ਨਵੀਂ ਦਿੱਲੀ, 10 ਅਕਤੂਬਰ (ਪੰਜਾਬ ਮੇਲ)- ਹਰ ਸਾਲ ਧੁੱਪ ਨਿਕਲਣ ਦਾ ਸਮਾਂ ਘਟਦਾ ਜਾ ਰਿਹਾ ਹੈ। ਇਹ ਖੁਲਾਸਾ 30 ਸਾਲਾਂ ਦੀ ਖੋਜ ‘ਤੇ ਆਧਾਰਿਤ ਰਿਪੋਰਟ ਵਿਚ ਕੀਤਾ ਗਿਆ ਹੈ। 1988 ਤੋਂ 2018 ਦੇ ਰੁਝਾਨਾਂ ਦੇ ਅਧਿਐਨ ਅਨੁਸਾਰ, ਭਾਰਤ ਦੇ ਜ਼ਿਆਦਾਤਰ ਹਿੱਸਿਆਂ ਵਿਚ ਹਰ ਸਾਲ ਧੁੱਪ ਦੇ ਘੰਟੇ ਘੱਟ ਹੋ ਸਕਦੇ ਹਨ। ਧੁੱਪ ਘਟਣ ਦਾ ਸਭ ਤੋਂ ਵੱਧ ਅਸਰ ਹਿਮਾਲਿਆ ਖੇਤਰ ਤੇ ਪੱਛਮੀ ਤੱਟ ‘ਤੇ ਦਿਖਾਈ ਦੇ ਰਿਹਾ ਹੈ। ਬਨਾਰਸ ਹਿੰਦੂ ਯੂਨੀਵਰਸਿਟੀ, ਇੰਡੀਅਨ ਇੰਸਟੀਚਿਊਟ ਆਫ ਟਰੌਪੀਕਲ ਮੈਟਰੋਲੋਜੀ ਅਤੇ ਭਾਰਤੀ ਮੌਸਮ ਵਿਗਿਆਨ ਵਿਭਾਗ (ਆਈ.ਐੱਮ.ਡੀ.) ਦੇ ਖੋਜੀਆਂ ਨੇ ਨਵੇਂ ਅਧਿਐਨ ਵਿਚ ਪਾਇਆ ਕਿ ਪਿਛਲੇ ਤਿੰਨ ਦਹਾਕਿਆਂ ਦੌਰਾਨ ਹਿਮਾਲਿਆ ਖੇਤਰ ‘ਚ ਔਸਤ ਹਰ ਸਾਲ ਲਗਪਗ 9.5 ਘੰਟੇ ਧੁੱਪ ਘੱਟ ਗਈ, ਜਦਕਿ ਪੱਛਮੀ ਤੱਟ ‘ਤੇ ਹਰ ਸਾਲ 8.5 ਘੰਟੇ ਤੋਂ ਵੱਧ ਧੁੱਪ ਘਟੀ ਹੈ।
‘ਸਾਇੰਟਿਫਿਕ ਰਿਪੋਰਟਸ’ ਜਰਨਲ ਵਿਚ ਪ੍ਰਕਾਸ਼ਤ ਇਸ ਅਧਿਐਨ ਵਿਚ 1988 ਤੋਂ 2018 ਦਰਮਿਆਨ ਨੌਂ ਖੇਤਰਾਂ ਦੇ 20 ਤੋਂ ਵੱਧ ਮੌਸਮ ਕੇਂਦਰਾਂ ਤੋਂ ਇਕੱਤਰ ਅੰਕੜਿਆਂ ਦੀ ਜਾਂਚ ਕੀਤੀ ਗਈ। ਇਸ ਵਿਚ ਸਾਹਮਣੇ ਆਇਆ ਕਿ ਪਿਛਲੇ 30 ਸਾਲਾਂ ਦੌਰਾਨ ਦੱਖਣੀ ਪਠਾਰ ਦੇ ਖੇਤਰਾਂ ਵਿਚ ਹਰ ਸਾਲ ਤਿੰਨ ਘੰਟੇ ਘੱਟ ਧੁੱਪ ਨਿਕਲੀ, ਜਦੋਂਕਿ ਉੱਤਰ-ਪੂਰਬੀ ਖੇਤਰ ਵਿਚ ਹਰ ਸਾਲ ਲਗਪਗ ਡੇਢ ਘੰਟੇ ਘੱਟ ਧੁੱਪ ਮਿਲੀ ਹੈ।
ਹਾਲਾਂਕਿ, ਟੀਮ ਨੇ ਕਿਹਾ ਕਿ ਅਕਤੂਬਰ ਤੋਂ ਮਈ ਦੌਰਾਨ ਇੱਕ ਮਹੀਨੇ ਵਿਚ ਧੁੱਪ ਦੇ ਘੰਟੇ ਵਧੇ ਹਨ, ਇਸ ਮਗਰੋਂ ਜੂਨ-ਜੁਲਾਈ ਦੌਰਾਨ 6 ਖੇਤਰਾਂ ਵਿਚ ਧੁੱਪ ਨਿਕਲਣ ਵਿਚ ਮਹੱਤਵਪੂਰਨ ਕਮੀ ਆਈ ਹੈ।