– ਬੇਘਰ ਹੋਣ ਦਾ ਡਰ ਵਧਿਆ
ਵਾਸ਼ਿੰਗਟਨ ਡੀ.ਸੀ., 6 ਮਈ (ਪੰਜਾਬ ਮੇਲ)- ਅਮਰੀਕਾ ‘ਚ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਨੀਤੀ ਨਾਲ ਜੁੜਿਆ ਇੱਕ ਨਵਾਂ ਪ੍ਰਸਤਾਵਿਤ ਨਿਯਮ ਲੱਖਾਂ ਗਰੀਬ ਪਰਿਵਾਰਾਂ ਲਈ ਵੱਡੀ ਚਿੰਤਾ ਦਾ ਕਾਰਨ ਬਣ ਗਿਆ ਹੈ। ਇਸ ਨਿਯਮ ਦੇ ਲਾਗੂ ਹੋਣ ਨਾਲ ਲਗਭਗ 3.7 ਮਿਲੀਅਨ ਲੋਕ ਆਪਣੀ ਰੈਂਟਲ ਸਹਾਇਤਾ ਗੁਆ ਸਕਦੇ ਹਨ, ਜਿਸ ਵਿਚ ਬਹੁਤ ਸਾਰੇ ਬੱਚੇ ਵੀ ਸ਼ਾਮਲ ਹਨ।
ਨਵੀਂ ਪਾਲਿਸੀ ਅਨੁਸਾਰ, ਘਰ ਕਿਰਾਏ ਲਈ ਮਿਲ ਰਹੀ ਸਰਕਾਰੀ ਮਦਦ ‘ਤੇ 2 ਸਾਲ ਦੀ ਸੀਮਾ (ਟਾਈਮ ਲਿਮਟ) ਲਗਾਈ ਜਾ ਸਕਦੀ ਹੈ ਅਤੇ ਨਾਲ ਹੀ ਹਫ਼ਤੇ ਦੇ 40 ਘੰਟੇ ਕੰਮ ਕਰਨ ਦੀ ਸ਼ਰਤ ਵੀ ਲਾਗੂ ਹੋ ਸਕਦੀ ਹੈ। ਜੇ ਕੋਈ ਵਿਅਕਤੀ ਇਹ ਸ਼ਰਤਾਂ ਪੂਰੀਆਂ ਨਹੀਂ ਕਰਦਾ, ਤਾਂ ਉਸ ਨੂੰ ਸਹਾਇਤਾ ਤੋਂ ਵਾਂਝਾ ਕੀਤਾ ਜਾ ਸਕਦਾ ਹੈ।
ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਸ ਨਾਲ ਕਈ ਲੋਕ ਜਿਹੜੇ ਪਹਿਲਾਂ ਹੀ ਕੰਮ ਕਰ ਰਹੇ ਹਨ ਪਰ ਪੂਰੇ ਘੰਟੇ ਨਹੀਂ ਕਰ ਸਕਦੇ, ਉਹ ਵੀ ਪ੍ਰਭਾਵਿਤ ਹੋ ਸਕਦੇ ਹਨ। ਇਸ ਤੋਂ ਇਲਾਵਾ, ਕਾਗਜ਼ੀ ਕਾਰਵਾਈ ਅਤੇ ਸਖ਼ਤ ਨਿਯਮਾਂ ਕਾਰਨ ਉਹ ਲੋਕ ਵੀ ਸਹਾਇਤਾ ਗੁਆ ਸਕਦੇ ਹਨ, ਜੋ ਹਕੀਕਤ ਵਿਚ ਯੋਗ ਹਨ।
ਇਸ ਨੀਤੀ ਦੇ ਤਹਿਤ ਕੁਝ ਛੋਟਾਂ ਵੀ ਦਿੱਤੀਆਂ ਗਈਆਂ ਹਨ, ਜਿਵੇਂ ਕਿ ਬਜ਼ੁਰਗ, ਅਪਾਹਜ ਵਿਅਕਤੀ ਜਾਂ ਛੋਟੇ ਬੱਚਿਆਂ ਦੇ ਮਾਪੇ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਅਸਲ ਵਿਚ ਕਈ ਲੋਕ ਇਹ ਛੋਟ ਲੈਣ ਦੇ ਬਾਵਜੂਦ ਵੀ ਸਿਸਟਮ ਦੀ ਜਟਿਲਤਾ ਕਾਰਨ ਬਾਹਰ ਹੋ ਸਕਦੇ ਹਨ।
ਇਸ ਦੇ ਨਾਲ ਹੀ, ਹੋਰ ਪ੍ਰਸਤਾਵਾਂ ਵਿਚ ਰੈਂਟ ਸਹਾਇਤਾ ਵਿਚ ਕਟੌਤੀ ਅਤੇ ਕੁਝ ਪਰਿਵਾਰਾਂ—ਖਾਸ ਕਰਕੇ ਜਿਨ੍ਹਾਂ ਵਿਚ ਇਮੀਗ੍ਰੇਸ਼ਨ ਸਟੇਟਸ ਮਿਕਸ ਹੈ, ਲਈ ਸਹਾਇਤਾ ਖਤਮ ਕਰਨ ਦੇ ਵੀ ਇਸ਼ਾਰੇ ਮਿਲੇ ਹਨ, ਜਿਸ ਨਾਲ ਹਜ਼ਾਰਾਂ ਪਰਿਵਾਰਾਂ ਨੂੰ ਘਰ ਛੱਡਣਾ ਪੈ ਸਕਦਾ ਹੈ।
ਆਲੋਚਕਾਂ ਦਾ ਕਹਿਣਾ ਹੈ ਕਿ ਇਹ ਨਿਯਮ ਲੋਕਾਂ ਨੂੰ ਸਵੈ ਨਿਰਭਰ ਬਣਾਉਣ ਦੀ ਬਜਾਏ, ਉਨ੍ਹਾਂ ਨੂੰ ਬੇਘਰਤਾ ਵੱਲ ਧੱਕ ਸਕਦਾ ਹੈ, ਜਦਕਿ ਸਰਕਾਰ ਦਾ ਦਲੀਲ ਹੈ ਕਿ ਇਸ ਨਾਲ ਹਾਊਸਿੰਗ ਸਿਸਟਮ ਵਿਚ ਨਵੇਂ ਲੋਕਾਂ ਲਈ ਜਗ੍ਹਾ ਬਣੇਗੀ।
ਇਸ ਵੇਲੇ ਇਹ ਨਿਯਮ ਅਜੇ ਫਾਈਨਲ ਨਹੀਂ ਹੈ ਅਤੇ ਇਸ ‘ਤੇ ਕਾਨੂੰਨੀ ਚੁਣੌਤੀਆਂ ਵੀ ਆ ਸਕਦੀਆਂ ਹਨ, ਪਰ ਜੇ ਇਹ ਲਾਗੂ ਹੋ ਜਾਂਦਾ ਹੈ ਤਾਂ ਅਮਰੀਕਾ ਵਿਚ ਹਾਊਸਿੰਗ ਸੰਕਟ ਹੋਰ ਵੀ ਗੰਭੀਰ ਹੋ ਸਕਦਾ ਹੈ।