ਬੋਇਸ (ਅਮਰੀਕਾ), 30 ਜੂਨ (ਪੰਜਾਬ ਮੇਲ)- ਅਮਰੀਕਾ ਵਿਖੇ ਉੱਤਰੀ ਆਇਡਾਹੋ ਦੇ ਇੱਕ ਪਹਾੜੀ ਖੇਤਰ ਵਿਚ ਅੱਗ ‘ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕਰ ਰਹੇ ਫਾਇਰਫਾਈਟਰਾਂ ‘ਤੇ ਬੰਦੂਕਧਾਰੀਆਂ ਨੇ ਹਮਲਾ ਕਰ ਦਿੱਤਾ, ਜਿਸ ਵਿਚ ਘੱਟੋ-ਘੱਟ ਦੋ ਲੋਕ ਮਾਰੇ ਗਏ। ਆਇਡਾਹੋ ਦੇ ਗਵਰਨਰ ਬ੍ਰੈਡ ਲਿਟਲ ਨੇ ਇਸਨੂੰ ”ਘਿਨਾਉਣਾ” ਹਮਲਾ ਕਿਹਾ। ਕੂਟੇਨਾਈ ਕਾਉਂਟੀ ਸ਼ੈਰਿਫ਼ ਦੇ ਦਫ਼ਤਰ ਨੇ ਕਿਹਾ ਕਿ ਦੁਪਹਿਰ 1:30 ਵਜੇ (ਸਥਾਨਕ ਸਮੇਂ ਅਨੁਸਾਰ) ਕੋਇਰ ਡੀ’ਐਲੇਨ ਦੇ ਉੱਤਰ ਵਿਚ ‘ਕੈਨਫੀਲਡ ਮਾਉਂਟੇਨ’ ‘ਤੇ ਅੱਗ ਲੱਗਣ ਦੀ ਰਿਪੋਰਟ ਮਿਲਣ ਤੋਂ ਬਾਅਦ ਕਰਮਚਾਰੀ ਮੌਕੇ ‘ਤੇ ਪਹੁੰਚੇ ਅਤੇ ਲਗਭਗ ਅੱਧੇ ਘੰਟੇ ਬਾਅਦ ਗੋਲੀਬਾਰੀ ਦੀ ਆਵਾਜ਼ ਸੁਣਾਈ ਦਿੱਤੀ।
ਸ਼ੈਰਿਫ਼ ਬੌਬ ਨੌਰਿਸ ਨੇ ਕਿਹਾ ਕਿ ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਦੋਵੇਂ ਮ੍ਰਿਤਕ ਫਾਇਰਫਾਈਟਰ ਸਨ। ਨੌਰਿਸ ਨੇ ਕਿਹਾ ਕਿ ਉਸਨੂੰ ਨਹੀਂ ਪਤਾ ਕਿ ਕਿਸੇ ਹੋਰ ਨੂੰ ਗੋਲੀ ਲੱਗੀ ਹੈ ਜਾਂ ਨਹੀਂ। ਨੌਰਿਸ ਨੇ ਇੱਕ ਨਿਊਜ਼ ਕਾਨਫਰੰਸ ਵਿਚ ਕਿਹਾ, ”ਸਾਨੂੰ ਨਹੀਂ ਪਤਾ ਕਿ ਉੱਥੇ ਕਿੰਨੇ ਸ਼ੱਕੀ ਹਨ ਅਤੇ ਸਾਨੂੰ ਮੌਤਾਂ ਦੀ ਗਿਣਤੀ ਨਹੀਂ ਪਤਾ।” ਸ਼ੈਰਿਫ਼ ਨੇ ਕਿਹਾ ਕਿ ਲੋਕ ਅਜੇ ਵੀ ਪਹਾੜੀ ਤੋਂ ਹੇਠਾਂ ਆ ਰਹੇ ਸਨ, ਇਸ ਲਈ ਇਹ ਮੰਨਿਆ ਜਾਂਦਾ ਹੈ ਕਿ ”ਉੱਥੇ ਅਜੇ ਵੀ ਕੁਝ ਲੋਕ ਫਸੇ ਹੋ ਸਕਦੇ ਹਨ।” ਗਵਰਨਰ ਬ੍ਰੈਡ ਲਿਟਲ ਨੇ ਕਿਹਾ ਕਿ ”ਕਈ” ਫਾਇਰਫਾਈਟਰਾਂ ‘ਤੇ ਹਮਲਾ ਕੀਤਾ ਗਿਆ ਸੀ। ਲਿਟਲ ਨੇ ਟਵਿੱਟਰ ‘ਤੇ ਪੋਸਟ ਕੀਤਾ, ”ਇਹ ਸਾਡੇ ਬਹਾਦਰ ਫਾਇਰਫਾਈਟਰਾਂ ‘ਤੇ ਇੱਕ ਘਿਨਾਉਣਾ ਹਮਲਾ ਹੈ। ਮੈਂ ਸਾਰੇ ਇਡਾਹੋ ਨਿਵਾਸੀਆਂ ਨੂੰ ਉਨ੍ਹਾਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਲਈ ਪ੍ਰਾਰਥਨਾ ਕਰਨ ਲਈ ਕਹਿੰਦਾ ਹਾਂ।”