-ਨਿਗਰਾਨੀ ਕਰੇਗਾ ਮੇਟਾ
ਸਾਨ ਫਰਾਂਸਿਸਕੋ, 16 ਅਕਤੂਬਰ (ਪੰਜਾਬ ਮੇਲ)- ਇੰਸਟਾਗ੍ਰਾਮ ‘ਤੇ ਅੱਲ੍ਹੜ ਇਤਰਾਜ਼ਯੋਗ ਕੰਟੈਂਟ ਨਹੀਂ ਦੇਖ ਸਕਣਗੇ। 18 ਸਾਲ ਤੋਂ ਘੱਟ ਉਮਰ ਦੇ ਯੂਜ਼ਰਸ ਦੀ ਮੇਟਾ ਨਿਗਰਾਨੀ ਕਰੇਗੀ। ਤਕਨੀਕ ਦੀ ਮਦਦ ਨਾਲ ਮਾਤਾ-ਪਿਤਾ ਆਪਣੇ ਬੱਚਿਆਂ ਦੀਆਂ ਸਰਗਰਮੀਆਂ ਨੂੰ ਕੰਟਰੋਲ ਕਰ ਸਕਣਗੇ। ਨਵੀਂ ਵਿਵਸਥਾ, ਫਿਲਹਾਲ ਅਮਰੀਕਾ, ਬਰਤਾਨੀਆ, ਆਸਟਰੇਲੀਆ ਤੇ ਕੈਨੇਡਾ ‘ਚ ਲਾਗੂ ਹੋਵੇਗੀ। ਸਾਲ ਦੇ ਅੰਤ ਤੱਕ ਇਸਨੂੰ ਹਰ ਦੇਸ਼ ‘ਚ ਲਾਗੂ ਕਰ ਦਿੱਤਾ ਜਾਵੇਗਾ।
ਮੇਟਾ ਨੇ ਇਹ ਕਦਮ ਅਜਿਹੇ ਸਮੇਂ ‘ਚ ਚੁੱਕਿਆ ਹੈ, ਜਦੋਂ ਉਸ ‘ਤੇ ਅੱਲ੍ਹੜਾਂ ਦੀ ਆਨਲਾਈਨ ਸੁਰੱਖਿਆ ਲਈ ਉਚਿਤ ਕਦਮ ਨਹੀਂ ਚੁੱਕਣ ਤੇ ਆਪਣੇ ਪਲੇਟਫਾਰਮਾਂ ਤੋਂ ਹੋਣ ਵਾਲੇ ਮਨੋਵਿਗਿਆਨਿਕ ਨੁਕਸਾਨ ਦੇ ਬਾਰੇ ਅੱਲ੍ਹੜਾਂ ਨੂੰ ਗੁੰਮਰਾਹ ਕਰਨ ਦੇ ਦੋਸ਼ ਲੱਗ ਰਹੇ ਹਨ। ਮੇਟਾ ਦੇ ਸੀ.ਈ.ਓ. ਮਾਰਕ ਜ਼ੁਕਰਬਰਗ ਤੋਂ ਬੱਚਿਆਂ ਦੀ ਸੁਰੱਖਿਆ ਦੇ ਮੁੱਦੇ ‘ਤੇ ਸੰਸਦ ਮੈਂਬਰਾਂ ਨੇ ਪੁੱਛਗਿੱਛ ਕੀਤੀ ਸੀ। ਮੇਟਾ ‘ਤੇ ਸੂਬੇ ਤੇ ਸੰਘੀ ਅਦਾਲਤ ‘ਚ ਮੁਕੱਦਮੇ ਚੱਲ ਰਹੇ ਹਨ।
ਮੇਟਾ ਦੀ ਮਲਕੀਅਤ ਵਾਲੇ ਇੰਸਟਾਗ੍ਰਾਮ ਨੇ ਕਿਹਾ ਕਿ ਇਸਦੇ ਲਈ ਫਿਲਮ ਇੰਡਸਟਰੀ ਵੱਲੋਂ ਇਸਤੇਮਾਲ ਕੀਤੀ ਜਾਣ ਵਾਲੀ ਪੀਜੀ-13 ਮੂਵੀ ਰੇਟਿੰਗ ਪ੍ਰਣਾਲੀ ਤੋਂ ਪ੍ਰੇਰਿਤ ਫਿਲਟਰਾਂ ਦਾ ਇਸਤੇਮਾਲ ਕੀਤਾ ਜਾਵੇਗਾ। ਅੱਲ੍ਹੜਾਂ ਦੇ ਅਕਾਊਂਟ ਨੂੰ ਆਧੁਨਿਕ ਰੂਪ ਨਾਲ ਪੀਜੀ-13 ਸੈਟਿੰਗਸ ‘ਚ ਪਾ ਦਿੱਤਾ ਜਾਵੇਗਾ, ਜਿਸ ਨੂੰ ਮਾਤਾ-ਪਿਤਾ ਸੀਮਤ ਕੰਟੈਂਟ ਸੈਟਿੰਗ ਐਡਜਸਟ ਕਰ ਸਕਣਗੇ। ਇਸ ਨਾਲ ਅੱਲ੍ਹੜ ਇਤਰਾਜ਼ਯੋਗ ਜਾਂ ਨੁਕਸਾਨਦਾਇਕ ਕੰਟੈਂਟ ਨਹੀਂ ਦੇਖ ਸਕਣਗੇ। ਮੇਟਾ ਫੇਸਬੁੱਕ ‘ਤੇ ਅੱਲ੍ਹੜਾਂ ਲਈ ਹੋਰ ਵੀ ਸੁਰੱਖਿਆ ਉਪਾਅ ਪੇਸ਼ ਕਰੇਗੀ।
