ਵਾਸ਼ਿੰਗਟਨ, 23 ਸਤੰਬਰ (ਪੰਜਾਬ ਮੇਲ)- ਕਮਲਾ ਹੈਰਿਸ ਨੇ ਕਿਹਾ ਕਿ ਉਸ ਨੂੰ ਰਾਸ਼ਟਰਪਤੀ ਜੋਅ ਬਾਇਡਨ ਦੇ ਦੂਜੇ ਕਾਰਜਕਾਲ ਲਈ ਚੋਣ ਲੜਨ ਦੇ ਫੈਸਲੇ ਖਿਲਾਫ਼ ਆਪਣੀਆਂ ਚਿੰਤਾਵਾਂ ਜ਼ਾਹਰ ਨਾ ਕਰਨ ਦਾ ਅਫ਼ਸੋਸ ਹੈ, ਜਦੋਂ ਬਹੁਤੇ ਅਮਰੀਕੀਆਂ ਨੂੰ ਲੱਗਦਾ ਸੀ ਕਿ ਉਹ ਇਸ ਅਹੁਦੇ ਲਈ ਬਹੁਤ ਉਮਰਦਰਾਜ਼ ਹਨ।
ਹੈਰਿਸ ਨੇ ਚੋਣਾਂ ਤੋਂ ਬਾਅਦ ਆਪਣੇ ਪਹਿਲੇ ਲਾਈਵ ਟੈਲੀਵਿਜ਼ਨ ਇੰਟਰਵਿਊ ‘ਚ ਰਕੇਲ ਮੈਡੋ ਨੂੰ ਕਿਹਾ, ”ਮੇਰੀ ਇੱਕ ਖਾਸ ਜ਼ਿੰਮੇਵਾਰੀ ਹੈ ਅਤੇ ਸੀ, ਜਿਸ ਦੀ ਮੈਨੂੰ ਪਾਲਣਾ ਕਰਨੀ ਚਾਹੀਦੀ ਸੀ।” ਸਾਬਕਾ ਉਪ ਰਾਸ਼ਟਰਪਤੀ ਤੇ ਡੈਮੋਕਰੈਟਿਕ ਆਗੂ ਦੀਆਂ ਇਹ ਟਿੱਪਣੀਆਂ ਉਨ੍ਹਾਂ ਦੀ ਕਿਤਾਬ ‘107 ਡੇਜ਼’ ਵਿਚਲੇ ਇਕ ਅੰਸ਼ ‘ਤੇ ਆਧਾਰਿਤ ਹਨ, ਜਿਸ ਵਿਚ ਉਨ੍ਹਾਂ 2024 ਦੇ ਡੈਮੋਕਰੈਟਿਕ ਰਾਸ਼ਟਰਪਤੀ ਅਹੁਦੇ ਦੇ ਉਮੀਦਵਾਰ ਦੇ ਰੂਪ ‘ਚ ਬਾਇਡਨ ਦੇ ਦੌੜ ‘ਚੋਂ ਬਾਹਰ ਹੋਣ ਮਗਰੋਂ ਉਨ੍ਹਾਂ ਦੀ ਥਾਂ ਲੈਣ ਦੇ ਆਪਣੇ ਤਜ਼ਰਬੇ ‘ਤੇ ਚਾਨਣਾ ਪਾਇਆ ਹੈ। ਹੈਰਿਸ ਉਦੋਂ ਰਿਪਬਲਿਕਨ ਉਮੀਦਵਾਰ ਡੋਨਲਡ ਟਰੰਪ ਕੋਲੋਂ ਹਾਰ ਗਈ ਸੀ।
