-‘ਓਪਰੇਸ਼ਨ ਟਾਈਡਲ ਵੇਵ’ ਤਹਿਤ ਕਰੀਬ 25,000 ਗ੍ਰਿਫ਼ਤਾਰੀਆਂ ਦਾ ਦਾਅਵਾ
ਫਲੋਰੀਡਾ, 2 ਜੂਨ (ਪੰਜਾਬ ਮੇਲ)- ਗੈਰ-ਕਾਨੂੰਨੀ ਇਮੀਗ੍ਰੇਸ਼ਨ ਵਿਰੁੱਧ ਸਖ਼ਤ ਰੁਖ਼ ਅਪਣਾਉਂਦੇ ਹੋਏ ਫਲੋਰੀਡਾ ਨੇ ਇੱਕ ਹੋਰ ਵੱਡਾ ਅੰਕੜਾ ਜਾਰੀ ਕੀਤਾ ਹੈ। ਰਾਜ ਸਰਕਾਰ ਦੇ ਅਨੁਸਾਰ ਫਰਵਰੀ 2026 ‘ਚ ਸ਼ੁਰੂ ਕੀਤੇ ਗਏ ”ਓਪਰੇਸ਼ਨ ਟਾਈਡਲ ਵੇਵ” ਤਹਿਤ ਹੁਣ ਤੱਕ ਸੂਬੇ ਭਰ ਵਿਚ ਲਗਭਗ 25,000 ਇਮੀਗ੍ਰੇਸ਼ਨ ਗ੍ਰਿਫ਼ਤਾਰੀਆਂ ਕੀਤੀਆਂ ਜਾ ਚੁੱਕੀਆਂ ਹਨ।
ਫਲੋਰੀਡਾ ਦੇ ਗਵਰਨਰ ਰੌਨ ਡੀਸੈਂਟਿਸ ਨੇ ਕਿਹਾ ਕਿ ਰਾਜ ਆਪਣੇ ਨਾਗਰਿਕਾਂ ਦੀ ਸੁਰੱਖਿਆ ਲਈ ਹਰ ਉਪਲਬਧ ਸਰੋਤ ਦੀ ਵਰਤੋਂ ਕਰਦਾ ਰਹੇਗਾ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਗੈਰ-ਕਾਨੂੰਨੀ ਇਮੀਗ੍ਰੇਸ਼ਨ ਨਾਲ ਨਜਿੱਠਣ ਲਈ ਫਲੋਰੀਡਾ ਨੇ ਦੇਸ਼ ਦੇ ਕਿਸੇ ਵੀ ਹੋਰ ਰਾਜ ਨਾਲੋਂ ਵੱਧ ਤੇਜ਼ੀ ਅਤੇ ਸਖ਼ਤੀ ਨਾਲ ਕਦਮ ਚੁੱਕੇ ਹਨ।
ਓਪਰੇਸ਼ਨ ਟਾਈਡਲ ਵੇਵ ਦੀ ਸ਼ੁਰੂਆਤ ਉਸ ਸਮੇਂ ਕੀਤੀ ਗਈ ਸੀ, ਜਦੋਂ ਫਲੋਰੀਡਾ, ICE ਦੇ 287(ਜੀ) ਸਮਝੌਤਿਆਂ ਵਿਚ ਦੇਸ਼ ਦਾ ਸਭ ਤੋਂ ਅੱਗੇ ਰਹਿਣ ਵਾਲਾ ਰਾਜ ਬਣ ਗਿਆ। 287(ਜੀ) ਪ੍ਰੋਗਰਾਮ ਅਧੀਨ ਸੰਘੀ ਸਰਕਾਰ ਸਥਾਨਕ ਅਤੇ ਰਾਜੀ ਪੁਲਿਸ ਏਜੰਸੀਆਂ ਨੂੰ ਕੁਝ ਇਮੀਗ੍ਰੇਸ਼ਨ ਅਧਿਕਾਰ ਸੌਂਪ ਸਕਦੀ ਹੈ, ਜਿਸ ਨਾਲ ਉਹ ICE ਦੀ ਨਿਗਰਾਨੀ ਹੇਠ ਇਮੀਗ੍ਰੇਸ਼ਨ ਕਾਨੂੰਨਾਂ ਨੂੰ ਲਾਗੂ ਕਰਨ ਵਿਚ ਸਹਾਇਤਾ ਕਰਦੀਆਂ ਹਨ।
