ਯਾਤਰੀ ਹਵਾਈ ਅੱਡੇ ਤੋਂ ਪਹਿਲਾਂ ਹੀ ਕਰ ਸਕਣਗੇ ਟੀ.ਐੱਸ.ਏ. ਚੈਕਿੰਗ
ਬੋਸਟਨ, 20 ਮਈ (ਪੰਜਾਬ ਮੇਲ)- ਬੋਸਟਨ ਲੋਗਨ ਅੰਤਰਰਾਸ਼ਟਰੀ ਹਵਾਈ ਅੱਡਾ ‘ਤੇ ਅਮਰੀਕਾ ਦਾ ਪਹਿਲਾ ”ਰਿਮੋਟ ਏਅਰਪੋਰਟ ਟਰਮੀਨਲ” ਸ਼ੁਰੂ ਕਰਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ, ਜਿਸ ਨਾਲ ਯਾਤਰੀਆਂ ਨੂੰ ਹਵਾਈ ਅੱਡੇ ਦੀਆਂ ਲੰਬੀਆਂ ਸੁਰੱਖਿਆ ਲਾਈਨਾਂ ਤੋਂ ਵੱਡੀ ਰਾਹਤ ਮਿਲ ਸਕਦੀ ਹੈ। ਇਹ ਨਵਾਂ ਪਾਇਲਟ ਪ੍ਰੋਗਰਾਮ 1 ਜੂਨ 2026 ਤੋਂ ਸ਼ੁਰੂ ਹੋਵੇਗਾ ਅਤੇ ਇਸਨੂੰ ”ਸਟਰੇਟ ਟੂ ਗੇਟ” ਨਾਮ ਦਿੱਤਾ ਗਿਆ ਹੈ।
ਇਸ ਪ੍ਰੋਜੈਕਟ ਤਹਿਤ ਯਾਤਰੀ ਹਵਾਈ ਅੱਡੇ ਤੋਂ ਲਗਭਗ 25 ਮੀਲ ਦੂਰ ਸਥਿਤ ਫਰੇਮਿੰਘਮ ਲੋਗਨ ਐਕਸਪ੍ਰੈੱਸ ਟਰਮੀਨਲ ‘ਤੇ ਹੀ ਆਪਣੀ ਟੀ.ਐੱਸ.ਏ. ਸੁਰੱਖਿਆ ਜਾਂਚ, ਸਾਮਾਨ ਚੈੱਕ-ਇਨ ਅਤੇ ਬੋਰਡਿੰਗ ਪ੍ਰਕਿਰਿਆ ਪੂਰੀ ਕਰ ਸਕਣਗੇ। ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਖਾਸ ਸੁਰੱਖਿਅਤ ਲੋਕਲ ਬੱਸ ਰਾਹੀਂ ਸਿੱਧਾ ਏਅਰਪੋਰਟ ਦੇ ਸੁਰੱਖਿਅਤ ਖੇਤਰ ਵਿਚ ਉਨ੍ਹਾਂ ਦੇ ਗੇਟ ਕੋਲ ਪਹੁੰਚਾਇਆ ਜਾਵੇਗਾ।
ਇਸ ਯੋਜਨਾ ਨੂੰ ਮਾਸਪੋਰਟ ਵੱਲੋਂ ਸ਼ੁਰੂ ਕੀਤਾ ਜਾ ਰਿਹਾ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਸ ਨਾਲ ਲੋਗਨ ਏਅਰਪੋਰਟ ‘ਤੇ ਵੱਧ ਰਹੀਆਂ ਸਕਿਓਰਿਟੀ ਲਾਈਨਜ਼ ਅਤੇ ਆਵਾਜਾਈ ਭੀੜ ਨੂੰ ਘਟਾਉਣ ਵਿਚ ਮਦਦ ਮਿਲੇਗੀ। ਖਾਸ ਤੌਰ ‘ਤੇ ਸਵੇਰੇ ਦੇ ਭੀੜ-ਭੜੱਕੇ ਵਾਲੇ ਘੰਟੇ ਦੌਰਾਨ ਯਾਤਰੀਆਂ ਨੂੰ ਵੱਡੀ ਸਹੂਲਤ ਮਿਲਣ ਦੀ ਉਮੀਦ ਹੈ।
ਸ਼ੁਰੂਆਤੀ ਪੜਾਅ ਵਿਚ ਇਹ ਸੇਵਾ ਸਿਰਫ਼ ਡੈਲਟਾ ਏਅਰ ਲਾਈਨਜ਼ ਅਤੇ ਜੈੱਟਬਲੂ ਦੀਆਂ ਕੁਝ ਚੁਣਿੰਦਾ ਉਡਾਣਾਂ ਲਈ ਉਪਲਬਧ ਹੋਵੇਗੀ। ਹਰ ਸੁਰੱਖਿਅਤ ਬੱਸ ਵਿਚ ਲਗਭਗ 55 ਯਾਤਰੀ ਸਫ਼ਰ ਕਰ ਸਕਣਗੇ ਅਤੇ ਇਹ ਸੇਵਾ ਸਵੇਰੇ 4 ਵਜੇ ਤੋਂ ਦੁਪਹਿਰ 1 ਵਜੇ ਤੱਕ ਚਲਾਈ ਜਾਵੇਗੀ।
ਮਾਹਿਰਾਂ ਮੁਤਾਬਕ ਜੇ ਇਹ ਪ੍ਰੋਗਰਾਮ ਸਫਲ ਰਹਿੰਦਾ ਹੈ, ਤਾਂ ਭਵਿੱਖ ਵਿਚ ਅਮਰੀਕਾ ਦੇ ਹੋਰ ਵੱਡੇ ਹਵਾਈ ਅੱਡਿਆਂ ‘ਤੇ ਵੀ ਇਸ ਤਰ੍ਹਾਂ ਦੇ ਰਿਮੋਟ ਟਰਮੀਨਲ ਬਣਾਏ ਜਾ ਸਕਦੇ ਹਨ। ਯਾਤਰੀਆਂ ਲਈ ਇਹ ਮਾਡਲ ਸਮਾਂ ਬਚਾਉਣ ਅਤੇ ਯਾਤਰਾ ਨੂੰ ਹੋਰ ਆਸਾਨ ਬਣਾਉਣ ਵੱਲ ਇਕ ਵੱਡਾ ਕਦਮ ਮੰਨਿਆ ਜਾ ਰਿਹਾ ਹੈ।