ਲਾਸ ਏਂਜਲਸ, 10 ਜੁਲਾਈ (ਪੰਜਾਬ ਮੇਲ)-  ਲਾਸ ਏਂਜਲਸ ਦੀ ਸੰਘੀ ਅਦਾਲਤ ਨੇ ਅਮਰੀਕਾ ਤੋਂ ਕੈਨੇਡਾ ਵੱਡੀ ਮਾਤਰਾ ਵਿੱਚ ਕੋਕੀਨ ਅਤੇ ਮੈਥਐਮਫੈਟਾਮੀਨ ਦੀ ਤਸਕਰੀ ਕਰਨ ਵਾਲੇ 63 ਸਾਲਾ ਕੈਨੇਡੀਅਨ ਨਾਗਰਿਕ ਗੁਰਅੰਮ੍ਰਿਤ ਸਿੱਧੂ ਨੂੰ 20 ਸਾਲ ਦੀ ਫੈਡਰਲ ਜੇਲ੍ਹ ਦੀ ਸਜ਼ਾ ਸੁਣਾਈ ਹੈ। ਸਿੱਧੂ ਬਰੈਂਪਟਨ, ਓਨਟਾਰੀਓ ਦਾ ਰਹਿਣ ਵਾਲਾ ਹੈ ਅਤੇ ਅਕਤੂਬਰ 2024 ਤੋਂ ਅਮਰੀਕੀ ਹਿਰਾਸਤ ਵਿੱਚ ਹੈ।

ਅਦਾਲਤੀ ਦਸਤਾਵੇਜ਼ਾਂ ਅਨੁਸਾਰ ਸਿੱਧੂ ਨੇ ਸਤੰਬਰ 2020 ਤੋਂ ਫਰਵਰੀ 2023 ਤੱਕ ਅਮਰੀਕਾ ਤੋਂ ਕੈਨੇਡਾ ਨਸ਼ੀਲੇ ਪਦਾਰਥ ਭੇਜਣ ਵਾਲੇ ਇੱਕ ਅਪਰਾਧਿਕ ਗਿਰੋਹ ਦੀ ਅਗਵਾਈ ਕੀਤੀ। ਸਤੰਬਰ ਤੋਂ ਅਕਤੂਬਰ 2022 ਵਿਚਾਲੇ ਉਸ ਨੇ ਅੱਠ ਵੱਖ-ਵੱਖ ਖੇਪਾਂ ਰਾਹੀਂ ਲਗਭਗ 523 ਕਿਲੋ ਮੈਥਐਮਫੈਟਾਮੀਨ ਅਤੇ 347 ਕਿਲੋ ਕੋਕੀਨ ਭੇਜਣ ਦਾ ਪ੍ਰਬੰਧ ਕੀਤਾ।

ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਵੱਲੋਂ ਜ਼ਬਤ ਕੀਤੇ ਗਏ ਨਸ਼ਿਆਂ ਦੀ ਥੋਕ ਕੀਮਤ 15 ਤੋਂ 17 ਮਿਲੀਅਨ ਡਾਲਰ ਦਰਮਿਆਨ ਦੱਸੀ ਗਈ ਹੈ। ਨਸ਼ੇ ਅਮਰੀਕਾ ਵਿੱਚ ਖਰੀਦਣ ਤੋਂ ਬਾਅਦ ਲੰਬੀ ਦੂਰੀ ਵਾਲੇ ਸੈਮੀ-ਟਰੱਕਾਂ ਰਾਹੀਂ ਕੈਨੇਡਾ ਪਹੁੰਚਾਏ ਜਾਂਦੇ ਸਨ।

ਡਿਲੀਵਰੀ ਦੌਰਾਨ ਪਛਾਣ ਲਈ ਸਿੱਧੂ ਡਰਾਈਵਰਾਂ ਅਤੇ ਕੋਰੀਅਰਾਂ ਨੂੰ ਟੈਲੀਫੋਨ ਨੰਬਰ ਅਤੇ ਕਰੰਸੀ ਨੋਟਾਂ ਦੇ ਸੀਰੀਅਲ ਨੰਬਰ ਟੋਕਨ ਵਜੋਂ ਦਿੰਦਾ ਸੀ। ਕੈਨੇਡਾ ਪਹੁੰਚਣ ਤੋਂ ਬਾਅਦ ਉਸਦੇ ਸਾਥੀ ਨਸ਼ਿਆਂ ਦੀਆਂ ਖੇਪਾਂ ਲੈ ਕੇ ਅੱਗੇ ਵੰਡਦੇ ਸਨ।

ਸਿੱਧੂ ਨੇ 26 ਮਾਰਚ 2026 ਨੂੰ ਲਗਾਤਾਰ ਅਪਰਾਧਿਕ ਕਾਰੋਬਾਰ ਚਲਾਉਣ ਦਾ ਦੋਸ਼ ਕਬੂਲ ਕੀਤਾ ਸੀ। ਇਸ ਕੇਸ ਵਿੱਚ ਉਹ ਦੋਸ਼ ਮੰਨਣ ਵਾਲਾ ਅੱਠਵਾਂ ਵਿਅਕਤੀ ਹੈ। ਹੋਰ ਦੋਸ਼ੀਆਂ ਨੂੰ 27 ਮਹੀਨਿਆਂ ਤੋਂ ਲੈ ਕੇ 108 ਮਹੀਨਿਆਂ ਤੱਕ ਦੀ ਜੇਲ੍ਹ ਹੋ ਚੁੱਕੀ ਹੈ।

ਮਾਮਲੇ ਦੀ ਜਾਂਚ ਐੱਫਬੀਆਈ, ਲਾਸ ਏਂਜਲਸ ਪੁਲਿਸ, ਰਾਇਲ ਕੈਨੇਡੀਅਨ ਮਾਊਂਟਡ ਪੁਲਿਸ, ਯੂਐੱਸ ਕਸਟਮਜ਼ ਐਂਡ ਬਾਰਡਰ ਪ੍ਰੋਟੈਕਸ਼ਨ ਅਤੇ ਹੋਰ ਅਮਰੀਕੀ, ਕੈਨੇਡੀਅਨ ਤੇ ਮੈਕਸੀਕਨ ਏਜੰਸੀਆਂ ਨੇ ਮਿਲ ਕੇ ਕੀਤੀ।