ਰਿਪੋਰਟ ਅਨੁਸਾਰ ਫਲੋਰੀਡਾ ਦੇ ਸਾਰੇ ਸ਼ੈਰਿਫ਼ ਦਫ਼ਤਰ ਇਸ ਪ੍ਰੋਗਰਾਮ ਵਿਚ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਕਰੀਬ 200 ਪੁਲਿਸ ਵਿਭਾਗ, 12 ਰਾਜੀ ਏਜੰਸੀਆਂ, 15 ਯੂਨੀਵਰਸਿਟੀਆਂ ਅਤੇ ਕਾਲਜ, ਅਤੇ ਕਈ ਜੇਲ੍ਹਾਂ ਅਤੇ ਹਿਰਾਸਤੀ ਕੇਂਦਰ ਵੀ 287(ਗ) ਭਾਈਵਾਲੀ ਦਾ ਹਿੱਸਾ ਹਨ। ਇਹ ਗਿਣਤੀ ਅਮਰੀਕਾ ਦੇ ਕਿਸੇ ਵੀ ਹੋਰ ਰਾਜ ਨਾਲੋਂ ਵੱਧ ਦੱਸੀ ਜਾ ਰਹੀ ਹੈ।
ਅਧਿਕਾਰੀਆਂ ਅਨੁਸਾਰ ਓਪਰੇਸ਼ਨ ਟਾਈਡਲ ਵੇਵ ਦੇ ਪਹਿਲੇ ਹਫ਼ਤੇ ਦੌਰਾਨ ਹੀ 1,100 ਤੋਂ ਵੱਧ ਅਪਰਾਧਿਕ ਪਿਛੋਕੜ ਵਾਲੇ ਗੈਰ-ਕਾਨੂੰਨੀ ਪ੍ਰਵਾਸੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ, ਜੋ ਫਲੋਰੀਡਾ ਦੇ ਇਤਿਹਾਸ ਵਿਚ ਇੱਕ ਰਿਕਾਰਡ ਮੰਨਿਆ ਗਿਆ।
ਇਸ ਮੁਹਿੰਮ ਤਹਿਤ ਕਈ ਵੱਡੇ ਆਪਰੇਸ਼ਨ ਚਲਾਏ ਗਏ ਹਨ। ਦੱਖਣੀ ਫਲੋਰੀਡਾ ਵਿਚ ਚਲਾਏ ਗਏ ”ਓਪਰੇਸ਼ਨ ਸੈਂਡਹਿੱਲ ਸੈਂਟੀਨਲ” ਦੌਰਾਨ 250 ਤੋਂ ਵੱਧ ਗੈਰ-ਕਾਨੂੰਨੀ ਪ੍ਰਵਾਸੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਅਧਿਕਾਰੀਆਂ ਮੁਤਾਬਕ ਇਨ੍ਹਾਂ ਵਿਚ ਘਰੇਲੂ ਹਿੰਸਾ, ਨਸ਼ਿਆਂ ਨਾਲ ਸਬੰਧਿਤ ਅਪਰਾਧ, ਨਸ਼ੇ ਦੀ ਹਾਲਤ ਵਿਚ ਡਰਾਈਵਿੰਗ, ਹਮਲੇ ਅਤੇ ਹੋਰ ਗੰਭੀਰ ਮਾਮਲਿਆਂ ਵਿਚ ਦੋਸ਼ੀ ਜਾਂ ਸਜ਼ਾਯਾਫ਼ਤਾ ਵਿਅਕਤੀ ਵੀ ਸ਼ਾਮਲ ਸਨ।
