– ਬਿੱਲ ਦੇ ਹੱਕ ਵਿਚ ਅਤੇ ਵਿਰੋਧ ਵਿਚ 50-50 ਵੋਟਾਂ ਪਈਆਂ
– ਜੇਡੀ ਵੈਂਸ ਨੇ ਪਾਈ ਟਾਈ-ਬ੍ਰੇਕਰ ਵੋਟ
ਵਾਸ਼ਿੰਗਟਨ, 2 ਜੁਲਾਈ (ਪੰਜਾਬ ਮੇਲ)-ਅਮਰੀਕੀ ਸੈਨੇਟ ਰਿਪਬਲਿਕਨਾਂ ਨੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ‘ਦਿ ਵਨ ਬਿਗ ਬਿਊਟੀਫੁੱਲ ਬਿੱਲ’ ਨੂੰ ਪਾਸ ਕਰ ਦਿੱਤਾ ਹੈ। ਇਸ ਟੈਕਸ ਅਤੇ ਖਰਚ ਕਟੌਤੀ ਪੈਕੇਜ ਨੂੰ ਸੈਨੇਟ ਵਿਚ ਪਾਸ ਕਰਨਾ ਪਿਆ। ਵੋਟਿੰਗ ਵਿਚ, ਇਸ ਬਿੱਲ ਦੇ ਹੱਕ ਵਿਚ ਅਤੇ ਵਿਰੋਧ ਵਿਚ 50-50 ਵੋਟਾਂ ਪਈਆਂ, ਬਾਅਦ ਵਿਚ ਉਪ-ਰਾਸ਼ਟਰਪਤੀ ਜੇਡੀ ਵੈਂਸ ਨੇ ਟਾਈ-ਬ੍ਰੇਕਰ ਵੋਟ ਪਾ ਕੇ ਇਸ ਬਿੱਲ ਨੂੰ ਪਾਸ ਕਰ ਦਿੱਤਾ।
ਖਾਸ ਗੱਲ ਇਹ ਹੈ ਕਿ ਵੋਟਿੰਗ ਦੌਰਾਨ, ਟਰੰਪ ਦੀ ਪਾਰਟੀ ਦੇ ਰਿਪਬਲਿਕਨ ਸੈਨੇਟਰ ਰੈਂਡ ਪਾਲ, ਸੁਜ਼ਨ ਕੋਲਿਨਜ਼ ਅਤੇ ਥੌਨ ਟਿਲਿਸ ਨੇ ਇਸ ਬਿੱਲ ਦਾ ਵਿਰੋਧ ਕੀਤਾ ਅਤੇ ਵਿਰੋਧੀ ਡੈਮੋਕ੍ਰੇਟਸ ਨਾਲ ਮਿਲ ਕੇ ਇਸਦੇ ਵਿਰੁੱਧ ਵੋਟ ਪਾਈ। ਇਹ ਬਿੱਲ ਟੈਕਸਾਂ ਵਿਚ ਕਟੌਤੀ ਕਰੇਗਾ ਅਤੇ ਰਾਸ਼ਟਰੀ ਸੁਰੱਖਿਆ ਖਰਚ ਵਧਾਏਗਾ। ਹੁਣ ਇਸ ਬਿੱਲ ਨੂੰ ਸਦਨ ਵਿਚ ਪਾਸ ਕਰਨਾ ਪਵੇਗਾ। ਇਸ ਤੋਂ ਬਾਅਦ, ਇਸਨੂੰ ਪਾਸ ਹੋਣ ਲਈ ਰਾਸ਼ਟਰਪਤੀ ਕੋਲ ਭੇਜਿਆ ਜਾਵੇਗਾ।
ਵਨ ਬਿਗ ਬਿਊਟੀਫੁੱਲ ਬਿੱਲ ਤਿੰਨ ਵਿਚ ਇੱਕ ਬਿੱਲ ਹੈ, ਇਹ ਟੈਕਸ ਕਟੌਤੀਆਂ, ਸੁਰੱਖਿਆ ਅਤੇ ਸਰਹੱਦੀ ਨੀਤੀ ਅਤੇ ਸਮਾਜ ਭਲਾਈ ਕਟੌਤੀਆਂ ‘ਤੇ ਕੇਂਦ੍ਰਿਤ ਹੈ। ਇਸ ਟੈਕਸ ਕਟੌਤੀ ਵਿਚ ਓਵਰਟਾਈਮ ਅਤੇ ਟਿਪਸ ‘ਤੇ ਟੈਕਸ ਛੋਟ, ਨਵਜੰਮੇ ਬੱਚਿਆਂ ਲਈ ਵਿਸ਼ੇਸ਼ ਕ੍ਰੈਡਿਟ, ਸੁਰੱਖਿਆ ਅਤੇ ਸਰਹੱਦੀ ਨੀਤੀ ਅਧੀਨ ਰਾਸ਼ਟਰੀ ਰੱਖਿਆ ਲਈ M150 ਬਿਲੀਅਨ ਤੋਂ ਵੱਧ, ਸਰਹੱਦੀ ਕੰਧ ਅਤੇ ਕਾਨੂੰਨ ਲਾਗੂ ਕਰਨ ਲਈ 350 ਬਿਲੀਅਨ ਅਤੇ ਪ੍ਰਵਾਸੀਆਂ ਨੂੰ ਦੇਸ਼ ਨਿਕਾਲਾ ਦੇਣ ਦੀ ਯੋਜਨਾ ਸ਼ਾਮਲ ਹੈ। ਇਸਦਾ ਤੀਜਾ ਹਿੱਸਾ ਸਮਾਜਿਕ ਭਲਾਈ ਕਟੌਤੀਆਂ ਹਨ, ਜਿਸ ਦੇ ਤਹਿਤ ਮੈਡੀਕੇਡ ਵਿਚ ਵੱਡੇ ਪੱਧਰ ‘ਤੇ ਕਟੌਤੀ ਦੀਆਂ ਤਿਆਰੀਆਂ ਹਨ।
ਬਿੱਲ ਪੇਸ਼ ਕਰਦੇ ਸਮੇਂ, ਟਰੰਪ ਪ੍ਰਸ਼ਾਸਨ ਨੇ ਦਾਅਵਾ ਕੀਤਾ ਕਿ ਇਹ ਬਿੱਲ ਅਗਲੇ ਦਸ ਸਾਲਾਂ ਵਿਚ ਘਾਟੇ ਨੂੰ 2 ਤੋਂ 3 ਟ੍ਰਿਲੀਅਨ ਤੱਕ ਘਟਾ ਦੇਵੇਗਾ। ਹਾਲਾਂਕਿ, ਸੈਨੇਟ ਬਜਟ ਦਫਤਰ ਦਾ ਮੰਨਣਾ ਸੀ ਕਿ ਇਸ ਬਿੱਲ ਨਾਲ 3 ਟ੍ਰਿਲੀਅਨ ਤੱਕ ਦਾ ਵਾਧੂ ਘਾਟਾ ਹੋ ਸਕਦਾ ਹੈ। ਐਲੋਨ ਮਸਕ ਵੀ ਇਸ ਬਿੱਲ ਦੇ ਹੱਕ ਵਿਚ ਨਹੀਂ ਹਨ, ਉਹ ਪਹਿਲਾਂ ਹੀ ਇਸਨੂੰ ਪਾਗਲ ਕਹਿ ਚੁੱਕੇ ਹਨ।
ਟਰੰਪ ਨੇ ਟੈਕਸ ਅਤੇ ਖਰਚ ਕਟੌਤੀ ਬਿੱਲ ਨੂੰ ‘ਦਿ ਬਿਗ ਬਿਊਟੀਫੁੱਲ ਬਿੱਲ’ ਦਾ ਨਾਮ ਦਿੱਤਾ ਹੈ। ਸੈਨੇਟ ਇਸਨੂੰ 4 ਜੁਲਾਈ ਤੱਕ ਰਾਸ਼ਟਰਪਤੀ ਟਰੰਪ ਦੀ ਮੇਜ਼ ‘ਤੇ ਲਿਆਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਇਸਦੇ ਲਈ, ਸੈਨੇਟਰਾਂ ਨੂੰ ਖਾਸ ਬਜਟ ਨਿਯਮਾਂ ਦੀ ਪਾਲਣਾ ਕਰਨੀ ਪਵੇਗੀ ਅਤੇ ਜੀ.ਓ.ਪੀ. ਕਾਨਫਰੰਸ ‘ਚ ਲੋੜੀਂਦਾ ਸਮਰਥਨ ਇਕੱਠਾ ਕਰਨਾ ਹੋਵੇਗਾ। ਇਸ ਬਿੱਲ ਨੂੰ ਸੈਨੇਟ ਨੇ ਮਨਜ਼ੂਰੀ ਦੇ ਦਿੱਤੀ ਹੈ, ਹੁਣ ਇਸਨੂੰ ਸਦਨ ਵਿਚ ਵੀ ਮਨਜ਼ੂਰੀ ਮਿਲ ਜਾਵੇਗੀ, ਜਿਸ ਤੋਂ ਬਾਅਦ ਟਰੰਪ ਇਸ ‘ਤੇ ਦਸਤਖਤ ਕਰ ਸਕਣਗੇ।