-ਦੋਸ਼ ਸਾਬਤ ਹੋਣ ‘ਤੇ ਹੋ ਸਕਦੀ ਹੈ 20 ਸਾਲ ਤੱਕ ਦੀ ਕੈਦ
ਨਿਊਯਾਰਕ, 26 ਮਾਰਚ (ਰਾਜ ਗੋਗਨਾ/ਪੰਜਾਬ ਮੇਲ)- ਜਾਰਜੀਆ ਦੇ ਏਕਵਰਥ ਵਿਚ ਅੱਧਖੜ ਉਮਰ ਦੇ ਇੱਕ ਗੁਜਰਾਤੀ ਵਿਅਕਤੀ ‘ਤੇ ਗੰਭੀਰ ਅਪਰਾਧਾਂ ਦਾ ਦੋਸ਼ ਲਗਾਏ ਗਏ। ਉਸ ‘ਤੇ ਇੱਕ ਬੱਚੇ ਨੂੰ ਅਗਵਾ ਕਰਨ ਦੀ ਕੋਸ਼ਿਸ਼ ਕਰਨ ਦੇ ਦੋਸ਼ ਲੱਗੇ ਹਨ। ਜੇਕਰ ਉਸ ਵਿਰੁੱਧ ਦੋਸ਼ ਸਾਬਤ ਹੋ ਜਾਂਦੇ ਹਨ, ਤਾਂ ਉਸ ਨੂੰ ਅਦਾਲਤ ਵੱਲੋਂ 20 ਸਾਲ ਤੱਕ ਦੀ ਕੈਦ ਹੋ ਸਕਦੀ ਹੈ। ਅਜੇ ਤੱਕ ਇਸ ਬਾਰੇ ਕੋਈ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ ਕਿ ਕੀ ਅੱਧਖੜ ਉਮਰ ਦਾ ਇਹ ਵਿਅਕਤੀ ਨਸ਼ੇ ਵਿਚ ਸੀ ਜਾਂ ਮਾਨਸਿਕ ਤੌਰ ‘ਤੇ ਅਸਥਿਰ ਸੀ। ਦੋਸ਼ੀ ਭਾਰਤੀ ਜਿਸ ਦਾ ਪਿਛੋਕੜ ਗੁਜਰਾਤ ਦੇ ਨਾਲ ਦੱਸਿਆ ਜਾਂਦਾ ਹੈ, ਉਸ ਦੀ ਪਛਾਣ 56 ਸਾਲਾ ਮਹਿੰਦਰ ਪਟੇਲ ਦੱਸੀ ਗਈ ਹੈ, ਜਿਸ ਨੇ ਇੱਕ ਔਰਤ ਦੀਆਂ ਬਾਹਾਂ ਵਿਚੋਂ ਇੱਕ ਬੱਚਾ ਚੋਰੀ ਕਰਨ ਦੀ ਕੋਸ਼ਿਸ਼ ਕੀਤੀ।
ਉਸ ‘ਤੇ ਸਾਧਾਰਨ ਹਮਲਾ, ਸਾਧਾਰਨ ਕੁੱਟਮਾਰ ਅਤੇ ਅਗਵਾ ਕਰਨ ਦੇ ਦੋਸ਼ ਪੁਲਿਸ ਵੱਲੋ ਲਗਾਏ ਗਏ ਹਨ। ਘਟਨਾ ਦੀ ਰਿਪੋਰਟ ਮਿਲਣ ਤੋਂ ਬਾਅਦ ਪੁਲਿਸ ਨੇ ਤਿੰਨ ਦਿਨਾਂ ਦੀ ਜਾਂਚ ਦੌਰਾਨ ਨਿਗਰਾਨੀ ਅਤੇ ਸੀ.ਸੀ.ਟੀ.ਵੀ. ਰਾਹੀਂ ਦੋਸ਼ੀ ਨੂੰ ਗ੍ਰਿਫ਼ਤਾਰ ਕੀਤਾ, ਜੋ ਕਿ ਜਾਰਜੀਆ ਦੇ ਕੇਨੇਵਾਸੋ ਦਾ ਰਹਿਣ ਵਾਲਾ ਦੱਸਿਆ ਜਾ ਰਿਹਾ ਹੈ। ਉਸ ‘ਤੇ ਪਹਿਲੇ ਦੋ ਦੋਸ਼ ਕੁਕਰਮ ਦੇ ਸਨ ਅਤੇ ਇਸ ਸਮੇਂ ਉਹ ਬਿਨਾਂ ਜ਼ਮਾਨਤ ਦੇ ਕੋਬ ਕਾਉਂਟੀ ਸ਼ੈਰਿਫ਼ ਦੇ ਦਫ਼ਤਰ ਦੀ ਹਿਰਾਸਤ ਵਿਚ ਨਜ਼ਰਬੰਦ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਅਪਰਾਧ ਵਾਲੇ ਦਿਨ ਦੋਸ਼ੀ ਨੇ ਇੱਕ ਨੌਜਵਾਨ ਔਰਤ ਤੋਂ ਟਾਇਲੇਨੌਲ ਦੀਆਂ ਗੋਲੀਆ ਮੰਗੀਆਂ, ਜੋ ਆਪਣੇ ਬੱਚੇ ਨਾਲ ਘੁੰਮ ਰਹੀ ਸੀ ਅਤੇ ਫਿਰ ਉਸਦੇ ਬੱਚੇ ਨੂੰ ਲੈ ਕੇ ਭੱਜਣ ਦੀ ਕੋਸ਼ਿਸ਼ ਕੀਤੀ।
ਸ਼ਿਕਾਇਤਕਰਤਾ ਅਨੁਸਾਰ ਉਹ ਆਪਣੇ ਬੱਚੇ ਨਾਲ ਇੱਕ ਹੈਂਡੀਕੈਪ ਸਕੂਟਰ ‘ਤੇ ਸਵਾਰ ਸੀ। ਹਾਲਾਂਕਿ ਉਸਨੇ ਆਪਣੇ ਬੱਚੇ ਨੂੰ ਮਹਿੰਦਰ ਪਟੇਲ ਦੇ ਹੱਥੋਂ ਬਚਾਇਆ ਅਤੇ ਫਿਰ ਦੋਸ਼ੀ ਅਪਰਾਧ ਵਾਲੀ ਥਾਂ ਤੋਂ ਭੱਜ ਗਿਆ ਸੀ। ਪੁਲਿਸ ਵੱਲੋਂ ਮਹਿੰਦਰ ਪਟੇਲ ਦੇ ਇਮੀਗ੍ਰੇਸ਼ਨ ਸਟੇਟਸ ਬਾਰੇ ਕੋਈ ਜਾਣਕਾਰੀ ਜਾਰੀ ਨਹੀਂ ਦਿੱਤੀ ਗਈ ਹੈ। ਹਾਲਾਂਕਿ ਜਿਸ ਤਰ੍ਹਾਂ ਇਸ ਅਪਰਾਧ ਨੂੰ ਅੰਜਾਮ ਦੇਣ ਵਾਲੇ ਦੋਸ਼ੀ ਦੇ ਵੇਰਵੇ ਸਾਹਮਣੇ ਆ ਰਹੇ ਹਨ, ਉਸ ਨੂੰ ਦੇਖਦੇ ਹੋਏ ਇਹ ਸਵਾਲ ਵੀ ਪੁੱਛਿਆ ਜਾ ਰਿਹਾ ਹੈ ਕਿ ਕੀ ਦੋਸ਼ੀ ਇਹ ਅਪਰਾਧ ਕਰਦੇ ਸਮੇਂ ਨਸ਼ੇ ਵਿਚ ਸੀ ਜਾਂ ਉਸ ਦੀ ਮਾਨਸਿਕ ਸਥਿਤੀ ਠੀਕ ਨਹੀਂ ਸੀ? ਘਟਨਾ ਬਾਰੇ ਹੋਰ ਜਾਣਕਾਰੀ ਦਿੰਦੇ ਹੋਏ ਐਕਵਰਥ ਪੁਲਿਸ ਦੇ ਸਾਰਜੈਂਟ ਏਰਿਕ ਮਿਸਤਰੇਟਾ ਨੇ ਕਿਹਾ ਕਿ ਦੋਸ਼ੀ ਦੁਆਰਾ ਕੀਤਾ ਗਿਆ ਇਹ ਕੰਮ ਕਿਸੇ ਲਈ ਵੀ ਡਰਾਉਣਾ ਸੀ। ਉਨ੍ਹਾਂ ਇਹ ਵੀ ਕਿਹਾ ਕਿ ਜੇਕਰ ਔਰਤ ਨੇ ਬੱਚੇ ਨੂੰ ਬਚਾਉਣ ਦੀ ਕੋਸ਼ਿਸ਼ ਨਾ ਕੀਤੀ ਹੁੰਦੀ, ਤਾਂ ਬੱਚਾ ਜ਼ਖਮੀ ਵੀ ਹੋ ਸਕਦਾ ਸੀ ਜਾਂ ਉਸ ਦੀ ਮੌਤ ਵੀ ਹੋ ਸਕਦੀ ਸੀ।