ਵਾਸ਼ਿੰਗਟਨ, 31 ਜੁਲਾਈ (ਪੰਜਾਬ ਮੇਲ)- ਅਮਰੀਕਾ ਦੀ ਆਜ਼ਾਦੀ ਦੀ 250ਵੀਂ ਵਰ੍ਹੇਗੰਢ ਮੌਕੇ ਜਾਰੀ ਕੀਤੇ ਗਏ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਤਸਵੀਰ ਵਾਲੇ ਵਿਸ਼ੇਸ਼ ਯਾਦਗਾਰੀ ਪਾਸਪੋਰਟ ਹੁਣ ਵਾਸ਼ਿੰਗਟਨ ਡੀ.ਸੀ. ਤੋਂ ਬਾਹਰ ਵੀ ਦੇਸ਼ ਭਰ ਦੇ ਚੁਣੇ ਹੋਏ ਪਾਸਪੋਰਟ ਕੇਂਦਰਾਂ ‘ਤੇ ਉਪਲਬਧ ਕਰਵਾਏ ਜਾਣਗੇ। ਅਮਰੀਕੀ ਵਿਦੇਸ਼ ਵਿਭਾਗ ਨੇ ਇਸ ਵਿਸ਼ੇਸ਼ ਪਾਸਪੋਰਟ ਨੂੰ ”ਪੈਟਰੀਅਟ ਪਾਸਪੋਰਟ” ਦਾ ਨਾਮ ਦਿੱਤਾ ਹੈ।
ਵਿਦੇਸ਼ ਵਿਭਾਗ ਅਨੁਸਾਰ ਲੋਕਾਂ ਵੱਲੋਂ ਮਿਲੀ ਭਾਰੀ ਮੰਗ ਤੋਂ ਬਾਅਦ ਇਸ ਵਿਸ਼ੇਸ਼ ਡਿਜ਼ਾਈਨ ਵਾਲੇ ਹੋਰ 2 ਲੱਖ 50 ਹਜ਼ਾਰ ਪਾਸਪੋਰਟ ਜਾਰੀ ਕਰਨ ਦਾ ਫ਼ੈਸਲਾ ਕੀਤਾ ਗਿਆ ਹੈ। ਪਹਿਲਾਂ ਇਹ ਪਾਸਪੋਰਟ ਸਿਰਫ਼ ਵਾਸ਼ਿੰਗਟਨ ਡੀ.ਸੀ. ਸਥਿਤ ਪਾਸਪੋਰਟ ਏਜੰਸੀ ਵਿਚ ਵਿਅਕਤੀਗਤ ਤੌਰ ‘ਤੇ ਅਰਜ਼ੀ ਦੇਣ ਵਾਲਿਆਂ ਨੂੰ ਦਿੱਤੇ ਜਾ ਰਹੇ ਸਨ। ਹੁਣ ਅਗਸਤ ਮਹੀਨੇ ਦੌਰਾਨ ਅਮਰੀਕਾ ਦੀਆਂ ਵੱਖ-ਵੱਖ ਪਾਸਪੋਰਟ ਏਜੰਸੀਆਂ ਅਤੇ ਕੇਂਦਰਾਂ ‘ਤੇ ਵਿਸ਼ੇਸ਼ ਅਰਜ਼ੀ ਸਮਾਗਮ ਕਰਵਾਏ ਜਾਣਗੇ।
ਪਹਿਲੇ ਪੜਾਅ ‘ਚ 8 ਅਗਸਤ ਤੋਂ ਸ਼ਿਕਾਗੋ, ਡੈਲਸ, ਡੈਟਰਾਇਟ, ਨਿਊ ਔਰਲੀਨਜ਼, ਨਿਊਯਾਰਕ, ਸਟੈਨਫੋਰਡ ਅਤੇ ਸੈਂਟੇਨੀਅਲ ਸਮੇਤ ਕਈ ਸ਼ਹਿਰਾਂ ਵਿਚ ਇੱਕ ਦਿਨ ਦੇ ਵਿਸ਼ੇਸ਼ ਸਮਾਗਮ ਕੀਤੇ ਜਾਣਗੇ। ਇਸ ਤੋਂ ਬਾਅਦ ਹੋਰ ਸ਼ਹਿਰਾਂ ਅਤੇ ਪਾਸਪੋਰਟ ਦਫ਼ਤਰਾਂ ਨੂੰ ਵੀ ਇਸ ਮੁਹਿੰਮ ਵਿਚ ਸ਼ਾਮਲ ਕੀਤਾ ਜਾਵੇਗਾ।
