ਦਿੱਲੀ ਦਾ ਘੱਟੋ-ਘੱਟ ਤਾਪਮਾਨ 9.6 ਡਿਗਰੀ ਸੈਲਸੀਅਸ ਦਰਜ

ਨਵੀਂ ਦਿੱਲੀ, 23 ਦਸੰਬਰ (ਪੰਜਾਬ ਮੇਲ)- ਉੱਤਰੀ ਭਾਰਤ ਦੇ ਖੇਤਰਾਂ ਵਿਚ ਡਿੱਗਦੇ ਤਾਪਮਾਨ ਦੇ ਪ੍ਰਭਾਵ ਦੇ ਨਾਲ ਕੌਮੀ ਰਾਜਧਾਨੀ ਦਿੱਲੀ ਵਿਚ ਸੰਘਣੀ ਧੁੰਦ ਛਾਈ ਰਹੀ, ਜਿਸ ਨਾਲ ਉਡਾਣਾਂ ਪ੍ਰਭਾਵਿਤ ਹੋਈਆਂ। ਘਟੀ ਹੋਈ ਪਾਰਦਰਸ਼ਤਾ ਕਾਰਨ ਦਿੱਲੀ ਹਵਾਈ ਅੱਡੇ ‘ਤੇ ਫਲਾਈਟ ਦੇ ਸਮਾਂ-ਸਾਰਣੀ ਵਿਚ ਮਹੱਤਵਪੂਰਨ ਗੜਬੜੀ ਆਈ, ਜਿੱਥੇ ਫਲਾਈਟ ਇਨਫਰਮੇਸ਼ਨ ਡਿਸਪਲੇਅ ਸਿਸਟਮ ਨੇ 11 ਕੌਮਾਂਤਰੀ ਅਤੇ ਪੰਜ ਘਰੇਲੂ ਉਡਾਣਾਂ ਲਈ ਦੇਰੀ ਦੀ ਰਿਪੋਰਟ ਕੀਤੀ। ਭਾਰਤੀ ਮੌਸਮ ਵਿਭਾਗ ਅਨੁਸਾਰ ਦਿੱਲੀ ਦਾ ਘੱਟੋ-ਘੱਟ ਤਾਪਮਾਨ 9.6 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ, ਜੋ ਕਿ ਸੀਜ਼ਨ ਦੀ ਔਸਤ ਤੋਂ ਦੋ ਡਿਗਰੀ ਵੱਧ ਹੈ। ਦਿਨ ਦੌਰਾਨ ਦਰਮਿਆਨੀ ਧੁੰਦ ਛਾਈ ਰਹੀ ਜੋ ਸ਼ਾਮ ਨੂੰ ਫਿਰ ਸੰਘਣੀ ਹੋ ਗਈ। ਵੱਧ ਤੋਂ ਵੱਧ ਤਾਪਮਾਨ 23 ਡਿਗਰੀ ਸੈਲਸੀਅਸ ਸੀ। ਧੁੰਦ ਦਾ ਅਸਰ ਰੇਲਵੇ ਸੰਚਾਲਨ ਉਪਰ ਵੀ ਪਿਆ। ਧੁੰਦ ਕਾਰਨ ਮਾਲਵਾ ਐਕਸਪ੍ਰੈੱਸ, ਸੱਚਖੰਡ ਐਕਸਪ੍ਰੈੱਸ ਤੇ ਪੱਛਮ ਐਕਸਪ੍ਰੈੱਸ ਤੇ ਹੋਰ ਰੇਲ ਗੱਡੀਆਂ ਇੱਕ ਘੰਟੇ ਤੋਂ ਲੈ ਕੇ ਡੇਢ ਘੰਟੇ ਦੀ ਦੇਰੀ ਨਾਲ ਆਪਣੀਆਂ ਮੰਜ਼ਿਲਾਂ ‘ਤੇ ਪਹੁੰਚੀਆਂ।