ਵਾਸ਼ਿੰਗਟਨ, 20 ਜੁਲਾਈ (ਪੰਜਾਬ ਮੇਲ)- ਅਮਰੀਕਾ ਦੇ ਹਜ਼ਾਰਾਂ ਸ਼ਹਿਰ ਆਉਣ ਵਾਲੇ ਦਹਾਕਿਆਂ ਵਿਚ ਆਬਾਦੀ ਦੀ ਵੱਡੀ ਕਮੀ ਦਾ ਸਾਹਮਣਾ ਕਰ ਸਕਦੇ ਹਨ। ਇਕ ਨਵੇਂ ਵਿਸ਼ਲੇਸ਼ਣ ਮੁਤਾਬਕ ਸਾਲ 2100 ਤੱਕ ਦੇਸ਼ ਦੇ ਲਗਭਗ 30 ਹਜ਼ਾਰ ਸ਼ਹਿਰਾਂ ਵਿਚੋਂ ਕਰੀਬ ਅੱਧੇ ਸ਼ਹਿਰਾਂ ਦੀ ਆਬਾਦੀ ਘਟ ਸਕਦੀ ਹੈ। ਕੁਝ ਮੀਡੀਆ ਰਿਪੋਰਟਾਂ ਨੇ ਇਸ ਸੰਭਾਵਨਾ ਨੂੰ ਅਮਰੀਕਾ ਵਿਚ ”ਭੂਤੀਆ ਸ਼ਹਿਰਾਂ ਦੇ ਦੌਰ” ਦੀ ਸ਼ੁਰੂਆਤ ਵਜੋਂ ਪੇਸ਼ ਕੀਤਾ ਹੈ, ਹਾਲਾਂਕਿ ਅਧਿਐਨ ਦਾ ਮਤਲਬ ਇਹ ਨਹੀਂ ਕਿ ਇਹ ਸਾਰੇ ਸ਼ਹਿਰ ਪੂਰੀ ਤਰ੍ਹਾਂ ਖਾਲੀ ਹੋ ਜਾਣਗੇ।
ਯੂਨੀਵਰਸਿਟੀ ਆਫ਼ ਇਲਿਨੋਇਸ, ਸ਼ਿਕਾਗੋ ਦੇ ਖੋਜਕਾਰਾਂ ਵੱਲੋਂ ਕੀਤੇ ਗਏ ਅਧਿਐਨ ਅਨੁਸਾਰ ਆਬਾਦੀ ਘਟਣ ਨਾਲ ਪ੍ਰਭਾਵਿਤ ਸ਼ਹਿਰਾਂ ਵਿਚ ਰਹਿਣ ਵਾਲੀ ਕੁੱਲ ਆਬਾਦੀ ਦਾ ਲਗਭਗ 12 ਤੋਂ 23 ਫ਼ੀਸਦੀ ਹਿੱਸਾ ਘਟ ਸਕਦਾ ਹੈ। ਇਨ੍ਹਾਂ ਸ਼ਹਿਰਾਂ ਦੇ ਵਸੇ ਹੋਏ ਖੇਤਰ ਦਾ 27 ਤੋਂ 44 ਫ਼ੀਸਦੀ ਹਿੱਸਾ ਵੀ ਆਬਾਦੀ ਦੀ ਕਮੀ ਨਾਲ ਪ੍ਰਭਾਵਿਤ ਹੋ ਸਕਦਾ ਹੈ। ਇਹ ਅਧਿਐਨ 11 ਜਨਵਰੀ 2024 ਨੂੰ ਵਿਗਿਆਨਕ ਰਸਾਲੇ ‘ਨੇਚਰ ਸਿਟੀਜ਼’ ਵਿਚ ਪ੍ਰਕਾਸ਼ਿਤ ਹੋਇਆ ਸੀ।
ਖੋਜਕਾਰਾਂ ਨੇ ਸਾਲ 2000, 2010 ਅਤੇ 2020 ਦੀ ਅਮਰੀਕੀ ਜਨਗਣਨਾ ਅਤੇ ਅਮਰੀਕਨ ਕਮਿਊਨਿਟੀ ਸਰਵੇਖਣ ਦੇ ਅੰਕੜਿਆਂ ਦਾ ਅਧਿਐਨ ਕੀਤਾ। ਵਿਸ਼ਲੇਸ਼ਣ ਵਿਚ ਪਾਇਆ ਗਿਆ ਕਿ 2020 ਤੱਕ ਹੀ 43 ਫ਼ੀਸਦੀ ਅਮਰੀਕੀ ਸ਼ਹਿਰਾਂ ਦੀ ਆਬਾਦੀ ਘਟ ਰਹੀ ਸੀ, ਜਦਕਿ 40 ਫ਼ੀਸਦੀ ਸ਼ਹਿਰਾਂ ਦੀ ਆਬਾਦੀ ਵਧ ਰਹੀ ਸੀ ਅਤੇ 17 ਫ਼ੀਸਦੀ ਵਿਚ ਉਤਰਾਅ-ਚੜ੍ਹਾਅ ਵਾਲਾ ਰੁਝਾਨ ਸੀ। ਭਵਿੱਖ ਦੇ ਅੰਦਾਜ਼ਿਆਂ ਲਈ ਖੋਜਕਾਰਾਂ ਨੇ ਵੱਖ-ਵੱਖ ਸਮਾਜਿਕ, ਆਰਥਿਕ ਅਤੇ ਆਬਾਦੀ ਨਾਲ ਸਬੰਧਤ ਸੰਭਾਵੀ ਸਥਿਤੀਆਂ ਨੂੰ ਆਧਾਰ ਬਣਾਇਆ।
ਅਧਿਐਨ ਮੁਤਾਬਕ ਅਮਰੀਕਾ ਦੇ ਉੱਤਰ-ਪੂਰਬੀ ਅਤੇ ਮੱਧ-ਪੱਛਮੀ ਇਲਾਕਿਆਂ ਦੇ ਸ਼ਹਿਰਾਂ ਉੱਤੇ ਆਬਾਦੀ ਦੀ ਕਮੀ ਦਾ ਸਭ ਤੋਂ ਵੱਧ ਪ੍ਰਭਾਵ ਪੈ ਸਕਦਾ ਹੈ। ਕਲੀਵਲੈਂਡ, ਬਫ਼ੇਲੋ ਅਤੇ ਪਿਟਸਬਰਗ ਵਰਗੇ ਸ਼ਹਿਰਾਂ ਵਿਚ ਆਬਾਦੀ ਘਟਣ ਦਾ ਰੁਝਾਨ ਜਾਰੀ ਰਹਿਣ ਦੀ ਸੰਭਾਵਨਾ ਹੈ। ਲੂਈਵਿਲ, ਸਿਰਾਕਿਊਜ਼ ਅਤੇ ਨਿਊ ਹੈਵਨ ਵਰਗੇ ਕੁਝ ਸ਼ਹਿਰ, ਜਿੱਥੇ ਇਸ ਵੇਲੇ ਆਬਾਦੀ ਵਿਚ ਵੱਡੀ ਕਮੀ ਨਹੀਂ ਦਿਖ ਰਹੀ, ਭਵਿੱਖ ਵਿਚ ਵੀ ਇਸ ਸੰਕਟ ਦਾ ਸਾਹਮਣਾ ਕਰ ਸਕਦੇ ਹਨ।
ਵਰਮਾਂਟ ਅਤੇ ਵੈਸਟ ਵਰਜੀਨੀਆ ਨੂੰ ਸਭ ਤੋਂ ਵੱਧ ਜ਼ੋਖ਼ਮ ਵਾਲੇ ਰਾਜਾਂ ਵਿਚ ਸ਼ਾਮਲ ਕੀਤਾ ਗਿਆ ਹੈ, ਜਿੱਥੇ 80 ਫ਼ੀਸਦੀ ਤੋਂ ਵੱਧ ਸ਼ਹਿਰਾਂ ਦੀ ਆਬਾਦੀ ਘਟ ਸਕਦੀ ਹੈ। ਇਲਿਨੋਇਸ, ਮਿਸੀਸਿਪੀ, ਕੈਨਸਸ, ਨਿਊ ਹੈਂਪਸ਼ਾਇਰ ਅਤੇ ਮਿਸ਼ੀਗਨ ਵਿਚ ਵੀ ਲਗਭਗ ਤਿੰਨ-ਚੌਥਾਈ ਸ਼ਹਿਰਾਂ ਦੇ ਸੁੰਗੜਨ ਦੀ ਸੰਭਾਵਨਾ ਦੱਸੀ ਗਈ ਹੈ। ਦੂਜੇ ਪਾਸੇ ਦੱਖਣੀ ਅਤੇ ਪੱਛਮੀ ਅਮਰੀਕਾ ਦੇ ਕਈ ਸ਼ਹਿਰਾਂ ਵਿਚ ਆਬਾਦੀ ਵਧਣ ਦੀ ਸੰਭਾਵਨਾ ਹੈ, ਪਰ ਮੌਜੂਦਾ ਤੇਜ਼ੀ ਨਾਲ ਵਧ ਰਹੇ ਟੈਕਸਸ ਅਤੇ ਯੂਟਾਹ ਵਰਗੇ ਰਾਜਾਂ ਦੇ ਕੁਝ ਸ਼ਹਿਰ ਵੀ ਸਦੀ ਦੇ ਅੰਤ ਤੱਕ ਆਬਾਦੀ ਘਟਣ ਦਾ ਸਾਹਮਣਾ ਕਰ ਸਕਦੇ ਹਨ।