ਇੱਕ ਹੋਰ ਕਾਰਵਾਈ ਦੌਰਾਨ ਪਾਮ ਬੀਚ ਕਾਊਂਟੀ ਵਿਚ ਰਹਿ ਰਹੇ ਹੋਂਡੂਰਸ ਦੇ ਨਾਗਰਿਕ ਅਤੇ ਕਥਿਤ ਐੱਮ.ਐੱਸ.-13 ਗੈਂਗ ਮੈਂਬਰ ਲੂਈਸ ਮੇਰਾਰੀ ਪੇਰਾਲਟਾ-ਸੇਵੀਆ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਗਿਆ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਹ 2013 ਵਿਚ ਗੈਰ-ਕਾਨੂੰਨੀ ਤਰੀਕੇ ਨਾਲ ਅਮਰੀਕਾ ਵਿਚ ਦਾਖ਼ਲ ਹੋਇਆ ਸੀ।
”ਓਪਰੇਸ਼ਨ ਕ੍ਰਿਮਿਨਲ ਰਿਟਰਨ” ਨਾਮਕ ਇੱਕ ਹੋਰ 10 ਦਿਨਾਂ ਦੀ ਕਾਰਵਾਈ ਦੌਰਾਨ ਰਾਜ ਭਰ ਵਿਚ 230 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਅਧਿਕਾਰੀਆਂ ਅਨੁਸਾਰ ਇਨ੍ਹਾਂ ਵਿਚ ਰਜਿਸਟਰਡ ਸੈਕਸ ਅਫੈਂਡਰ, ਯੌਨ ਅਪਰਾਧੀ, ਕਤਲ ਦੇ ਦੋਸ਼ੀ ਅਤੇ ਨਸ਼ਾ ਤਸਕਰੀ ਨਾਲ ਜੁੜੇ ਲੋਕ ਵੀ ਸ਼ਾਮਲ ਸਨ।
ਇਸੇ ਤਰ੍ਹਾਂ ”ਓਪਰੇਸ਼ਨ ਲ਼ੌਕੇਟ” ਤਹਿਤ ਫਲੋਰੀਡਾ ਡਿਪਾਰਟਮੈਂਟ ਆਫ਼ ਲਾਅ ਇਨਫੋਰਸਮੈਂਟ ਅਤੇ ਹੋਮਲੈਂਡ ਸਕਿਓਰਿਟੀ ਨੇ ਬਿਨਾਂ ਮਾਪਿਆਂ ਦੇ ਅਮਰੀਕਾ ਪਹੁੰਚੇ ਨਾਬਾਲਗ ਪ੍ਰਵਾਸੀ ਬੱਚਿਆਂ ਦੀ ਪਛਾਣ ਅਤੇ ਸੁਰੱਖਿਆ ਦੀ ਜਾਂਚ ਲਈ ਮੁਹਿੰਮ ਚਲਾਈ। ਇਸ ਦੌਰਾਨ 400 ਤੋਂ ਵੱਧ ਬੱਚਿਆਂ ਦਾ ਪਤਾ ਲਗਾਇਆ ਗਿਆ ਅਤੇ ਕੁਝ ਮਾਮਲਿਆਂ ਵਿਚ ਮਨੁੱਖੀ ਤਸਕਰੀ, ਲਾਪਤਾ ਬੱਚਿਆਂ ਅਤੇ ਹੋਰ ਖ਼ਤਰਨਾਕ ਹਾਲਾਤਾਂ ਦੇ ਸੰਕੇਤ ਵੀ ਮਿਲੇ।
