ਨਿਊਜਰਸੀ, 1 ਅਕਤੂਬਰ (ਰਾਜ ਗੋਗਨਾ/ਪੰਜਾਬ ਮੇਲ)- ਬੀਤੀ ਰਾਤ ਨਿਊਜਰਸੀ ਸੂਬੇ ਦੀ ਐਟਲਾਂਟਿਕ ਕਾਉਂਟੀ ਦੇ ਐੱਗ ਹਾਰਬਰ ਟਾਊਨਸ਼ਿਪ ਵਿਚ ਇੱਕ ਗੁਜਰਾਤੀ-ਭਾਰਤੀ ਦੇ ਸਟੋਰ ਤੋਂ ਤਿਜੌਰੀ ਵਿਚ ਡ੍ਰਿਲ ਕਰਕੇ ਚੋਰ 13,000 ਹਜ਼ਾਰ ਡਾਲਰ ਲੁੱਟ ਕੇ ਲੈ ਗਏ। ਸਥਾਨਕ ਮੀਡੀਆ ਰਿਪੋਰਟਾਂ ਅਨੁਸਾਰ, ਚੋਰੀ ਐਤਵਾਰ ਨੂੰ ਐੱਮ. ਐਂਡ ਐੱਸ ਪ੍ਰੋਡਿਊਸ ਅਤੇ ਡੇਲੀ ਆਊਟਲੈਟ ਨਾਂ ਦੇ ਸਟੋਰ ਵਿਚ ਹੋਈ। ਸਟੋਰ ਦੇ ਮਾਲਕ ਦੀਪੇਨ ਪਟੇਲ ਨੇ ਮੀਡੀਆ ਨੂੰ ਦੱਸਿਆ ਕਿ ਚੋਰ ਸੁਰੱਖਿਆ ਪ੍ਰਣਾਲੀ ਨੂੰ ਅਯੋਗ ਕਰਕੇ ਅਤੇ ਇੱਕ ਮੋਰੀ ਕਰਕੇ ਸਟੋਰ ਵਿਚ ਦਾਖਲ ਹੋਏ ਅਤੇ 13,000 ਹਜ਼ਾਰ ਡਾਲਰ ਦੀ ਨਗਦੀ ਦੇ ਨਾਲ ਕੈਮਰਾ ਸਿਸਟਮ ਵੀ ਨਾਲ ਲੈ ਕੇ ਫਰਾਰ ਹੋ ਗਏ। ਸਟੋਰ ਮਾਲਕ ਦੀਪੇਨ ਪਟੇਲ ਨੇ ਇਹ ਵੀ ਸ਼ੱਕ ਪ੍ਰਗਟ ਕੀਤਾ ਹੈ ਕਿ ਇਸ ਘਟਨਾ ਵਿਚ ਕੋਈ ਅੰਦਰੂਨੀ ਭੇਤੀ ਵਿਅਕਤੀ ਸ਼ਾਮਲ ਹੋ ਸਕਦਾ ਹੈ। ਕਿਉਂਕਿ ਜਿਸ ਤਰੀਕੇ ਨਾਲ ਸੁਰੱਖਿਆ ਪ੍ਰਣਾਲੀ ਬੰਦ ਕੀਤੀ ਗਈ ਸੀ, ਉਸ ਤਰੀਕੇ ਨਾਲ ਕਿਸੇ ਅਣਜਾਣ ਵਿਅਕਤੀ ਲਈ ਚੋਰੀ ਨੂੰ ਅੰਜਾਮ ਦੇਣਾ ਬਹੁਤ ਮੁਸ਼ਕਲ ਹੋਵੇਗਾ। ਦੀਪੇਨ ਪਟੇਲ ਨੇ ਕਿਹਾ ਕਿ ਸਟੋਰ ਵਿਚ ਦਾਖਲ ਹੋਏ ਚੋਰ ਕੈਸ਼ੀਅਰ ਕੋਲ ਗਏ ਅਤੇ ਆਪਣਾ ਕੰਮ ਪੂਰਾ ਕਰਨ ਤੋਂ ਬਾਅਦ ਚਲੇ ਗਏ। ਪਟੇਲ ਅਨੁਸਾਰ ਸਟੋਰ ਵਿਚ ਦਾਖਲ ਹੋਏ ਚੋਰਾਂ ਨੇ ਬਿਜਲੀ ਸਪਲਾਈ ਬੰਦ ਕਰ ਦਿੱਤੀ ਅਤੇ ਕੈਮਰਾ ਸਰਵਰ ਅਤੇ 13,000 ਹਜ਼ਾਰ ਡਾਲਰ ਦੀ ਨਕਦੀ ਲੈ ਕੇ ਭੱਜ ਗਏ। ਰਾਤ ਨੂੰ ਚੋਰੀ ਤੋਂ ਬਾਅਦ, ਕਰਮਚਾਰੀ ਸਵੇਰੇ 7 ਵਜੇ ਸਟੋਰ ਖੋਲ੍ਹਣ ਲਈ ਪਹੁੰਚੇ ਅਤੇ ਪਤਾ ਲੱਗਾ ਕਿ ਚੋਰੀ ਹੋ ਗਈ ਹੈ।