ਵਾਸ਼ਿੰਗਟਨ, 23 ਅਕਤੂਬਰ (ਪੰਜਾਬ ਮੇਲ)- ਅਮਰੀਕੀ ਸਰਕਾਰ ਦੀ ਤਾਲਾਬੰਦੀ ਚੌਥੇ ਹਫ਼ਤੇ ‘ਚ ਦਾਖਲ ਹੋ ਗਈ ਹੈ ਅਤੇ ਸੱਤਾਧਾਰੀ ਰਿਪਬਲਿਕਨਾਂ ਤੇ ਡੈਮੋਕਰੇਟਸ ਵਿਚਾਲੇ ਬਣਿਆ ਜਮੂਦ ਅਜੇ ਵੀ ਬਰਕਰਾਰ ਹੈ। ਰਿਪਬਲਿਕਨ ਸੈਨੇਟਰਾਂ ਨੇ ਵ੍ਹਾਈਟ ਹਾਊਸ ਵੱਲ ਰੁਖ਼ ਕੀਤਾ ਹੈ। ਸੈਨੇਟਰ ਤਾਲਾਬੰਦੀ ਨੂੰ ਖਤਮ ਕਰਨ ਦੇ ਢੰਗ-ਤਰੀਕੇ ਬਾਰੇ ਜ਼ਰੂਰੀ ਗੱਲਬਾਤ ਲਈ ਨਹੀਂ, ਸਗੋਂ ਰਾਸ਼ਟਰਪਤੀ ਡੋਨਲਡ ਟਰੰਪ ਨਾਲ ਇਕਜੁੱਟਤਾ ਦਿਖਾਉਣ ਲਈ ਵ੍ਹਾਈਟ ਹਾਊਸ ਪਹੁੰਚ ਰਹੇ ਹਨ। ਸੱਤਾਧਾਰੀ ਪਾਰਟੀ ਦੇ ਇਹ ਸੈਨੇਟਰ ਕਿਸੇ ਵੀ ਡੈਮੋਕ੍ਰੇਟਿਕ ਮੰਗ ‘ਤੇ ਗੱਲਬਾਤ ਕਰਨ ਤੋਂ ਇਨਕਾਰੀ ਹਨ। ਉਧਰ, ਡੈਮੋਕਰੇਟਿਕ ਪਾਰਟੀ ਦੇ ਸੈਨੇਟਰਾਂ ਨੂੰ ਵੀ ਸਦਨ ਵੱਲੋਂ ਪਾਸ ਕੀਤੇ ਗਏ ਬਿੱਲ ਦੇ ਵਿਰੁੱਧ ਵੋਟਿੰਗ ਜਾਰੀ ਰੱਖਣ ਦੀ ਆਪਣੀ ਰਣਨੀਤੀ ‘ਤੇ ਭਰੋਸਾ ਹੈ। ਦੋਵਾਂ ਧਿਰਾਂ ਵੱਲੋਂ ਵਿਰੋਧ ਦਾ ਕੋਈ ਸੰਕੇਤ ਨਾ ਦਿਖਾਉਣ ਕਰਕੇ ਅਜੇ ਇਹ ਸਪੱਸ਼ਟ ਨਹੀਂ ਹੈ ਕਿ ਤਾਲਾਬੰਦੀ ਨੂੰ ਲੈ ਕੇ ਬਣਿਆ ਜਮੂਦ ਕਿੰਨਾ ਚਿਰ ਜਾਰੀ ਰਹੇਗਾ; ਹਾਲਾਂਕਿ ਤਾਲਾਬੰਦੀ ਕਰ ਕੇ ਆਉਣ ਵਾਲੇ ਦਿਨਾਂ ਵਿਚ ਲੱਖਾਂ ਸੰਘੀ ਕਰਮਚਾਰੀ ਇੱਕ ਹੋਰ ਤਨਖਾਹ ਤੋਂ ਵਿਰਵੇਂ ਹੋ ਜਾਣਗੇ।