ਸੈਕਰਾਮੈਂਟੋ, 29 ਮਈ (ਪੰਜਾਬ ਮੇਲ)- ਕੈਲੀਫੋਰਨੀਆ ਵਿਚ 2 ਜੂਨ ਨੂੰ ਹੋਣ ਵਾਲੀ ਪ੍ਰਾਇਮਰੀ ਚੋਣ ਤੋਂ ਕੁਝ ਦਿਨ ਪਹਿਲਾਂ ਜਾਰੀ ਹੋਏ ਇੱਕ ਨਵੇਂ ਸਰਵੇ ਨੇ ਗਵਰਨਰ ਦੀ ਦੌੜ ਨੂੰ ਹੋਰ ਵੀ ਦਿਲਚਸਪ ਬਣਾ ਦਿੱਤਾ ਹੈ। ਸਰਵੇ ਮੁਤਾਬਕ, ਡੈਮੋਕ੍ਰੈਟ ਉਮੀਦਵਾਰ ਜ਼ੈਵੀਅਰ ਬਸੇਰਾ 23 ਫੀਸਦੀ ਸਮਰਥਨ ਨਾਲ ਪਹਿਲੇ ਸਥਾਨ ‘ਤੇ ਹਨ, ਜਦਕਿ ਰਿਪਬਲਿਕਨ ਉਮੀਦਵਾਰ ਸਟੀਵ ਹਿਲਟਨ 20 ਫੀਸਦੀ ਨਾਲ ਦੂਜੇ ਸਥਾਨ ‘ਤੇ ਹਨ।
ਪਬਲਿਕ ਪਾਲਿਸੀ ਇੰਸਟੀਚਿਊਟ ਆਫ ਕੈਲੀਫੋਰਨੀਆ (ਪੀ.ਪੀ.ਆਈ.ਸੀ) ਵੱਲੋਂ ਜਾਰੀ ਕੀਤੇ ਗਏ ਇਸ ਸਰਵੇ ਅਨੁਸਾਰ, ਮੌਸਮੀ ਤਬਦੀਲੀ ਕਾਰਕੁਨ ਅਤੇ ਅਰਬਪਤੀ ਕਾਰੋਬਾਰੀ ਟੌਮ ਸਟੇਅਰ 15 ਫੀਸਦੀ ਸਮਰਥਨ ਨਾਲ ਤੀਜੇ ਸਥਾਨ ‘ਤੇ ਹਨ।
ਬਸੇਰਾ, ਜੋ ਪਹਿਲਾਂ ਅਮਰੀਕੀ ਸਿਹਤ ਅਤੇ ਮਨੁੱਖੀ ਸੇਵਾਵਾਂ ਮੰਤਰੀ ਰਹਿ ਚੁੱਕੇ ਹਨ, ਪਿਛਲੇ ਕੁਝ ਮਹੀਨਿਆਂ ਵਿਚ ਕਾਫ਼ੀ ਮਜ਼ਬੂਤੀ ਨਾਲ ਉਭਰੇ ਹਨ। ਮਾਰਚ ਵਿਚ ਜਿੱਥੇ ਉਹ ਇਕ ਅੰਕ ਵਾਲੇ ਸਮਰਥਨ ‘ਤੇ ਸਨ, ਉੱਥੇ ਹੁਣ ਉਹ 15 ਅੰਕਾਂ ਦਾ ਵਾਧਾ ਕਰਕੇ ਸਭ ਤੋਂ ਅੱਗੇ ਨਜ਼ਰ ਆ ਰਹੇ ਹਨ।
ਸਰਵੇ ਵਿਚ ਚਾਡ ਬਿਆਂਕੋ 13 ਫੀਸਦੀ ਅਤੇ ਕੇਟੀ ਪੋਰਟਰ 12 ਫੀਸਦੀ ਸਮਰਥਨ ਨਾਲ ਕ੍ਰਮਵਾਰ ਚੌਥੇ ਅਤੇ ਪੰਜਵੇਂ ਸਥਾਨ ‘ਤੇ ਹਨ।
ਹਾਲਾਂਕਿ ਹੋਰ ਸਰਵੇਖਣਾਂ ਵਿਚ ਸਟੀਵ ਹਿਲਟਨ ਨੂੰ ਅਜੇ ਵੀ ਬੜਤ ਮਿਲ ਰਹੀ ਹੈ। ਇੱਕ ਸਰਵੇ ‘ਚ ਹਿਲਟਨ 25 ਫੀਸਦੀ ਸਮਰਥਨ ਨਾਲ ਪਹਿਲੇ ਸਥਾਨ ‘ਤੇ ਸਨ, ਜਦਕਿ ਹੋਰ ਦੋ ਸਰਵੇਖਣਾਂ ਵਿਚ ਵੀ ਉਹ ਬੇਸੇਰਾ ਅਤੇ ਸਟੇਅਰ ਤੋਂ ਅੱਗੇ ਰਹੇ।
ਕੈਲੀਫੋਰਨੀਆ ਪ੍ਰਣਾਲੀ ਅਨੁਸਾਰ, ਕਿਸੇ ਵੀ ਪਾਰਟੀ ਦੇ ਸਿਖਰਲੇ ਦੋ ਉਮੀਦਵਾਰ ਨਵੰਬਰ ਦੀ ਆਮ ਚੋਣ ਵਿਚ ਪਹੁੰਚਣਗੇ। ਇਸ ਵੇਲੇ ਦੇ ਸਰਵੇ ਇਹ ਸੰਕੇਤ ਦੇ ਰਹੇ ਹਨ ਕਿ ਬਸੇਰਾ, ਹਿਲਟਨ ਅਤੇ ਸਟੇਅਰ ਵਿਚਕਾਰ ਟੌਪ-2 ਵਿਚ ਪਹੁੰਚਣ ਲਈ ਕੜਾ ਮੁਕਾਬਲਾ ਚੱਲ ਰਿਹਾ ਹੈ।
ਮੌਜੂਦਾ ਗਵਰਨਰ ਗੈਵਿਨ ਨਿਊਸਮ ਆਪਣੀ ਮਿਆਦ ਦੀ ਸੀਮਾ ਕਾਰਨ ਮੁੜ ਚੋਣ ਨਹੀਂ ਲੜ ਸਕਦੇ, ਜਿਸ ਕਾਰਨ ਇਹ ਚੋਣ ਕੈਲੀਫੋਰਨੀਆ ਦੀ ਸਿਆਸਤ ਲਈ ਬਹੁਤ ਮਹੱਤਵਪੂਰਨ ਮੰਨੀ ਜਾ ਰਹੀ ਹੈ।