ਨਵੀਂ ਦਿੱਲੀ, 23 ਦਸੰਬਰ (ਪੰਜਾਬ ਮੇਲ)- ਕ੍ਰਿਸਮਸ ਦੇ ਤਿਉਹਾਰ ਦੇ ਮੌਕੇ ‘ਤੇ ਭਾਰਤ ਵਿਚ ਮੌਜੂਦ ਅਮਰੀਕੀ ਦੂਤਾਵਾਸ ਅਤੇ ਸਾਰੇ ਕੌਂਸਲੇਟ 24 ਦਸੰਬਰ ਤੋਂ 26 ਦਸੰਬਰ 2025 ਤੱਕ ਬੰਦ ਰਹਿਣਗੇ। ਇਸ ਦੌਰਾਨ ਵੀਜ਼ਾ ਇੰਟਰਵਿਊ, ਪਾਸਪੋਰਟ ਅਤੇ ਹੋਰ ਗੈਰ-ਐਮਰਜੈਂਸੀ ਕੌਂਸਲਰ ਸੇਵਾਵਾਂ ਪੂਰੀ ਤਰ੍ਹਾਂ ਠੱਪ ਰਹਿਣਗੀਆਂ। ਸਰੋਤਾਂ ਅਨੁਸਾਰ, ਇਹ ਫੈਸਲਾ ਨਵੀਂ ਦਿੱਲੀ, ਮੁੰਬਈ, ਚੇਨਈ, ਹੈਦਰਾਬਾਦ ਅਤੇ ਕੋਲਕਾਤਾ ਵਿਚ ਸਥਿਤ ਅਮਰੀਕੀ ਦੂਤਘਰਾਂ ਅਤੇ ਕੌਂਸਲੇਟਾਂ ‘ਤੇ ਲਾਗੂ ਹੋਵੇਗਾ। ਇਹ ਛੁੱਟੀ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਇੱਕ ਐਗਜ਼ੀਕਿਊਟਿਵ ਆਰਡਰ ਦੇ ਤਹਿਤ ਲਈ ਗਈ ਹੈ, ਜਿਸ ਵਿਚ 24 ਅਤੇ 26 ਦਸੰਬਰ ਨੂੰ ਫੈਡਰਲ ਸਰਕਾਰੀ ਵਿਭਾਗਾਂ ਅਤੇ ਏਜੰਸੀਆਂ ਨੂੰ ਬੰਦ ਰੱਖਣ ਦਾ ਫੈਸਲਾ ਕੀਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ 25 ਦਸੰਬਰ ਨੂੰ ਕ੍ਰਿਸਮਸ ਦੀ ਪਹਿਲਾਂ ਹੀ ਛੁੱਟੀ ਹੁੰਦੀ ਹੈ।
ਦੂਤਾਵਾਸ ਬੰਦ ਰਹਿਣ ਕਾਰਨ ਵੀਜ਼ਾ ਇੰਟਰਵਿਊ, ਦਸਤਾਵੇਜ਼ਾਂ ਦੀ ਜਾਂਚ (ਵੈਰੀਫਿਕੇਸ਼ਨ) ਅਤੇ ਹੋਰ ਨਿਯਮਤ ਕੰਮ ਨਹੀਂ ਹੋ ਸਕਣਗੇ। ਜਿਨ੍ਹਾਂ ਬਿਨੈਕਾਰਾਂ ਦੀਆਂ ਅਪੁਆਇੰਟਮੈਂਟਾਂ 24, 25 ਜਾਂ 26 ਦਸੰਬਰ 2025 ਨੂੰ ਤੈਅ ਸਨ, ਉਨ੍ਹਾਂ ਨੂੰ ਚਿੰਤਾ ਕਰਨ ਦੀ ਲੋੜ ਨਹੀਂ ਹੈ। ਅਮਰੀਕੀ ਦੂਤਾਵਾਸ ਵੱਲੋਂ ਅਜਿਹੇ ਬਿਨੈਕਾਰਾਂ ਨੂੰ ਈਮੇਲ ਜਾਂ ਆਨਲਾਈਨ ਪੋਰਟਲ ਰਾਹੀਂ ਨਵੀਂ ਤਰੀਕ ਦਿੱਤੀ ਜਾਵੇਗੀ। ਇਸ ਛੁੱਟੀ ਕਾਰਨ ਵੀਜ਼ਾ ਪ੍ਰੋਸੈਸਿੰਗ ਵਿਚ ਕੁਝ ਦੇਰੀ ਹੋਣ ਦੀ ਸੰਭਾਵਨਾ ਹੈ। ਖਾਸ ਕਰਕੇ ਐੱਚ-1ਬੀ, ਐੱਚ-4, ਐੱਫ-1 ਅਤੇ ਜੇ-1 ਵਰਗੇ ਗੈਰ-ਇਮੀਗ੍ਰੈਂਟ ਵੀਜ਼ਿਆਂ ਦੀ ਜਾਂਚ ਪਹਿਲਾਂ ਹੀ ਸਖ਼ਤ ਕੀਤੀ ਗਈ ਹੈ, ਜਿਸ ਕਾਰਨ ਪਹਿਲਾਂ ਹੀ ਦੇਰੀ ਹੋ ਰਹੀ ਸੀ ਅਤੇ ਹੁਣ ਤਿੰਨ ਦਿਨਾਂ ਦੀ ਬੰਦੀ ਇਸ ਨੂੰ ਹੋਰ ਵਧਾ ਸਕਦੀ ਹੈ। ਸਰੋਤਾਂ ਮੁਤਾਬਕ, ਇਨ੍ਹਾਂ ਤਿੰਨ ਦਿਨਾਂ ਵਿਚ ਆਮ ਨਾਗਰਿਕਾਂ ਲਈ ਕੋਈ ਸੇਵਾ ਉਪਲਬਧ ਨਹੀਂ ਹੋਵੇਗੀ। ਸਿਰਫ਼ ਰਾਸ਼ਟਰੀ ਸੁਰੱਖਿਆ ਜਾਂ ਬਹੁਤ ਜ਼ਰੂਰੀ ਐਮਰਜੈਂਸੀ ਸਥਿਤੀਆਂ ਵਿਚ ਹੀ ਸੀਮਤ ਸੇਵਾਵਾਂ ਦਿੱਤੀਆਂ ਜਾ ਸਕਦੀਆਂ ਹਨ, ਜਿਨ੍ਹਾਂ ਲਈ ਵੱਖਰੇ ਨਿਰਦੇਸ਼ ਜਾਰੀ ਕੀਤੇ ਜਾਂਦੇ ਹਨ।