-ਇੰਨੀ ਵੱਡੀ ਗਿਣਤੀ ਉਮੀਦਵਾਰਾਂ ਕਾਰਨ ਵੋਟਾਂ ਦੀ ਗਿਣਤੀ ਅਤੇ ਨਤੀਜਿਆਂ ਦੇ ਐਲਾਨ ‘ਚ ਲੱਗ ਸਕਦੈ ਸਮਾਂ : ਕੈਨੇਡਾ ਚੋਣ ਕਮਿਸ਼ਨ
ਕੈਲਗਰੀ, 30 ਜੁਲਾਈ (ਪੰਜਾਬ ਮੇਲ)- ਇਸ ਵਾਰ ਕੈਨੇਡਾ ਵਿਚ ਬੈਟਲ ਰਿਵਰ-ਕਰੋਫੁੱਟ ਉਪ-ਚੋਣ ਵਿਚ ਇਤਿਹਾਸ ਰਚਿਆ ਗਿਆ ਹੈ। ਇੱਕ ਸੀਟ ਲਈ ਕੁੱਲ 214 ਉਮੀਦਵਾਰ ਮੈਦਾਨ ਵਿੱਚ ਹਨ, ਜਿਨ੍ਹਾਂ ਵਿੱਚੋਂ 204 ਆਜ਼ਾਦ ਹਨ ਅਤੇ 10 ਰਜਿਸਟਰਡ ਰਾਜਨੀਤਿਕ ਪਾਰਟੀਆਂ ਦੇ ਹਨ। ਇੰਨੀ ਵੱਡੀ ਗਿਣਤੀ ਵਿਚ ਉਮੀਦਵਾਰ ਪਹਿਲਾਂ ਕਦੇ ਕਿਸੇ ਚੋਣ ਵਿਚ ਨਹੀਂ ਦੇਖੇ ਗਏ।
ਇਸ ਕਾਰਨ ਚੋਣ ਕਮਿਸ਼ਨ ਨੇ ਇੱਕ ਵੱਡਾ ਬਦਲਾਅ ਕੀਤਾ ਹੈ। ਹੁਣ ਰਵਾਇਤੀ ਬੈਲਟ ਪੇਪਰ ਦੀ ਬਜਾਏ, ਇੱਕ ”ਅਡਾਪਟੇਡ ਬੈਲਟ ਪੇਪਰ” ਯਾਨੀ ਇੱਕ ਖਾਲੀ ਕਾਗਜ਼ ਦਿੱਤਾ ਜਾਵੇਗਾ, ਜਿਸ ਵਿਚ ਵੋਟਰ ਨੂੰ ਆਪਣੇ ਮਨਪਸੰਦ ਉਮੀਦਵਾਰ ਦਾ ਨਾਮ ਖੁਦ ਲਿਖਣਾ ਹੋਵੇਗਾ। ਭਾਵੇਂ ਨਾਮ ਦੇ ਸਪੈਲਿੰਗ ਵਿਚ ਥੋੜ੍ਹੀ ਜਿਹੀ ਗਲਤੀ ਹੋਵੇ, ਜੇਕਰ ਵੋਟਰ ਦਾ ਇਰਾਦਾ ਸਾਫ਼ ਹੈ, ਤਾਂ ਵੋਟ ਗਿਣੀ ਜਾਵੇਗੀ।
ਜੇਕਰ ਤੁਹਾਨੂੰ ਵੋਟ ਪਾਉਣ ਲਈ ਮਦਦ ਦੀ ਲੋੜ ਹੈ, ਤਾਂ ਕੋਈ ਦੋਸਤ, ਪਰਿਵਾਰਕ ਮੈਂਬਰ ਜਾਂ ਦੇਖਭਾਲ ਕਰਨ ਵਾਲਾ ਤੁਹਾਡੇ ਨਾਲ ਜਾ ਸਕਦਾ ਹੈ। ਚੋਣਾਂ ਵਾਲੇ ਦਿਨ ਬ੍ਰੇਲ ਸੂਚੀਆਂ ਅਤੇ ਬ੍ਰੇਲ ਟੈਂਪਲੇਟ ਵਰਗੀਆਂ ਵਿਸ਼ੇਸ਼ ਸਹੂਲਤਾਂ ਵੀ ਉਪਲਬਧ ਹੋਣਗੀਆਂ, ਤਾਂ ਜੋ ਨੇਤਰਹੀਣ ਵੋਟਰ ਵੀ ਆਸਾਨੀ ਨਾਲ ਆਪਣੀ ਵੋਟ ਪਾ ਸਕਣ।
ਚੋਣ ਕਮਿਸ਼ਨ ਦਾ ਕਹਿਣਾ ਹੈ ਕਿ ਇੰਨੀ ਵੱਡੀ ਗਿਣਤੀ ਵਿਚ ਉਮੀਦਵਾਰਾਂ ਦੇ ਕਾਰਨ, ਵੋਟਾਂ ਦੀ ਗਿਣਤੀ ਅਤੇ ਨਤੀਜਿਆਂ ਦੇ ਐਲਾਨ ਵਿਚ ਸਮਾਂ ਲੱਗ ਸਕਦਾ ਹੈ। ਵੋਟਰ ਜੇਕਰ ਚਾਹੁਣ ਤਾਂ ਆਨਲਾਈਨ ਜਾਂ ਡਾਕ ਰਾਹੀਂ ਵੀ ਵੋਟ ਪਾ ਸਕਦੇ ਹਨ।
ਇਹ ਵਿਲੱਖਣ ਚੋਣ ”ਸਭ ਤੋਂ ਲੰਬੀ ਬੈਲਟ ਕਮੇਟੀ” ਦੀ ਮੁਹਿੰਮ ਦਾ ਨਤੀਜਾ ਹੈ, ਜੋ ਚੋਣ ਸੁਧਾਰਾਂ ਦੀ ਮੰਗ ਕਰ ਰਹੀ ਹੈ। ਹੁਣ ਇਹ ਚਰਚਾ ਸ਼ੁਰੂ ਹੋ ਗਈ ਹੈ ਕਿ ਕੀ ਲੋਕਤੰਤਰ ਵਿਚ ਉਮੀਦਵਾਰਾਂ ਦੀ ਗਿਣਤੀ ਦੀ ਕੋਈ ਸੀਮਾ ਹੋਣੀ ਚਾਹੀਦੀ ਹੈ ਜਾਂ ਨਹੀਂ।