ਟੈਕਸਾਸ, 26 ਜੁਲਾਈ (ਪੰਜਾਬ ਮੇਲ)- ਮੈਕਸੀਕੋ ਦੇ ਬਦਨਾਮ ਡਰੱਗ ਮਾਲਕ ਅਤੇ ਸਿਨਾਲੋਆ ਕਾਰਟੈਲ ਦੇ ਸਹਿ-ਸੰਸਥਾਪਕ, ਇਸਮਾਈਲ ”ਏਲ ਮੇਓ” ਜ਼ਾਂਬਾਡਾ ਨੂੰ ਅਮਰੀਕਾ ਦੇ ਸੰਘੀ ਏਜੰਟਾਂ ਨੇ ਟੈਕਸਾਸ ਦੇ ਐਲ ਪਾਸੋ ਵਿਚ ਗ੍ਰਿਫ਼ਤਾਰ ਕੀਤਾ ਹੈ। ਉਸ ਦੇ ਨਾਲ ਐਲ ਚਾਪੋ ਦੇ ਬੇਟੇ ਜੋਕਿਨ ਗੁਜ਼ਮੈਨ ਲੋਪੇਜ਼ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਜ਼ੈਂਬਾਡਾ ‘ਤੇ ਫੈਂਟਾਨਿਲ ਦੇ ਨਿਰਮਾਣ ਅਤੇ ਤਸਕਰੀ ਅਤੇ ਹੋਰ ਨਸ਼ੀਲੇ ਪਦਾਰਥਾਂ (ਕੋਕੀਨ, ਹੈਰੋਇਨ, ਮੇਥਾਮਫੇਟਾਮਾਈਨ) ਦੀ ਤਸਕਰੀ ਕਰਨ ਦਾ ਦੋਸ਼ ਹੈ। ਅਮਰੀਕੀ ਸਰਕਾਰ ਨੇ ਜ਼ਾਂਬਾਡਾ ਦੀ ਗ੍ਰਿਫ਼ਤਾਰੀ ਲਈ 15 ਮਿਲੀਅਨ ਡਾਲਰ (125 ਕਰੋੜ) ਦੇ ਇਨਾਮ ਦਾ ਐਲਾਨ ਕੀਤਾ ਸੀ।
ਅਮਰੀਕੀ ਨਿਆਂ ਵਿਭਾਗ ਨੇ ਗ੍ਰਿਫ਼ਤਾਰੀ ਦੀ ਪੁਸ਼ਟੀ ਕੀਤੀ ਅਤੇ ਕਿਹਾ ਕਿ ਦੋਵਾਂ ‘ਤੇ ਕਾਰਟੇਲ ਨਾਲ ਸਬੰਧਤ ਕਈ ਅਪਰਾਧਿਕ ਕਾਰਵਾਈਆਂ, ਖਾਸ ਤੌਰ ‘ਤੇ ਫੈਂਟਾਨਿਲ ਦੇ ਨਿਰਮਾਣ ਅਤੇ ਤਸਕਰੀ ਦੇ ਦੋਸ਼ ਲਗਾਏ ਗਏ ਹਨ। ਜ਼ਾਂਬਾਡਾ (76) ਨੇ ਜੋਆਕਿਨ ”ਏਲ ਚਾਪੋ” ਗੁਜ਼ਮੈਨ ਨਾਲ ਅਪਰਾਧ ਸਿੰਡੀਕੇਟ ਦੀ ਸਥਾਪਨਾ ਕੀਤੀ, ਜੋ ਵਰਤਮਾਨ ਵਿਚ ਅਮਰੀਕਾ ਵਿਚ ਜੇਲ੍ਹ ਵਿਚ ਬੰਦ ਹੈ। ਫਰਵਰੀ ਵਿਚ ਅਮਰੀਕੀ ਵਕੀਲਾਂ ਦੁਆਰਾ ਜ਼ੈਂਬਾਡਾ ‘ਤੇ ਫੈਂਟਾਨਿਲ ਬਣਾਉਣ ਅਤੇ ਵੰਡਣ ਦੀ ਸਾਜ਼ਿਸ਼ ਦਾ ਦੋਸ਼ ਲਗਾਇਆ ਗਿਆ ਸੀ। ਇਹ ਡਰੱਗ ਹੈਰੋਇਨ ਨਾਲੋਂ ਵਧੇਰੇ ਸ਼ਕਤੀਸ਼ਾਲੀ ਹੈ ਅਤੇ ਇਸ ਨੂੰ ਅਮਰੀਕੀ ਓਪੀਔਡ ਸੰਕਟ ਲਈ ਜ਼ਿੰਮੇਵਾਰ ਠਹਿਰਾਇਆ ਗਿਆ ਹੈ।
ਯੂ.ਐੱਸ. ਦੇ ਅਟਾਰਨੀ ਜਨਰਲ ਮੈਰਿਕ ਗਾਰਲੈਂਡ ਨੇ ਕਿਹਾ ਕਿ ਦੋਵੇਂ ਵਿਅਕਤੀ ”ਦੁਨੀਆਂ ਦੇ ਸਭ ਤੋਂ ਹਿੰਸਕ ਅਤੇ ਸ਼ਕਤੀਸ਼ਾਲੀ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਕਰਨ ਵਾਲੇ ਸੰਗਠਨਾਂ ਵਿਚੋਂ ਇੱਕ” ਦੀ ਅਗਵਾਈ ਕਰਦੇ ਹਨ। ਗਾਰਲੈਂਡ ਨੇ ਕਿਹਾ ਕਿ ਐਲ ਮੇਓ ਅਤੇ ਗੁਜ਼ਮਾਨ ਲੋਪੇਜ਼ ਸਿਨਾਲੋਆ ਕਾਰਟੇਲ ਦੇ ਨੇਤਾਵਾਂ ਅਤੇ ਸਹਿਯੋਗੀਆਂ ਦੀ ਵਧ ਰਹੀ ਸੂਚੀ ਵਿਚ ਸ਼ਾਮਲ ਹੋ ਗਏ ਹਨ, ਜਿਨ੍ਹਾਂ ਨੂੰ ਨਿਆਂ ਵਿਭਾਗ ਸੰਯੁਕਤ ਰਾਜ ਵਿਚ ਜਵਾਬਦੇਹ ਠਹਿਰਾ ਰਿਹਾ ਹੈ।
ਮੈਕਸੀਕਨ ਡਰੱਗ ਮਾਫੀਆ ਅਮਰੀਕਾ ‘ਚ ਗ੍ਰਿਫ਼ਤਾਰ, ਸਰਕਾਰ ਨੇ ਰੱਖਿਆ ਸੀ 125 ਕਰੋੜ ਦਾ ਇਨਾਮ
![](https://punjabmailusa.com/wp-content/uploads/2024/07/mexican-drug-smuggler-arrested-in-america-991x564.jpg)