ਚੰਡੀਗੜ੍ਹ, 7 ਦਸੰਬਰ , (ਸੁਖਦੇਵ ਸਿੰਘ ਸ਼ਾਂਤ/ਪੰਜਾਬ ਮੇਲ) – ਕੇਂਦਰੀ ਪੰਜਾਬੀ ਮਿੰਨੀ ਕਹਾਣੀ ਲੇਖਕ ਮੰਚ (ਪਟਿਆਲਾ) ਵੱਲੋਂ ਸਾਲ 2026 ਦਾ ਛੱਬੀਵਾਂ ਮਾਨ ਕੌਰ ਯਾਦਗਾਰੀ ਮਿੰਨੀ ਕਹਾਣੀ ਪੁਰਸਕਾਰ ਪੰਜਾਬੀ ਦੇ ਉੱਘੇ ਮਿੰਨੀ ਕਹਾਣੀ ਲੇਖਕ ਰਘਬੀਰ ਸਿੰਘ ਮਹਿਮੀ ਨੂੰ ਦੇਣ ਦਾ ਫ਼ੈਸਲਾ ਕੀਤਾ ਹੈ। ਰਘਬੀਰ ਸਿੰਘ ਮਹਿਮੀ ਦੇ ਛੇ ਮਿੰਨੀ ਕਹਾਣੀ ਸੰਗ੍ਰਹਿ ‘ਗਗਨ ਮੈਂ ਥਾਲੁ’(2004), ‘ਚੰਗੇਰ’(2007), ‘ਤਿੜਕ’(2012), ‘ਤੇਰੀਆਂ ਮੇਰੀਆਂ ਬਾਤਾਂ’(2016), ‘ਬੂਹਾ ਨਹੀਂ ਖੁੱਲ੍ਹੇਗਾ’(2018), ‘ਸਿਰ ਦਾ ਤਾਜ਼’ (2021) ਪ੍ਰਕਾਸ਼ਿਤ ਹੋ ਚੁੱਕੇ ਹਨ।ਇਸ ਤੋਂ ਇਲਾਵਾ ਇਕ ਕਹਾਣੀ ਸੰਗ੍ਰਹਿ ਅਤੇ ਸਵੈ-ਜੀਵਨੀ ਦੋ ਭਾਗਾਂ ਵਿਚ  ਪ੍ਰਕਾਸ਼ਿਤ ਹੋ ਚੁੱਕੀਆਂ ਹਨ। ਖੋਜਾਰਥੀ ਡਾ.ਜਗਜੀਤ ਸਿੰਘ ਮਹਿਮੀ ਵੱਲੋਂ ਉਨ੍ਹਾਂ ਦੀ ਮਿੰਨੀ ਕਹਾਣੀ ਕਲਾ ਉਤੇ ਕੁਰੂਕਸ਼ੇਤਰ ਯੂਨੀਵਰਸਿਟੀ ਕੁਰੂਕਸ਼ੇਤਰ ਤੋਂ ਐਮ.ਫਿਲ ਦਾ ਖੋਜ ਕਾਰਜ ਕੀਤਾ ਗਿਆ ਹੈ। ਕੁਰੂਕਸ਼ੇਤਰ ਯੂਨੀਵਰਸਿਟੀ ਕੁਰੂਕਸ਼ੇਤਰ ਵਿਖੇ ਉਨ੍ਹਾਂ ਦੀਆਂ ਕੁਝ ਮਿੰਨੀ ਕਹਾਣੀਆਂ ਐਮ.ਏ ਪੰਜਾਬੀ ਭਾਗ- ਦੂਜਾ ਦੇ ਪਾਠਕ੍ਰਮ ਵਿਚ ਸ਼ਾਮਿਲ ਹਨ।ਮੰਚ ਵੱਲੋਂ ਲੇਖਕ ਨੂੰ ਫਰਵਰੀ  2026ਦੇ ਦੂਜੇ ਐਤਵਾਰ ਪੰਜਾਬੀ ਸਾਹਿਤ ਸਭਾ (ਰਜਿ.) ਪਟਿਆਲਾ ਦੇ ਸਹਿਯੋਗ ਨਾਲ ਹੋਣ ਜਾ ਰਹੇ ਸਾਹਿਤਕ ਸਮਾਗਮ ਵਿਚ ਨਕਦ ਰਾਸ਼ੀ, ਸਨਮਾਨ ਪੱਤਰ ਅਤੇ ਲੋਈ ਦੇ ਕੇ ਸਨਮਾਨਿਤ ਕੀਤਾ ਜਾਵੇਗਾ।

