ਬਰਨ, 3 ਅਪ੍ਰੈਲ (ਪੰਜਾਬ ਮੇਲ)- ਸਵਿਟਜ਼ਰਲੈਂਡ ਨੇ ਆਪਣੇ ਸ਼ਰਨ ਕਾਨੂੰਨਾਂ ਵਿੱਚ ਵੱਡੀ ਤਬਦੀਲੀ ਕਰਦਿਆਂ 100 ਤੋਂ ਵੱਧ ਯੂਕਰੇਨੀ ਨਾਗਰਿਕਾਂ ਨੂੰ ਦੇਸ਼ ਵਿਚੋਂ ਕੱਢ ਦਿੱਤਾ ਹੈ। ਸਵਿਸ ਪ੍ਰਵਾਸ ਰਾਜ ਸਕੱਤਰੇਤ (ਐੱਸ.ਈ.ਐੱਮ.) ਅਨੁਸਾਰ ਇਹ ਕਾਰਵਾਈ ਪਿਛਲੇ ਪੰਜ ਮਹੀਨਿਆਂ ਦੌਰਾਨ ਸਖ਼ਤ ਕੀਤੇ ਗਏ ਨਿਯਮਾਂ ਤਹਿਤ ਕੀਤੀ ਗਈ ਹੈ। ਨਵੇਂ ਨਿਯਮਾਂ ਅਨੁਸਾਰ 1 ਨਵੰਬਰ ਤੋਂ ਪੱਛਮੀ ਯੂਕਰੇਨ ਦੇ ਸੱਤ ਖੇਤਰਾਂ ਤੋਂ ਆਉਣ ਵਾਲੇ ਲੋਕ ਹੁਣ ਸਵਿਟਜ਼ਰਲੈਂਡ ਵਿਚ ‘ਪ੍ਰੋਟੈਕਸ਼ਨ ਸਟੇਟਸ ਐੱਸ’ ਲਈ ਯੋਗ ਨਹੀਂ ਰਹੇ ਹਨ। ਏਜੰਸੀ ਨੇ ਦੱਸਿਆ ਕਿ ਇਸੇ ਨਵੇਂ ਨਿਯਮ ਦੇ ਆਧਾਰ ‘ਤੇ ਫਰਵਰੀ ਦੇ ਅੰਤ ਤੱਕ 104 ਲੋਕਾਂ ਨੂੰ ਵਾਪਸ ਯੂਕਰੇਨ ਭੇਜ ਦਿੱਤਾ ਗਿਆ ਹੈ।
ਸਵਿਟਜ਼ਰਲੈਂਡ ਦੀ ਸੰਘੀ ਸਭਾ ਨੇ ਅਕਤੂਬਰ 2025 ਵਿਚ ਇੱਕ ਸਮਝੌਤਾ ਕੀਤਾ ਸੀ, ਜਿਸ ਤਹਿਤ ਅਸਥਾਈ ਸੁਰੱਖਿਆ ਸਿਰਫ਼ ਉਨ੍ਹਾਂ ਲੋਕਾਂ ਨੂੰ ਦਿੱਤੀ ਜਾਵੇਗੀ, ਜਿਨ੍ਹਾਂ ਦਾ ਪੱਕਾ ਘਰ ਯੂਕਰੇਨ ਦੇ ਅਜਿਹੇ ਇਲਾਕਿਆਂ ਵਿਚ ਹੈ, ਜੋ ਸਿੱਧੇ ਤੌਰ ‘ਤੇ ਜੰਗ ਦੇ ਮੈਦਾਨ ਬਣੇ ਹੋਏ ਹਨ। ਕਿਉਂਕਿ ਪੱਛਮੀ ਯੂਕਰੇਨ ਦੇ ਕੁਝ ਹਿੱਸੇ ਮੁਕਾਬਲਤਨ ਸੁਰੱਖਿਅਤ ਮੰਨੇ ਜਾਂਦੇ ਹਨ, ਇਸ ਲਈ ਉੱਥੋਂ ਦੇ ਵਸਨੀਕਾਂ ‘ਤੇ ਹੁਣ ਇਹ ਸਖ਼ਤੀ ਦਿਖਾਈ ਜਾ ਰਹੀ ਹੈ।
ਹਾਲਾਂਕਿ ਸਵਿਟਜ਼ਰਲੈਂਡ ਵੱਲੋਂ ਕੁਝ ਲੋਕਾਂ ਨੂੰ ਕੱਢਿਆ ਜਾ ਰਿਹਾ ਹੈ, ਪਰ ਫਿਰ ਵੀ ਦੇਸ਼ ਵਿਚ ਯੂਕਰੇਨੀ ਸ਼ਰਨਾਰਥੀਆਂ ਦੀ ਕੁੱਲ ਗਿਣਤੀ ਲਗਾਤਾਰ ਵਧ ਰਹੀ ਹੈ। ਮਾਰਚ ਦੇ ਅੰਤ ਤੱਕ ਦੇ ਅੰਕੜਿਆਂ ਮੁਤਾਬਕ, ਸਵਿਟਜ਼ਰਲੈਂਡ ਵਿਚ ਅਸਥਾਈ ਸੁਰੱਖਿਆ (ਸਟੇਟਸ ਐੱਸ) ਪ੍ਰਾਪਤ ਯੂਕਰੇਨੀ ਨਾਗਰਿਕਾਂ ਦੀ ਗਿਣਤੀ 72,500 ਤੋਂ ਵੱਧ ਹੋ ਚੁੱਕੀ ਹੈ।