ਹੈਰਿਸ ਨੇ ਕਿਤਾਬ ਵਿਚ ਡੈਮੋਕਰੈਟਿਕ ਰਾਸ਼ਟਰਪਤੀ ਅਤੇ ਪਹਿਲੀ ਮਹਿਲਾ ਦਾ ਹਵਾਲਾ ਦਿੰਦੇ ਹੋਏ ਲਿਖਿਆ ਕਿ ਵ੍ਹਾਈਟ ਹਾਊਸ ਵਿਚ ਹਰ ਕੋਈ ਕਹੇਗਾ ਕਿ ‘ਇਹ ਜੋਅ ਅਤੇ ਜਿਲ ਦਾ ਫੈਸਲਾ ਹੈ ਕਿ ਉਹ ਦੁਬਾਰਾ ਚੋਣ ਲੜ ਰਹੇ ਹਨ।’ ਹੈਰਿਸ ਨੇ ਲਿਖਿਆ, ”ਕੀ ਇਹ ਸ਼ਾਲੀਨਤਾ ਸੀ ਜਾਂ ਅਣਗਹਿਲੀ? ਪਿੱਛੇ ਮੁੜ ਕੇ ਦੇਖਣ ‘ਤੇ ਮੈਨੂੰ ਲੱਗਦਾ ਹੈ ਕਿ ਇਹ ਅਣਗਹਿਲੀ ਹੀ ਸੀ।”
ਉਨ੍ਹਾਂ ਕਿਹਾ, ”ਦਾਅ ਬਹੁਤ ਵੱਡਾ ਸੀ। ਇਹ ਇਕ ਅਜਿਹੀ ਚੋਣ ਨਹੀਂ ਸੀ, ਜਿਸ ਨੂੰ ਕਿਸੇ ਵਿਅਕਤੀ ਦੀ ਹਉਮੈ, ਕਿਸੇ ਵਿਅਕਤੀ ਦੀ ਲਾਲਸਾ ਉੱਤੇ ਛੱਡ ਦੇਣਾ ਚਾਹੀਦਾ ਸੀ। ਇਹ ਇਕ ਵਿਅਕਤੀਗਤ ਫੈਸਲੇ ਤੋਂ ਵੱਧ ਕੇ ਹੋਣਾ ਚਾਹੀਦਾ ਸੀ।”
ਇੰਟਰਵਿਊ ‘ਚ ਹੈਰਿਸ ਨੇ ਕਿਹਾ, ”ਜਦੋਂ ਮੈਂ ਅਣਗਹਿਲੀ ਦੀ ਗੱਲ ਕਰਦੀ ਹਾਂ, ਤਾਂ ਮੈਂ ਆਪਣੇ ਬਾਰੇ ਹੀ ਗੱਲ ਕਰ ਰਹੀ ਹੁੰਦੀ ਹਾਂ।” ਹੈਰਿਸ ਨੇ ਕਿਹਾ ਕਿ ਉਨ੍ਹਾਂ ਨੂੰ ਫ਼ਿਕਰ ਸੀ ਕਿ ਜੇ ਉਨ੍ਹਾਂ ਬਾਇਡਨ ਨੂੰ ਮੁੜ ਚੋਣ ਨਾ ਲੜਨ ਦੀ ਸਲਾਹ ਦਿੱਤੀ, ਤਾਂ ‘ਇਹ ਪੂਰੀ ਤਰ੍ਹਾਂ ਨਾਲ ਸੁਆਰਥੀ ਸਾਬਤ ਹੋਵੇਗਾ।”
ਹੈਰਿਸ ਨੇ 2020 ਵਿਚ ਪਾਰਟੀ ਦੀ ਨਾਮਜ਼ਦਗੀ ਲਈ ਬਾਇਡਨ ਖਿਲਾਫ਼ ਚੋੜ ਲੜੀ ਸੀ ਤੇ ਉਹ ਉਪ ਰਾਸ਼ਟਰਪਤੀ ਦੇ ਅਹੁਦੇ ਲਈ ਮੁੜ ਤੋਂ ਚੋਣ ਲੜਨ ਦੀ ਚੰਗੀ ਸਥਿਤੀ ਵਿਚ ਸੀ।