ਲੈਫਟੀਨੈਂਟ ਜਨਰਲ ਡੈਨ ”ਰਾਜ਼ਿਨ” ਕੇਨ ਅਗਲਾ ਚੇਅਰਮੈਨ ਨਾਮਜ਼ਦ
ਵਾਸ਼ਿੰਗਟਨ, 22 ਫਰਵਰੀ (ਪੰਜਾਬ ਮੇਲ)- ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਸ਼ੁੱਕਰਵਾਰ ਨੂੰ ਹਵਾਈ ਸੈਨਾ ਦੇ ਜਨਰਲ ਸੀ.ਕਿਊ ਬ੍ਰਾਊਨ ਨੂੰ ਜੁਆਇੰਟ ਚੀਫ਼ਸ ਆਫ਼ ਸਟਾਫ਼ ਦੇ ਚੇਅਰਮੈਨ ਦੇ ਅਹੁਦੇ ਤੋਂ ਅਚਾਨਕ ਬਰਖਾਸਤ ਕਰ ਦਿੱਤਾ ਹੈ। ਟਰੰਪ ਨੇ ਇਤਿਹਾਸ ਰਚਣ ਵਾਲੇ ਲੜਾਕੂ ਪਾਇਲਟ ਤੇ ਸਤਿਕਾਰਤ ਅਧਿਕਾਰੀ ਨੂੰ ਲਾਂਭੇ ਕੀਤਾ ਹੈ ਤੇ ਉਨ੍ਹਾਂ ਦੀ ਇਹ ਕਾਰਵਾਈ ਫੌਜ ਨੂੰ ਉਨ੍ਹਾਂ ਆਗੂਆਂ ਤੋਂ ਛੁਟਕਾਰਾ ਦਿਵਾਉਣ ਦੀ ਮੁਹਿੰਮ ਦਾ ਹਿੱਸਾ ਹੈ, ਜੋ ਫੌਜੀ ਰੈਂਕਾਂ ਵਿਚ ਵਿਭਿੰਨਤਾ ਅਤੇ ਸਮਾਨਤਾ ਦੀ ਹਮਾਇਤ ਕਰਦੇ ਹਨ।
ਬ੍ਰਾਊਨ ਜੋ ਚੇਅਰਮੈਨ ਵਜੋਂ ਸੇਵਾ ਨਿਭਾਉਣ ਵਾਲੇ ਸਿਰਫ਼ ਦੂਜੇ ਸਿਆਹਫਾਮ ਜਨਰਲ ਹਨ, ਦੀ ਬਰਖਾਸਤਗੀ ਨਾਲ ਪੈਂਟਾਗਨ ਸਦਮੇ ਵਿਚ ਹੈ। ਉਨ੍ਹਾਂ ਆਪਣੀ ਨੌਕਰੀ ਦੇ 16 ਮਹੀਨੇ ਯੂਕਰੇਨ ਜੰਗ ਅਤੇ ਮੱਧ ਪੂਰਬ ਵਿਚ ਵਧੇ ਹੋਏ ਸੰਘਰਸ਼ ਵਿਚ ਲਾਏ ਸਨ।
ਟਰੰਪ ਨੇ ਇਕ ਸੋਸ਼ਲ ਮੀਡੀਆ ਪੋਸਟ ਵਿਚ ਕਿਹਾ, ”ਮੈਂ ਜਨਰਲ ਚਾਰਲਸ ਸੀਕਿਊ ਬ੍ਰਾਊਨ ਦਾ ਸਾਡੇ ਦੇਸ਼ ਲਈ 40 ਸਾਲਾਂ ਤੋਂ ਵੱਧ ਸਮੇਂ ਦੀ ਸੇਵਾ ਲਈ ਧੰਨਵਾਦ ਕਰਨਾ ਚਾਹੁੰਦਾ ਹਾਂ, ਜਿਸ ਵਿਚ ਸਾਡੇ ਮੌਜੂਦਾ ਜੁਆਇੰਟ ਚੀਫ਼ਸ ਆਫ਼ ਸਟਾਫ ਦੇ ਚੇਅਰਮੈਨ ਵਜੋਂ ਕਾਰਜਕਾਲ ਵੀ ਸ਼ਾਮਲ ਹੈ। ਉਹ ਇੱਕ ਵਧੀਆ ਸੱਜਣ ਅਤੇ ਇੱਕ ਸ਼ਾਨਦਾਰ ਨੇਤਾ ਹਨ ਅਤੇ ਮੈਂ ਉਨ੍ਹਾਂ ਅਤੇ ਉਨ੍ਹਾਂ ਦੇ ਪਰਿਵਾਰ ਲਈ ਇੱਕ ਵਧੀਆ ਭਵਿੱਖ ਦੀ ਕਾਮਨਾ ਕਰਦਾ ਹਾਂ।”
ਟਰੰਪ ਨੇ ਕਿਹਾ ਕਿ ਉਹ ਹਵਾਈ ਸੈਨਾ ਦੇ ਲੈਫਟੀਨੈਂਟ ਜਨਰਲ ਡੈਨ ”ਰਾਜ਼ਿਨ” ਕੇਨ ਨੂੰ ਅਗਲੇ ਚੇਅਰਮੈਨ ਵਜੋਂ ਨਾਮਜ਼ਦ ਕਰ ਰਹੇ ਹਨ। ਕੇਨ ਐਫ-16 ਪਾਇਲਟ ਹੈ, ਜਿਸ ਨੇ ਸਰਗਰਮ ਡਿਊਟੀ ਅਤੇ ਨੈਸ਼ਨਲ ਗਾਰਡ ਵਿਚ ਸੇਵਾ ਨਿਭਾਈ। ਉਸ ਦੀ ਅਧਿਕਾਰਤ ਫੌਜੀ ਆਤਮਕਥਾ ਮੁਤਾਬਕ ਉਸ ਨੇ ਹਾਲ ਹੀ ਵਿਚ ਸੀ.ਆਈ.ਏ. ਵਿਚ ਫੌਜੀ ਮਾਮਲਿਆਂ ਲਈ ਐਸੋਸੀਏਟ ਡਾਇਰੈਕਟਰ ਵਜੋਂ ਵੀ ਸੇਵਾ ਨਿਭਾਈ ਸੀ।