-ਆਮਦਨ ‘ਚ ਭਾਜਪਾ ਸਭ ਤੋਂ ਅੱਗੇ; ਕਾਂਗਰਸ, ਬਸਪਾ ਅਤੇ ਸੀ. ਪੀ. ਆਈ. (ਐੱਮ) ਦੀ ਆਮਦਨ ਘਟੀ
ਨਵੀਂ ਦਿੱਲੀ, 1 ਮਾਰਚ (ਪੰਜਾਬ ਮੇਲ)-ਐਸੋਸੀਏਸ਼ਨ ਆਫ਼ ਡੈਮੋਕਰੇਟਿਕ ਰਿਫਾਰਮਜ਼ (ਏ.ਡੀ.ਆਰ.) ਨੇ ਕਿਹਾ ਹੈ ਕਿ ਦੇਸ਼ ਦੀਆਂ ਛੇ ਕੌਮੀ ਪਾਰਟੀਆਂ ਨੂੰ ਵਿੱਤੀ ਵਰ੍ਹੇ 2022-23 ਦੌਰਾਨ 3077 ਕਰੋੜ ਰੁਪਏ ਦੀ ਆਮਦਨ ਹੋਈ ਹੈ, ਜਿਸ ‘ਚ ਭਾਜਪਾ 2361 ਕਰੋੜ ਰੁਪਏ ਦੀ ਆਮਦਨ ਨਾਲ ਸਭ ਤੋਂ ਅੱਗੇ ਹੈ। ਸੱਤਾਧਾਰੀ ਭਾਰਤੀ ਜਨਤਾ ਪਾਰਟੀ ਦੀ ਵਿੱਤੀ ਵਰ੍ਹੇ 2022-23 ਦੀ ਆਮਦਨ ‘ਚ ਪਿਛਲੇ ਸਾਲ ਨਾਲੋਂ 76.73 ਫੀਸਦੀ ਦਾ ਵਾਧਾ ਹੋਇਆ ਹੈ।
ਇਸ ਮਾਮਲੇ ‘ਚ ਕਾਂਗਰਸ ਦੂਜੇ ਸਥਾਨ ‘ਤੇ ਹੈ, ਜਿਸ ਨੂੰ 452.37 ਕਰੋੜ ਰੁਪਏ ਦੀ ਆਮਦਨ ਹੋਈ ਹੈ। ਛੇ ਕੌਮੀ ਪਾਰਟੀਆਂ ਦੀ ਕੁੱਲ ਆਮਦਨ ‘ਚੋਂ ਕਾਂਗਰਸ ਦਾ ਕੁੱਲ ਹਿੱਸਾ 14.70 ਕਰੋੜ ਰੁਪਏ ਬਣਦਾ ਹੈ। ਭਾਜਪਾ ਅਤੇ ਕਾਂਗਰਸ ਤੋਂ ਇਲਾਵਾ ਬਸਪਾ, ‘ਆਪ’, ਐੱਨ.ਪੀ.ਪੀ. ਅਤੇ ਸੀ.ਪੀ.ਆਈ.-ਐੱਮ. ਨੇ ਆਪਣੀ ਆਮਦਨ ਦੇ ਵੇਰਵੇ ਸਾਂਝੇ ਕੀਤੇ ਹਨ।
ਏ.ਡੀ.ਆਰ. ਅਨੁਸਾਰ ਐੱਨ.ਪੀ.ਪੀ. ਦੀ ਆਮਦਨ ‘ਚ ਪਿਛਲੇ ਵਿੱਤੀ ਵਰ੍ਹੇ ਨਾਲੋਂ 1502.12 ਫੀਸਦੀ ਦਾ ਵਾਧਾ ਹੋਇਆ ਹੈ। ਵਿੱਤੀ ਵਰ੍ਹੇ 2021-22 ‘ਚ ਇਸ ਦੀ ਆਮਦਨ 47.20 ਲੱਖ ਸੀ ਸੀ, ਜੋ ਵਿੱਤੀ ਵਰ੍ਹੇ 2022-23 ‘ਚ ਵਧ ਕੇ 7.09 ਕਰੋੜ ਰੁਪਏ ਹੋ ਗਈ।
ਇਸੇ ਤਰ੍ਹਾਂ ਆਮ ਆਦਮੀ ਪਾਰਟੀ ਦੀ ਆਮਦਨ ‘ਚ 91.23 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਹੈ। ‘ਆਪ’ ਦੀ ਆਮਦਨ ਜੋ ਵਿੱਤੀ ਵਰ੍ਹੇ ‘ਚ 2021-22 ‘ਚ 44.54 ਕਰੋੜ ਸੀ, ਵਿੱਤੀ ਵਰ੍ਹੇ 2022-23 ‘ਚ ਵਧ ਕੇ 85.17 ਕਰੋੜ ਹੋ ਗਈ।
ਇਥੇ ਦੱਸਣਯੋਗ ਹੈ ਕਿ ਕਾਂਗਰਸ, ਸੀ.ਪੀ.ਆਈ. (ਐੱਮ) ਅਤੇ ਬੀ.ਐੱਸ.ਪੀ. ਦੀ ਆਮਦਨ ‘ਚ ਵਿੱਤੀ ਵਰ੍ਹੇ 2022-23 ਦੌਰਾਨ ਆਮਦਨ ਘਟੀ ਹੈ। ਚੋਣ ਕਮਿਸ਼ਨ ਕੋਲ ਜਮ੍ਹਾ ਕਰਵਾਏ ਰਿਕਾਰਡ ਅਨੁਸਾਰ ਕਾਂਗਰਸ ਦੀ ਆਮਦਨ 16.42 ਫੀਸਦੀ (88.90 ਕਰੋੜ), ਸੀ.ਪੀ.ਆਈ.ਐੱਮ. ਦੀ 12.68 ਫੀਸਦੀ (20.58 ਕਰੋੜ) ਅਤੇ ਬਸਪਾ ਦੀ ਆਮਦਨ ‘ਚ 33.14 ਫੀਸਦੀ 14.51 ਕਰੋੜ ਰੁਪਏ ਦਾ ਘਾਟਾ ਦਰਜ ਕੀਤਾ ਗਿਆ ਹੈ।