-ਏ.ਆਈ. ਕਾਰਨ ਇਕੋ ਝਟਕੇ ਨਾਲ ਡੁੱਬੇ 285 ਅਰਬ ਡਾਲਰ
ਵਾਸ਼ਿੰਗਟਨ, 5 ਫਰਵਰੀ (ਪੰਜਾਬ ਮੇਲ)- ਆਰਟੀਫੀਸ਼ੀਅਲ ਇੰਟੈਲੀਜੈਂਸ (ਏ.ਆਈ.) ਦੀ ਦੁਨੀਆਂ ਵਿਚ ਆਈ ਇੱਕ ਨਵੀਂ ਕ੍ਰਾਂਤੀ ਨੇ ਅਮਰੀਕੀ ਸ਼ੇਅਰ ਬਾਜ਼ਾਰ ਵਿਚ ਹਾਹਾਕਾਰ ਮਚਾ ਦਿੱਤੀ ਹੈ। Anthropic ਕੰਪਨੀ ਵੱਲੋਂ ਲਾਂਚ ਕੀਤੇ ਗਏ ਇੱਕ ਨਵੇਂ ਏ.ਆਈ. ਟੂਲ ਕਾਰਨ ਮਾਰਕੀਟ ਵਿਚੋਂ 285 ਅਰਬ ਡਾਲਰ (ਲਗਭਗ 26,129 ਅਰਬ ਰੁਪਏ) ਸਾਫ ਹੋ ਗਏ ਹਨ। ਇਸ ਟੂਲ ਦੀ ਐਂਟਰੀ ਨੇ ਖਾਸ ਤੌਰ ‘ਤੇ ਸਾਫਟਵੇਅਰ, ਲੀਗਲ ਟੈਕ (ਕਾਨੂੰਨੀ ਤਕਨੀਕ) ਅਤੇ ਵਿੱਤੀ ਸੇਵਾਵਾਂ ਵਾਲੇ ਸਟਾਕਸ ਨੂੰ ਬੁਰੀ ਤਰ੍ਹਾਂ ਹਿਲਾ ਕੇ ਰੱਖ ਦਿੱਤਾ ਹੈ।
Anthropic ਨੇ ਆਪਣੇ ਏਜੰਟਿਕ ਏ.ਆਈ. ਅਸਿਸਟੈਂਟ ‘ਕਲਾਊਡ ਕੋਵਰਕ’ ਲਈ 11 ਨਵੇਂ ਓਪਨ ਸੋਰਸ ਪਲੱਗਇਨ ਲਾਂਚ ਕੀਤੇ ਹਨ। ਹੁਣ ਤੱਕ ਬਾਜ਼ਾਰ ਵਿਚ ਆਉਣ ਵਾਲੇ ਜ਼ਿਆਦਾਤਰ ਏ.ਆਈ. ਟੂਲਜ਼ ਦਾ ਫੋਕਸ ਕੋਡਿੰਗ ਵਰਗੇ ਕੰਮਾਂ ‘ਤੇ ਸੀ, ਪਰ ਇਹ ਨਵਾਂ ਟੂਲ ਨਾਨ-ਕੋਡਿੰਗ ਕੰਮਾਂ ਨੂੰ ਨਿਸ਼ਾਨਾ ਬਣਾਉਂਦਾ ਹੈ। ਇਸ ਦੀ ਮਦਦ ਨਾਲ ਕੰਪਨੀਆਂ ਆਪਣੇ ਕਈ ਰੋਜ਼ਾਨਾ ਦੇ ਕੰਮਾਂ ਨੂੰ ਆਟੋਮੇਟ (ਖੁਦਚਾਲਿਤ) ਕਰ ਸਕਦੀਆਂ ਹਨ।
ਇਸ ਏ.ਆਈ. ਟੂਲ ਦੇ ਆਉਣ ਨਾਲ ਆਈ.ਟੀ. ਕੰਪਨੀਆਂ ਵਿਚ ਹੜਕੰਪ ਮਚ ਗਿਆ ਹੈ ਅਤੇ ਕਈ ਕੰਪਨੀਆਂ ਦੇ ਸਟਾਕ 25 ਫੀਸਦੀ ਤੱਕ ਡਿੱਗ ਗਏ ਹਨ। ਇਹ ਟੂਲ ਫਾਈਲਾਂ ਨੂੰ ਪੜ੍ਹਨ, ਫੋਲਡਰਾਂ ਨੂੰ ਵਿਵਸਥਿਤ ਕਰਨ, ਦਸਤਾਵੇਜ਼ ਡਰਾਫਟ ਕਰਨ ਅਤੇ ਯੂਜ਼ਰ ਲਈ ਕਈ ਪੜਾਵਾਂ ਵਾਲੇ ਗੁੰਝਲਦਾਰ ਕੰਮਾਂ ਨੂੰ ਪੂਰਾ ਕਰਨ ਵਿਚ ਸਮਰੱਥ ਹੈ।
ਸੂਤਰਾਂ ਮੁਤਾਬਕ, ਸਭ ਤੋਂ ਵੱਡਾ ਖ਼ਤਰਾ ਇਹ ਹੈ ਕਿ Anthropic ਹੁਣ ਸਿਰਫ਼ ਏ.ਆਈ. ਮਾਡਲ ਹੀ ਨਹੀਂ ਵੇਚ ਰਹੀ, ਸਗੋਂ ਉਸ ਨੇ ਵਰਕਫਲੋ ਸੇਵਾਵਾਂ ‘ਤੇ ਆਪਣਾ ਅਧਿਕਾਰ ਜਮਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਉਦਾਹਰਣ ਵਜੋਂ, ਜੇਕਰ Anthropic ਸਿੱਧੇ ਤੌਰ ‘ਤੇ ਰੈਡੀਮੇਡ ਹੱਲ ਵੇਚਣਾ ਸ਼ੁਰੂ ਕਰਦੀ ਹੈ, ਤਾਂ ਉਹ ਥੋਮਸਨ ਰਾਇਟਰਜ਼ ਵਰਗੀਆਂ ਵੱਡੀਆਂ ਸੇਵਾ ਪ੍ਰਦਾਤਾ ਕੰਪਨੀਆਂ ਲਈ ਸਹਿਯੋਗੀ ਦੀ ਬਜਾਏ ਇੱਕ ਵੱਡਾ ਮੁਕਾਬਲੇਬਾਜ਼ ਬਣ ਜਾਵੇਗੀ। ਇਹੀ ਕਾਰਨ ਹੈ ਕਿ ਨਿਵੇਸ਼ਕਾਂ ਵਿਚ ਡਰ ਦਾ ਮਾਹੌਲ ਹੈ ਅਤੇ ਬਾਜ਼ਾਰ ਵਿਚ ਭਾਰੀ ਗਿਰਾਵਟ ਦੇਖਣ ਨੂੰ ਮਿਲ ਰਹੀ ਹੈ।