ਡਾਕ ਬਕਸੇ ਤੋੜ ਕੇ ਚੋਰੀ ਕਰਦੇ ਸਨ ਲੋਕਾਂ ਦੇ ਚੈੱਕ; ਕਾਰਡ ਤੇ ਹੋਰ ਕੀਮਤੀ ਦਸਤਾਵੇਜ ਜ਼ਬਤ
ਵੈਨਕੂਵਰ, 11 ਅਕਤੂਬਰ (ਪੰਜਾਬ ਮੇਲ)- ਪੀਲ ਪੁਲਿਸ ਨੇ ਹਾਲਟਨ ਪੁਲਿਸ ਅਤੇ ਕੈਨੇਡਾ ਪੋਸਟ ਦੇ ਸਹਿਯੋਗ ਨਾਲ ਅਰੰਭੇ ਅਪਰੇਸ਼ਨ ਅਨਡਲਿਵਰਡ ਅਧੀਨ ਬੀਤੇ ਦਿਨੀਂ ਛਾਪੇ ਮਾਰਕੇ 8 ਭਾਰਤੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ ਅਤੇ ਉਨ੍ਹਾਂ ਤੋਂ ਚਾਰ ਲੱਖ ਡਾਲਰ (ਢਾਈ ਕਰੋੜ ਰੁਪਏ) ਤੋਂ ਵੱਧ ਕੀਮਤ ਦੇ ਚੈੱਕ, ਕਾਰਡ, ਪਛਾਣ ਪੱਤਰਾਂ ਸਮੇਤ 465 ਦਸਤਾਵੇਜ ਬਰਾਮਦ ਕੀਤੇ ਹਨ। ਇਹ ਸਭ ਉਨ੍ਹਾਂ ਨੇ ਲੋਕਾਂ ਦੇ ਡਾਕ ਬਕਸੇ ਤੋੜ ਕੇ ਚੋਰੀ ਕੀਤਾ ਸੀ। ਉਨ੍ਹਾਂ ਉੱਤੇ ਵੱਖ-ਵੱਖ ਅਪਰਾਧਾਂ ਤਹਿਤ 344 ਦੋਸ਼ ਆਇਦ ਕੀਤੇ ਹਨ।
ਪੀਲ ਪੁਲਿਸ ਦੇ ਬੁਲਾਰੇ ਨੇ ਦੱਸਿਆ ਕਿ ਲੰਮੇ ਸਮੇਂ ਤੋਂ ਪੀਲ ਅਤੇ ਹਾਲਟਨ ਖੇਤਰਾਂ ਵਿਚ ਲੋਕਾਂ ਦੇ ਡਾਕ ਬਕਸੇ ਤੋੜ ਕੇ ਡਾਕ ਚੋਰੀ ਕਰਨ ਦੀਆਂ ਸ਼ਿਕਾਇਤਾਂ ‘ਤੇ ਕਾਰਵਾਈ ਲਈ ਪੀਲ ਪੁਲਿਸ ਵਲੋਂ ਅਪਰੇਸ਼ਨ ਅਨਡਲਿਵਰਡ ਅਰੰਭਿਆ ਗਿਆ, ਜਿਸ ਵਿਚ ਕੈਨੇਡਾ ਪੋਸਟ ਅਤੇ ਹਾਲਟਨ ਪੁਲਿਸ ਦਾ ਸਹਿਯੋਗ ਲੈ ਕੇ ਦੋਸ਼ੀਆਂ ਦੀ ਪਛਾਣ ਕੀਤੀ ਗਈ। ਬੀਤੇ ਦਿਨੀਂ ਸੁਮਨਪ੍ਰੀਤ ਸਿੰਘ, ਗੁਰਦੀਪ ਚੱਠਾ, ਜੱਸ਼ਨਦੀਪ ਜਟਾਣਾ, ਹਰਮਨ ਸਿੰਘ, ਜੱਸ਼ਨਪ੍ਰੀਤ ਸਿੰਘ, ਮਨਰੂਪ ਸਿੰਘ, ਉਪਿੰਦਰਜੀਤ ਸਿੰਘ ਅਤੇ ਰਾਜਬੀਰ ਸਿੰਘ ਦੇ ਠਿਕਾਣਿਆਂ ਦੀ ਤਲਾਸ਼ੀ ਦੌਰਾਨ ਵੱਡੀ ਗਿਣਤੀ ਵਿਚ ਚੋਰੀ ਕੀਤਾ ਸਮਾਨ ਮਿਲਿਆ।
ਉਨ੍ਹਾਂ ਦੱਸਿਆ ਕਿ ਬਰਾਮਦ ਕੀਤੇ ਸਮਾਨ ਵਿਚ 255 ਚੈੱਕ, 182 ਕਰੈਡਿਟ ਕਾਰਡ, 35 ਲੋਕਾਂ ਦੇ ਸਰਕਾਰੀ ਪਛਾਣ ਪੱਤਰ ਅਤੇ 20 ਗਿਫਟ ਕਾਰਡ ਸ਼ਾਮਲ ਹਨ, ਜਿਨ੍ਹਾਂ ਦੀ ਕੀਮਤ 4 ਲੱਖ ਡਾਲਰ ਹੈ।
ਪੁਲਿਸ ਨੇ ਦੱਸਿਆ ਕਿ ਇਨ੍ਹਾਂ ਦੀ ਜਾਣਕਾਰੀ ਬਾਰਡਰ ਸੁਰੱਖਿਆ ਏਜੰਸੀ ਨਾਲ ਵੀ ਸਾਂਝੀ ਕੀਤੀ ਗਈ ਹੈ ਅਤੇ ਅਦਾਲਤੀ ਕਾਰਵਾਈ ਦੌਰਾਨ ਹੀ ਇਨਾਂ੍ਹ ਨੂੰ ਡਿਪੋਰਟ ਕੀਤੇ ਜਾਣ ਦੀ ਕਾਰਵਾਈ ਵੀ ਆਰੰਭੀ ਜਾਏਗੀ।