ਸੈਕਰਾਮੈਂਟੋ, 12 ਦਸੰਬਰ  ਕੈਲੀਫੋਰਨੀਆ (ਹੁਸਨ ਲੜੋਆ ਬੰਗਾ/ਪੰਜਾਬ ਮੇਲ)- ਰਾਸ਼ਾਟਰਪਤੀ ਡੋਨਲਡ  ਟਰੰਪ ਨੇ ਕਿਹਾ ਹੈ ਕਿ ਮੈਕਸੀਕੋ ਨੂੰ ਸੰਧੀ ਤਹਿਤ ਹੋਰ ਪਾਣੀ ਛੱਡਣਾ ਪਵੇਗਾ ਤੇ ਜੇਕਰ ਉਹ ਅਜਿਹਾ ਨਹੀਂ ਕਰਦਾ ਤਾਂ ਦਰਾਮਦ ਉਪਰ 5% ਹੋਰ ਟੈਰਿਫ ਲਈ ਤਿਆਰ ਰਹੇ। ਟਰੰਪ ਨੇ ਕਿਹਾ ਹੈ ਕਿ ਇਸ ਸਾਲ ਦੇ ਅੰਤ ਤੱਕ ਮੈਕਸੀਕੋ ਨੂੰ ਹਰ ਹਾਲਤ ਵਿੱਚ ਹੋਰ ਪਾਣੀ ਛੱਡਣਾ ਪਵੇਗਾ। 1944 ਦੀ ਸੰਧੀ ਅਨੁਸਾਰ ਮੈਕਸੀਕੋ ਨੂੰ ਰੀਓ ਗਰਾਂਡੇ ਦਰਿਆ ਤੋਂ 5 ਸਾਲਾਂ ਵਿੱਚ 1.75 ਮਿਲੀਅਨ ਏਕੜ ਫੁੱਟ ਪਾਣੀ ਛੱਡਣਾ ਜਰੂਰੀ ਹੁੰਦਾ ਹੈ। ਇਹ ਪਾਣੀ ਅੰਤਰਸੰਪਰਕ ਡੈਮਾਂ ਤੇ ਪਾਣੀ ਦੇ ਭੰਡਾਰਾਂ ਦੇ ਨੈੱਟਵਰਕ ਰਾਹੀਂ ਛੱਡਿਆ ਜਾਂਦਾ ਹੈ। ਟਰੰਪ ਨੇ ਸ਼ੋਸਲ ਮੀਡੀਆ ਉਪਰ ਕਿਹਾ ਹੈ ਕਿ ਪਾਣੀ ਦੀ ਘਾਟ ਕਾਰਨ ਟੈਕਸਾਸ ਵਿੱਚ ਫਸਲਾਂ ਸੁੱਕ ਰਹੀਆਂ ਹਨ ਤੇ ਪਸ਼ੂਆਂ ਦੇ ਪੀਣ ਲਈ ਪਾਣੀ ਨਹੀਂ ਹੈ। ਉਨਾਂ ਕਿਹਾ ਹੈ ਕਿ ਮੈਕਸੀਕੋ ਨੇ 8 ਲੱਖ ਏਕੜ ਫੁੱਟ ਪਾਣੀ ਘੱਟ ਛੱਡਿਆ ਹੈ ਜਿਸ ਵਿਚੋਂ 2 ਲੱਖ  ਏਕੜ ਪਾਣੀ 31 ਦਸੰਬਰ ਤੱਕ ਛੱਡਿਆ ਜਾਵੇ। ਰਾਸ਼ਟਰਪਤੀ ਨੇ ਕਿਹਾ ਕਿ ਜੇਕਰ ਉਹ ਪਾਣੀ ਛੱਡਣ ਵਿੱਚ ਦੇਰੀ ਕਰਦਾ ਹੈ ਤਾਂ ਇਸ ਨਾਲ ਕਿਸਾਨਾਂ ਨੂੰ ਨੁਕਸਾਨ ਝਲਣਾ ਪਵੇਗਾ, ਇਸ ਲਈ ਮੈਕਸੀਕੋ ਨੂੰ 5% ਟੈਰਿਫ ਲਾ ਕੇ ਜਵਾਬ ਦਿੱਤਾ ਜਾਵੇਗਾ। ਉਨਾਂ ਕਿਹਾ ਕਿ ਸੰਧੀ ਤਹਿਤ ਮੈਕਸੀਕੋ ਨੂੰ ਪਾਣੀ ਛੱਡਣਾ ਹੀ ਪਵੇਗਾ।