ਫਲੋਰੀਡਾ ਸਰਕਾਰ ਦਾ ਦਾਅਵਾ ਹੈ ਕਿ ਪਿਛਲੇ ਸਾਲਾਂ ਦੌਰਾਨ ਹਜ਼ਾਰਾਂ ਬਿਨਾਂ ਸਾਥੀ ਵਾਲੇ ਨਾਬਾਲਗ ਬੱਚਿਆਂ ਨੂੰ ਰਾਜ ਦੇ ਵੱਖ-ਵੱਖ ਕਾਊਂਟੀਆਂ ਵਿਚ ਭੇਜਿਆ ਗਿਆ ਸੀ। ਰਾਜ ਵੱਲੋਂ ਬਣਾਈ ਗਈ ਗ੍ਰੈਂਡ ਜਿਊਰੀ ਨੇ ਪਹਿਲਾਂ ਕੁਝ ਮਾਮਲਿਆਂ ਵਿਚ ਮਨੁੱਖੀ ਤਸਕਰੀ, ਬੱਚਿਆਂ ਨਾਲ ਦੁਰਵਿਵਹਾਰ ਅਤੇ ਨਿਗਰਾਨੀ ਦੀ ਘਾਟ ਸਬੰਧੀ ਚਿੰਤਾਵਾਂ ਵੀ ਜਤਾਈਆਂ ਸਨ।
ਇਹ ਕਾਰਵਾਈਆਂ ਉਸ ਸਮੇਂ ਹੋ ਰਹੀਆਂ ਹਨ, ਜਦੋਂ ਟਰੰਪ ਪ੍ਰਸ਼ਾਸਨ ਦੇਸ਼ ਭਰ ਵਿਚ ਇਮੀਗ੍ਰੇਸ਼ਨ ਕਾਨੂੰਨਾਂ ਨੂੰ ਹੋਰ ਸਖ਼ਤੀ ਨਾਲ ਲਾਗੂ ਕਰਨ ਦੀ ਨੀਤੀ ਅਪਣਾ ਰਿਹਾ ਹੈ। ਫਲੋਰੀਡਾ ਨੂੰ ਇਸ ਮੁਹਿੰਮ ਵਿਚ ਇੱਕ ਮਾਡਲ ਰਾਜ ਵਜੋਂ ਪੇਸ਼ ਕੀਤਾ ਜਾ ਰਿਹਾ ਹੈ, ਜਦਕਿ ਆਲੋਚਕਾਂ ਦਾ ਕਹਿਣਾ ਹੈ ਕਿ ਵੱਡੇ ਪੱਧਰ ‘ਤੇ ਹੋ ਰਹੀਆਂ ਗ੍ਰਿਫ਼ਤਾਰੀਆਂ ਅਤੇ ਇਮੀਗ੍ਰੇਸ਼ਨ ਕਾਰਵਾਈਆਂ ਕਾਰਨ ਪ੍ਰਵਾਸੀ ਭਾਈਚਾਰਿਆਂ ਵਿਚ ਡਰ ਅਤੇ ਅਨਿਸ਼ਚਿਤਤਾ ਦਾ ਮਾਹੌਲ ਪੈਦਾ ਹੋ ਰਿਹਾ ਹੈ।
ਮਾਹਿਰਾਂ ਦਾ ਮੰਨਣਾ ਹੈ ਕਿ ਫਲੋਰੀਡਾ ਦੀ ਇਹ ਮੁਹਿੰਮ ਆਉਣ ਵਾਲੇ ਮਹੀਨਿਆਂ ਵਿਚ ਹੋਰ ਰਾਜਾਂ ਲਈ ਵੀ ਇੱਕ ਨਮੂਨਾ ਬਣ ਸਕਦੀ ਹੈ, ਖ਼ਾਸ ਕਰਕੇ ਉਨ੍ਹਾਂ ਰਾਜਾਂ ਵਿਚ ਜਿੱਥੇ ਸਥਾਨਕ ਪੁਲਿਸ ਅਤੇ ਸੰਘੀ ਇਮੀਗ੍ਰੇਸ਼ਨ ਏਜੰਸੀਆਂ ਵਿਚਕਾਰ ਸਹਿਯੋਗ ਵਧਾਇਆ ਜਾ ਰਿਹਾ ਹੈ।