‘ਬੁਨਿਆਦੀ ਸਹੂਲਤਾਂ ਠੀਕ ਕਰੋ’ ਦੇ ਨਾਅਰੇ ਨਾਲ ਉਤਰੀ ਮੈਦਾਨ ‘ਚ
ਵਾਸ਼ਿੰਗਟਨ ਡੀ.ਸੀ., 4 ਅਪ੍ਰੈਲ (ਪੰਜਾਬ ਮੇਲ)- ਤਾਮਿਲਨਾਡੂ ‘ਚ ਪੈਦਾ ਹੋਈ ਰਿਨੀ ਸੰਪਤ ਵਾਸ਼ਿੰਗਟਨ ਡੀ.ਸੀ. ਦੇ ਮੇਅਰ ਅਹੁਦੇ ਦੀ ਚੋਣ ਵਿਚ ਹਿੱਸਾ ਲੈਣ ਵਾਲੀ ਪਹਿਲੀ ਦੱਖਣੀ ਏਸ਼ੀਆਈ ਉਮੀਦਵਾਰ ਬਣ ਗਈ ਹੈ। ਡੈਮੋਕ੍ਰੇਟਿਕ ਪਾਰਟੀ ਦੀ 31 ਸਾਲਾ ਸਰਕਾਰੀ ਕੰਟਰੈਕਟਰ ਦੀ ਚੋਣ ਮੁਹਿੰਮ ‘ਬੁਨਿਆਦੀ ਚੀਜ਼ਾਂ ਨੂੰ ਠੀਕ ਕਰੋ’ ਦੇ ਵਿਸ਼ੇ ਅਤੇ ‘ਇੱਕ ਨਵੇਂ ਡੀ.ਸੀ.’ ਦੇ ਵਾਅਦੇ ‘ਤੇ ਆਧਾਰਿਤ ਹੈ।
ਸੰਪਤ ਨੇ ਆਪਣੀ ਚੋਣ ਵੈੱਬਸਾਈਟ ‘ਤੇ ਕਿਹਾ ਹੈ ਕਿ ਉਹ ਕੋਈ ਰਵਾਇਤੀ ਸਿਆਸਤਦਾਨ ਨਹੀਂ ਹੈ ਅਤੇ ਕਿਸੇ ਵਿਸ਼ੇਸ਼ ਹਿੱਤ ਸਮੂਹ ਨਾਲ ਉਸਦਾ ਕੋਈ ਸਬੰਧ ਨਹੀਂ ਹੈ, ਸਗੋਂ ਹੁਣ ਸਮਾਂ ਆ ਗਿਆ ਹੈ ਕਿ ਕੋਈ ਬਾਹਰੀ ਵਿਅਕਤੀ ਸ਼ਹਿਰ ਦੀਆਂ ਬੁਨਿਆਦੀ ਸੇਵਾਵਾਂ ਨੂੰ ਸੁਧਾਰਨ ‘ਤੇ ਪੂਰੀ ਤਰ੍ਹਾਂ ਧਿਆਨ ਕੇਂਦਰਿਤ ਕਰੇ। ਤਾਮਿਲਨਾਡੂ ਦੇ ਥੇਨੀ ਵਿਚ ਜੰਮੀ ਸੰਪਤ ਸੱਤ ਸਾਲ ਦੀ ਉਮਰ ਵਿਚ ਅਮਰੀਕਾ ਆ ਗਈ ਸੀ ਅਤੇ ਇੱਕ ਦਹਾਕੇ ਤੋਂ ਵੱਧ ਸਮੇਂ ਤੋਂ ਵਾਸ਼ਿੰਗਟਨ ਡੀ.ਸੀ. ਵਿਚ ਰਹਿ ਰਹੀ ਹੈ। ਉਸ ਨੇ ਭਰੋਸਾ ਜਤਾਇਆ ਕਿ ਮਹਿਜ਼ ਚਾਰ ਹਫ਼ਤਿਆਂ ਵਿਚ ਹੀ ਉਸ ਨੇ ਇਤਿਹਾਸ ਰਚ ਦਿੱਤਾ ਹੈ ਅਤੇ ਉਸ ਕੋਲ ਜਿੱਤ ਦਾ ਅਸਲ ਰਾਹ ਮੌਜੂਦ ਹੈ।
ਵਾਸ਼ਿੰਗਟਨ ਡੀ.ਸੀ. ਵਿਚ ਡੈਮੋਕ੍ਰੇਟਸ ਦਾ ਦਬਦਬਾ ਹੈ ਅਤੇ 1975 ਤੋਂ ਬਾਅਦ ਇੱਥੇ ਕਦੇ ਵੀ ਰਿਪਬਲਿਕਨ ਪਾਰਟੀ ਦਾ ਕੋਈ ਮੇਅਰ ਨਹੀਂ ਰਿਹਾ। ਸੰਪਤ ਨੇ ਕਿਹਾ ਕਿ ਮੇਅਰ ਵਜੋਂ ਉਸ ਦੀ ਤਰਜੀਹ ਸੜਕਾਂ ਦੇ ਟੋਏ ਭਰਨਾ, ਪੋਟੋਮੈਕ ਨਦੀ ਵਿਚ ਗੰਦੇ ਪਾਣੀ ਦੇ ਰਿਸਾਅ ਨੂੰ ਰੋਕਣਾ, ਕੀਮਤਾਂ ਘਟਾਉਣਾ ਅਤੇ ਪੁਲਿਸ ਹੈਲਪਲਾਈਨ ਦੇ ਉਡੀਕ ਸਮੇਂ ਵਿਚ ਸੁਧਾਰ ਕਰਨਾ ਹੋਵੇਗੀ। ਪ੍ਰਾਇਮਰੀ ਚੋਣਾਂ 16 ਜੂਨ ਨੂੰ ਹੋਣੀਆਂ ਹਨ, ਜਦੋਂ ਕਿ ਆਮ ਚੋਣਾਂ 3 ਨਵੰਬਰ ਨੂੰ ਹੋਣਗੀਆਂ। ਮੇਅਰ ਦੀ ਦੌੜ ਵਿਚ ਜੇਨਿਸ ਲੂਈਸ ਜਾਰਜ, ਕੇਨਿਯਨ ਮੈਕਡਫੀ, ਗੈਰੀ ਗੁਡਵੇਦਰ, ਰੌਬਰਟ ਐਲ ਗ੍ਰਾਸ ਅਤੇ ਰੋਂਡਾ ਹੈਮਿਲਟਨ ਵੀ ਸ਼ਾਮਲ ਹਨ।