ਸੰਯੁਕਤ ਰਾਸ਼ਟਰ, 7 ਦਸੰਬਰ (ਪੰਜਾਬ ਮੇਲ)- ਸੀਰੀਆਈ ਹਥਿਆਰਬੰਦ ਬਲਾਂ ਅਤੇ ਹਯਾਤ ਤਹਿਰੀਰ ਅਲ-ਸ਼ਾਮ ਅੱਤਵਾਦੀ ਸਮੂਹ ਵਿਚਾਲੇ ਚੱਲ ਰਹੇ ਸੰਘਰਸ਼ ਦੇ ਵਧਣ ਤੋਂ ਬਾਅਦ ਹੁਣ ਤੱਕ ਕਰੀਬ 3 ਲੱਖ 70 ਹਜ਼ਾਰ ਲੋਕ ਆਪਣੇ ਘਰਾਂ ਤੋਂ ਬੇਘਰ ਹੋ ਗਏ ਹਨ। ਸੰਯੁਕਤ ਰਾਸ਼ਟਰ ਦੇ ਮਨੁੱਖੀ ਮਾਮਲਿਆਂ ਦੇ ਤਾਲਮੇਲ ਲਈ ਦਫਤਰ (ਓ.ਸੀ.ਐੱਚ.ਏ.) ਨੇ ਸ਼ਨੀਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਸੰਯੁਕਤ ਰਾਸ਼ਟਰ ਦੇ ਬੁਲਾਰੇ ਸਟੀਫਨ ਦੁਜਾਰਿਕ ਨੇ ਸ਼ੁੱਕਰਵਾਰ ਨੂੰ ਪੱਤਰਕਾਰਾਂ ਨੂੰ ਕਿਹਾ, ‘ਮਾਨਵਤਾਵਾਦੀ ਮਾਮਲਿਆਂ ਦੇ ਤਾਲਮੇਲ ਲਈ ਸੰਯੁਕਤ ਰਾਸ਼ਟਰ ਦਫਤਰ (ਓ.ਸੀ.ਐੱਚ.ਏ.) ਨੇ ਅੱਜ ਕਿਹਾ ਕਿ ਸੀਰੀਆ ਵਿਚ ਦੁਸ਼ਮਣੀ ਵਧਣ ਤੋਂ ਬਾਅਦ ਲਗਭਗ 3,70,000 ਪੁਰਸ਼, ਔਰਤਾਂ ਅਤੇ ਬੱਚੇ ਬੇਘਰ ਹੋ ਗਏ ਹਨ। ਇਨ੍ਹਾਂ ਵਿਚ 1 ਲੱਖ ਅਜਿਹੇ ਲੋਕ ਸ਼ਾਮਲ ਹਨ, ਜੋ ਇੱਕ ਤੋਂ ਵੱਧ ਵਾਰ ਆਪਣਾ ਘਰ ਛੱਡ ਚੁੱਕੇ ਹਨ।’
ਜ਼ਿਕਰਯੋਗ ਹੈ ਕਿ ਸੀਰੀਆ ‘ਚ 2011 ਤੋਂ ਹਥਿਆਰਬੰਦ ਸੰਘਰਸ਼ ਚੱਲ ਰਿਹਾ ਹੈ। ਇੱਥੇ ਹਯਾਤ ਤਹਿਰੀਰ ਅਲ-ਸ਼ਾਮ ਅੱਤਵਾਦੀ ਸਮੂਹ (ਜਿਸ ਨੂੰ ਪਹਿਲਾਂ ਨੁਸਰਾ ਫਰੰਟ ਵਜੋਂ ਜਾਣਿਆ ਜਾਂਦਾ ਸੀ ਅਤੇ ਇਹ ਰੂਸ ਵਿਚ ਪਾਬੰਦੀਸ਼ੁਦਾ ਹੈ) ਅਤੇ ਕਈ ਹੋਰ ਹਥਿਆਰਬੰਦ ਸਮੂਹਾਂ ਨੇ 29 ਨਵੰਬਰ ਨੂੰ ਸੀਰੀਆ ਦੀ ਸਰਕਾਰ ਖਿਲਾਫ ਵੱਡੇ ਪੱਧਰ ‘ਤੇ ਅਭਿਆਨ ਸ਼ੁਰੂ ਕੀਤਾ, ਜੋ ਇਦਲਿਬ ਦੇ ਉੱਤਰ-ਪੱਛਮੀ ਖੇਤਰ ਦੇ ਉੱਤਰ ਤੋਂ ਅਲੈਪੋ ਅਤੇ ਹਮਾ ਸ਼ਹਿਰਾਂ ਵੱਲ ਵੱਧ ਰਿਹਾ ਹੈ। ਸੀਰੀਆ ਦੇ ਰੱਖਿਆ ਮੰਤਰਾਲਾ ਨੇ 5 ਦਸੰਬਰ ਨੂੰ ਕਿਹਾ ਹੈ ਕਿ ਅੱਤਵਾਦੀਆਂ ਨਾਲ ਭਿਆਨਕ ਲੜਾਈ ਤੋਂ ਬਾਅਦ ਸੀਰੀਆਈ ਹਥਿਆਰਬੰਦ ਬਲ ਹਾਮਾ ਸ਼ਹਿਰ ਤੋਂ ਪਿੱਛੇ ਹਟ ਗਏ ਹਨ।