ਵਰਣਨਯੋਗ ਹੈ ਕਿ ਇਹ ਪੁਰਸਕਾਰ ਮੰਚ ਦੇ ਪ੍ਰਧਾਨ ਡਾ.ਹਰਪ੍ਰੀਤ ਸਿੰਘ ਰਾਣਾ ਵੱਲੋਂ ਆਪਣੀ ਸਵਰਗੀ ਮਾਤਾ ਦੀ ਯਾਦ ਵਿਚ ਸਾਲ 2001 ਤੋਂ ਹਰ ਸਾਲ ਕਿਸੇ ਇਕ ਉੱਘੇ ਪੰਜਾਬੀ ਮਿੰਨੀ ਕਹਾਣੀ ਲੇਖਕ ਨੂੰ ਨਿਰੰਤਰ ਦਿੱਤਾ ਜਾ ਰਿਹਾ ਹੈ।ਹੁਣ ਤੱਕ ਸਰਵਸ੍ਰੀ ਸਤਵੰਤ ਕੈਂਥ(2001), ਡਾ. ਅਮਰ ਕੋਮਲ (2002),ਕਰਮਵੀਰ ਸਿੰਘ ਸੂਰੀ(2003), ਪ੍ਰਿੰ. ਸੁਲੱਖਣ ਮੀਤ(2004) ਰਜਿੰਦਰ ਕੌਰ ਵੰਤਾ(2005), ਮੋਹਨ ਸ਼ਰਮਾ(2006), ਮਹਿਤਾਬ -ਉਦ-ਦੀਨ (2007),  ਸ਼ਿਆਮ ਸੁੰਦਰ  ਅਗਰਵਾਲ(2008)ਡਾ.  ਸ਼ਿਆਮ ਸੁੰਦਰ ਦੀਪਤੀ (2009), ਅਨਵੰਤ ਕੌਰ (2010), ਅਵੱਲ ਸਰਹੱਦੀ(2011), ਸੁਖਚੈਨ ਸਿੰਘ ਭੰਡਾਰੀ ((2012), ਡਾ. ਧਰਮਪਾਲ ਸਾਹਿਲ(2013), ਤ੍ਰਿਪਤ ਭੱਟੀ (2014), ਸੁਰਿੰਦਰ ਕੈਲੇ(2015), ਬਿਕਰਮਜੀਤ ਨੂਰ(2016), ਹਰਭਜਨ ਸਿੰਘ ਖੇਮਕਰਨੀ(2017), ਬਲਵੀਰ ਪਰਵਾਨਾ(2018),ਡਾ.ਹਰਨੇਕ ਸਿੰਘ ਕੈਲੇ(2019), ਡਾ. ਸੁਖਮਿੰਦਰ ਸੇਖੋਂ(2020), ਨਿਰੰਜਨ ਬੋਹਾ(2021) ਸੁਖਦੇਵ ਸਿੰਘ ਸ਼ਾਂਤ(2022), ਡਾ. ਬਲਦੇਵ ਸਿੰਘ ਖਹਿਰਾ(2023), ਸੁਰਿੰਦਰ ਮਕਸੂਦਪੁਰੀ(2024) ਅਤੇ ਪ੍ਰੀਤ ਨੀਤਪੁਰ (2025) ਨੂੰ ਪੁਰਸਕਾਰ ਦੇ ਕੇ ਸਨਮਾਨਿਤ ਕੀਤਾ ਜਾ ਚੁੱਕਾ ਹੈ।