ਜਾਂਚ ਦੇ ਸ਼ੁਰੂਆਤੀ ਦਿਨਾਂ ਵਿਚ, ਪੁਲਿਸ ਸ਼ੁਰੂ ਵਿਚ ਸ਼ਾਲਿਨੀ ਸਿੰਘ ਅਤੇ ਉਸਦੇ ਕਾਮਨ-ਲਾਅ ਸਾਥੀ ਦੋਵਾਂ ਦੀ ਭਾਲ ਕਰ ਰਹੀ ਸੀ, ਪਰ ਉਸ ਦਾ ਸਾਥੀ 11 ਦਸੰਬਰ ਨੂੰ ਲੱਭ ਲਿਆ ਗਿਆ। ਹੈਮਿਲਟਨ ਤੋਂ ਬਾਹਰ ਇਕ ਪਰਿਵਾਰਕ ਮੈਂਬਰ ਨੂੰ ਮਿਲਣ ਗਿਆ ਸੀ। ਪੁਲਿਸ ਨੇ ਕੇਸ ਨੂੰ ਕਤਲ ਯੂਨਿਟ ਨੂੰ ਸੌਂਪ ਦਿੱਤਾ ਸੀ।
ਰੀਡ ਨੇ ਪਿਛਲੇ ਮਹੀਨੇ ਪੱਤਰਕਾਰਾਂ ਨੂੰ ਦੱਸਿਆ ਸੀ ਕਿ ਸਿੰਘ ਦੀ ਇਮਾਰਤ ਤੋਂ ਸੀ.ਸੀ.ਟੀ.ਵੀ. ਫੁਟੇਜ ਤੋਂ ਪਤਾ ਚੱਲਦਾ ਹੈ ਕਿ ਉਹ ਆਪਣੀ ਯੂਨਿਟ ਵਿਚ ਵਾਪਸ ਆ ਗਈ ਸੀ ਪਰ ਉਸਨੂੰ ਦੁਬਾਰਾ ਕਦੇ ਵੀ ਇਮਾਰਤ ਤੋਂ ਬਾਹਰ ਨਿਕਲਦੇ ਨਹੀਂ ਦੇਖਿਆ ਗਿਆ। ਪੁਲਿਸ ਦਾ ਮੰਨਣਾ ਹੈ ਕਿ ਉਸ ਦੀ ਹੱਤਿਆ 4 ਦਸੰਬਰ ਦੀ ਸ਼ਾਮ ਅਤੇ 5 ਦਸੰਬਰ ਦੀ ਸਵੇਰ ਦੇ ਵਿਚਕਾਰ ਕਿਸੇ ਸਮੇਂ ਕੀਤੀ ਗਈ ਸੀ। ਜੀ.ਪੀ.ਐੱਸ. ਡਾਟਾ ਦੀ ਵਰਤੋਂ ਕਰਦੇ ਹੋਏ ਜਾਂਚਕਰਤਾਵਾਂ ਨੇ ਕਿਹਾ ਕਿ ਉਹ ਸ਼ਾਲਿਨੀ ਸਿੰਘ ਦੀ ਲਾਸ਼ ਦੀ ਭਾਲ ਲਈ ਲੈਂਡਫਿਲ ਸਾਈਟ ਦੀ ਸਥਿਤੀ ਦਾ ਪਤਾ ਲਗਾਉਣ ਤੋਂ ਬਾਅਦ ਫਰਵਰੀ ਵਿਚ ਇਕ ਰਸਮੀ ਖੋਜ ਸ਼ੁਰੂ ਕੀਤੀ ਗਈ ਸੀ। ਰੀਡ ਨੇ ਕਿਹਾ ਕਿ ਸਿੰਘ ਦੇ ਪਰਿਵਾਰ ਨੂੰ ਮਾਮਲੇ ਬਾਰੇ ਸੂਚਿਤ ਕੀਤਾ ਜਾ ਰਿਹਾ ਹੈ।