ਇਹ ਪਾਸਪੋਰਟ ਪ੍ਰਾਪਤ ਕਰਨ ਲਈ ਬਿਨੈਕਾਰ ਨੂੰ ਨਿਰਧਾਰਤ ਦਿਨ ਵਿਅਕਤੀਗਤ ਤੌਰ ‘ਤੇ ਪਾਸਪੋਰਟ ਏਜੰਸੀ ਜਾਣਾ ਪਵੇਗਾ ਅਤੇ ਪਹਿਲਾਂ ਤੋਂ ਮੁਲਾਕਾਤ ਦਾ ਸਮਾਂ ਲੈਣਾ ਲਾਜ਼ਮੀ ਹੋਵੇਗਾ। ਮੁਲਾਕਾਤ ਲਈ ਨੈਸ਼ਨਲ ਪਾਸਪੋਰਟ ਇਨਫਰਮੇਸ਼ਨ ਸੈਂਟਰ ਦੇ ਨੰਬਰ 1-877-487-2778 ‘ਤੇ ਸੰਪਰਕ ਕਰਕੇ ਮੇਨੂ ਵਿਕਲਪ 9 ਚੁਣਿਆ ਜਾ ਸਕਦਾ ਹੈ। ਇਹ ਮੁਲਾਕਾਤ ਆਨਲਾਈਨ ਨਹੀਂ ਲਈ ਜਾ ਸਕਦੀ।
ਵਿਦੇਸ਼ ਵਿਭਾਗ ਨੇ ਸਪੱਸ਼ਟ ਕੀਤਾ ਹੈ ਕਿ ਜਿਹੜੇ ਲੋਕ ਆਨਲਾਈਨ, ਡਾਕ ਰਾਹੀਂ, ਆਮ ਪਾਸਪੋਰਟ ਸਵੀਕ੍ਰਿਤੀ ਕੇਂਦਰ ਜਾਂ ਵਿਦੇਸ਼ ਸਥਿਤ ਅਮਰੀਕੀ ਦੂਤਾਵਾਸ ਜਾਂ ਕੌਂਸਲੇਟ ਰਾਹੀਂ ਅਰਜ਼ੀ ਦੇਣਗੇ, ਉਨ੍ਹਾਂ ਨੂੰ ਇਹ ਵਿਸ਼ੇਸ਼ ”ਪੈਟਰੀਅਟ ਪਾਸਪੋਰਟ” ਨਹੀਂ ਮਿਲੇਗਾ। ਇਸ ਲਈ ਨਿਰਧਾਰਤ ਵਿਸ਼ੇਸ਼ ਸਮਾਗਮ ਜਾਂ ਵਾਸ਼ਿੰਗਟਨ ਪਾਸਪੋਰਟ ਏਜੰਸੀ ਵਿਚ ਵਿਅਕਤੀਗਤ ਅਰਜ਼ੀ ਦੇਣੀ ਜ਼ਰੂਰੀ ਹੋਵੇਗੀ।
ਇਸ ਯਾਦਗਾਰੀ ਪਾਸਪੋਰਟ ਦੇ ਅੰਦਰਲੇ ਪੰਨੇ ‘ਤੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਤਸਵੀਰ, ਉਨ੍ਹਾਂ ਦੇ ਦਸਤਖ਼ਤ ਦਾ ਸੁਨਹਿਰੀ ਨਿਸ਼ਾਨ ਅਤੇ ਅਮਰੀਕੀ ਆਜ਼ਾਦੀ ਦੇ ਐਲਾਨ ਨਾਲ ਸੰਬੰਧਿਤ ਕਲਾਕਾਰੀ ਸ਼ਾਮਲ ਹੈ। ਇਸ ਦੇ ਨਾਲ ਅਮਰੀਕਾ ਦੀ 250ਵੀਂ ਵਰ੍ਹੇਗੰਢ ਨੂੰ ਦਰਸਾਉਂਦਾ ਸੁਨਹਿਰੀ ਝੰਡਾ ਅਤੇ ਆਜ਼ਾਦੀ ਦੇ ਐਲਾਨ ‘ਤੇ ਦਸਤਖ਼ਤ ਕਰਦੇ ਸੰਸਥਾਪਕ ਆਗੂਆਂ ਦੀ ਤਸਵੀਰ ਵੀ ਦਿੱਤੀ ਗਈ ਹੈ। ਟਰੰਪ ਅਮਰੀਕੀ ਪਾਸਪੋਰਟ ਵਿਚ ਦਰਸਾਏ ਜਾਣ ਵਾਲੇ ਪਹਿਲੇ ਜੀਵਤ ਰਾਸ਼ਟਰਪਤੀ ਬਣ ਗਏ ਹਨ।
ਪਾਸਪੋਰਟ ਦੇ ਕਵਰ ਉੱਤੇ ”ਯੂਨਾਈਟਿਡ ਸਟੇਟਸ ਆਫ਼ ਅਮਰੀਕਾ” ਅਤੇ ”ਪਾਸਪੋਰਟ” ਸ਼ਬਦ ਸੁਨਹਿਰੀ ਅੱਖਰਾਂ ਵਿਚ ਲਿਖੇ ਗਏ ਹਨ। ਪਿਛਲੇ ਕਵਰ ‘ਤੇ ਇੱਕ ਛੋਟਾ ਸੁਨਹਿਰੀ ਅਮਰੀਕੀ ਝੰਡਾ ਅਤੇ ਤਾਰਿਆਂ ਨਾਲ ਘਿਰਿਆ ਹੋਇਆ 250 ਦਾ ਨਿਸ਼ਾਨ ਵੀ ਸ਼ਾਮਲ ਕੀਤਾ ਗਿਆ ਹੈ।
ਵਿਦੇਸ਼ ਵਿਭਾਗ ਮੁਤਾਬਕ ਇਹ ਪਾਸਪੋਰਟ ਸਿਰਫ਼ ਯਾਦਗਾਰੀ ਵਸਤੂ ਨਹੀਂ ਹੈ, ਸਗੋਂ ਇੱਕ ਪੂਰੀ ਤਰ੍ਹਾਂ ਮਾਨਤਾ ਪ੍ਰਾਪਤ ਅਮਰੀਕੀ ਯਾਤਰਾ ਅਤੇ ਪਛਾਣ ਦਸਤਾਵੇਜ਼ ਹੈ। ਇਸ ਵਿਚ ਆਮ ਅਮਰੀਕੀ ਪਾਸਪੋਰਟ ਵਰਗੀਆਂ ਹੀ ਆਧੁਨਿਕ ਸੁਰੱਖਿਆ ਵਿਸ਼ੇਸ਼ਤਾਵਾਂ ਮੌਜੂਦ ਹਨ ਅਤੇ ਇਸ ਨੂੰ ਅੰਤਰਰਾਸ਼ਟਰੀ ਯਾਤਰਾ ਲਈ ਵਰਤਿਆ ਜਾ ਸਕਦਾ ਹੈ। ਆਮ ਪਾਸਪੋਰਟ ਫੀਸਾਂ ਅਤੇ ਕਾਰਵਾਈ ਦਾ ਸਮਾਂ ਇਸ ‘ਤੇ ਵੀ ਲਾਗੂ ਹੋਵੇਗਾ।
ਜਿਹੜੇ ਅਮਰੀਕੀ ਨਾਗਰਿਕ ਟਰੰਪ ਦੀ ਤਸਵੀਰ ਵਾਲਾ ਪਾਸਪੋਰਟ ਨਹੀਂ ਲੈਣਾ ਚਾਹੁੰਦੇ, ਉਹ ਪਹਿਲਾਂ ਵਾਂਗ ਆਮ ਅਮਰੀਕੀ ਪਾਸਪੋਰਟ ਲਈ ਅਰਜ਼ੀ ਦੇ ਸਕਦੇ ਹਨ। ਸਰਕਾਰ ਨੇ ਸਪੱਸ਼ਟ ਕੀਤਾ ਹੈ ਕਿ ਵਿਸ਼ੇਸ਼ ਪਾਸਪੋਰਟ ਲੈਣਾ ਲਾਜ਼ਮੀ ਨਹੀਂ, ਸਗੋਂ ਬਿਨੈਕਾਰ ਦੀ ਆਪਣੀ ਚੋਣ ਹੋਵੇਗੀ।