ਮੋਸ਼ਨ ਪਿਕਚਰ ਐਸੋਸੀਏਸ਼ਨ ਦੀ ਰੇਟਿੰਗਸ ‘ਤੇ ਆਧਾਰਿਤ ਇਹ ਨਵੀਂ ਪ੍ਰਣਾਲੀ ਇਤਰਾਜ਼ਯੋਗ ਭਾਸ਼ਾ, ਖਤਰੇ ਭਰੇ ਸਟੰਟ, ਨਸ਼ੀਲੇ ਪਦਾਰਥਾਂ ਦੇ ਸੰਦਰਭ ਜਾਂ ਹੋਰ ਇਤਰਾਜ਼ਯੋਗ ਪੋਸਟ ਨੂੰ ਪਾਬੰਦੀਸ਼ੁਦਾ ਕਰੇਗੀ। ਇਹ ਨਿਯਮ ਉਸਦੇ ਜਨਰੇਟਿਵ ਏ.ਆਈ. ਟੂਲਸ ‘ਤੇ ਵੀ ਲਾਗੂ ਹੋਣਗੇ।
ਕਿਸੇ ਫਿਲਮ ਨੂੰ ਪੀਜੀ-13 ਰੇਟਿੰਗ ਉਦੋਂ ਦਿੱਤੀ ਜਾਂਦੀ ਹੈ, ਜਦੋਂ ਮਾਤਾ-ਪਿਤਾ ਦਾ ਇਕ ਪੈਨਲ ਇਸ ਗੱਲ ‘ਤੇ ਵੋਟ ਕਰਦਾ ਹੈ ਕਿ ਉਹ ਫਿਲਮ ਬੱਚਿਆਂ ਲਈ ਸਹੀ ਹੈ ਜਾਂ ਨਹੀਂ। ਆਪਣੀ ਨਵੀਂ ਨੀਤੀ ਲਈ ਇੰਸਟਾਗ੍ਰਾਮ ਨੇ ਵੀ ਇਸ ਤਰ੍ਹਾਂ ਦੀ ਪ੍ਰਕਿਰਿਆ ਅਪਣਾਈ। ਮੇਟਾ ਨੇ ਬਲਾਗ ਪੋਸਟ ‘ਚ ਕਿਹਾ ਕਿ ਉਮੀਦ ਹੈ ਕਿ ਇਹ ਅਪਡੇਟ ਮਾਤਾ-ਪਿਤਾ ਨੂੰ ਭਰੋਸਾ ਦੇਵੇਗਾ। ਅਸੀਂ ਜਾਣਦੇ ਹਾਂ ਕਿ ਅੱਲ੍ਹੜ ਇਨ੍ਹਾਂ ਪਾਬੰਦੀਆਂ ਤੋਂ ਬਚਣ ਦੀ ਕੋਸ਼ਿਸ਼ ਕਰ ਸਕਦੇ ਹਨ, ਇਸ ਲਈ ਉਮਰ ਦਾ ਅਨੁਮਾਨ ਤਕਨੀਕ ਦੀ ਵਰਤੋਂ ਨਾਲ ਕੀਤਾ ਜਾਵੇਗਾ।
ਅੱਲ੍ਹੜਾਂ ਲਈ ਹੁਣ ਅਡਲਟ ਕੰਟੈਂਟ ਦੀ ਸਰਗਰਮ ਖੋਜ ਕਰਨਾ ਵੀ ਮੁਸ਼ਕਲ ਹੋ ਜਾਏਗਾ ਤੇ ਉਨ੍ਹਾਂ ਨੂੰ ਕੁਝ ਖਾਸ ਅਕਾਊਂਟਸ ਨਾਲ ਪੂਰੀ ਤਰ੍ਹਾਂ ਨਾਲ ਜੁੜਨ ਤੋਂ ਰੋਕਿਆ ਜਾ ਸਕੇਗਾ। ਐਪ ‘ਚ ਸੀਮਤ ਕੰਟੈਂਟ ਨਾਂ ਦੀ ਇਕ ਸੈਟਿੰਗ ਵੀ ਸਾਮਲ ਕੀਤੀ ਜਾਵੇਗੀ, ਜਿਸਨੂੰ ਮਾਤਾ-ਪਿਤਾ ਐਕਟਿਵ ਕਰ ਸਕਦੇ ਹਨ। ਇਹ ਪੀਜੀ-13 ਰੇਟਿੰਗ ਸਿਸਟਮ ਤੋਂ ਵੀ ਜ਼ਿਆਦਾ ਸਖ਼ਤ ਹੈ।