– ਭਾਜਪਾ ਆਗੂ ਜੈਵੀਰ ਸ਼ੇਰਗਿੱਲ ਨੇ ਵਿਦੇਸ਼ ਮੰਤਰਾਲੇ ਕੋਲ ਚੁੱਕਿਆ ਸੀ ਮਾਮਲਾ
ਨਵੀਂ ਦਿੱਲੀ, 1 ਅਗਸਤ (ਪੰਜਾਬ ਮੇਲ)- ਪੱਛਮੀ ਏਸ਼ੀਆ ‘ਚ ਜਾਰੀ ਜੰਗ ਕਾਰਨ ਤਹਿਰਾਨ ਵਿਚ ਫਸੇ ਲਗਪਗ 50 ਇਰਾਨੀ ਸਿੱਖਾਂ ਨੂੰ ਕੇਂਦਰ ਸਰਕਾਰ ਦੀ ਮਦਦ ਨਾਲ ਵਾਪਸ ਭਾਰਤ ਲਿਆਂਦਾ ਗਿਆ ਹੈ।
ਜੰਗ ਸ਼ੁਰੂ ਹੋਣ ਤੋਂ ਬਾਅਦ ਕਈ ਇਰਾਨੀ ਸਿੱਖ ਪਰਿਵਾਰ ਇਰਾਨ ਵਿਚ ਮੁਸ਼ਕਲ ਹਾਲਾਤਾਂ ‘ਚ ਫਸ ਗਏ ਸਨ। ਸੰਕਟ ਦੇ ਮੱਦੇਨਜ਼ਰ ਭਾਰਤ ਸਰਕਾਰ ਵੱਲੋਂ ਐਡਵਾਇਜ਼ਰੀ ਜਾਰੀ ਕੀਤੇ ਜਾਣ ਤੋਂ ਤੁਰੰਤ ਬਾਅਦ ਸਿਰਫ਼ 25 ਪਰਿਵਾਰ ਹੀ ਦੇਸ਼ ਛੱਡ ਸਕੇ ਸਨ।
ਤਹਿਰਾਨ ਵਿਚ ਫਸੇ ਸਿੱਖਾਂ ਦਾ ਮਾਮਲਾ ਸਭ ਤੋਂ ਪਹਿਲਾਂ ਅਪ੍ਰੈਲ ਦੇ ਆਖ਼ਰੀ ਹਫ਼ਤੇ ਵਿਚ ਸਾਹਮਣੇ ਆਇਆ, ਜਦੋਂ ਭਾਜਪਾ ਦੇ ਬੁਲਾਰੇ ਜੈਵੀਰ ਸ਼ੇਰਗਿੱਲ ਨੇ ਤਹਿਰਾਨ ਵਿਚ ਲਗਪਗ 25 ਸਿੱਖ ਪਰਿਵਾਰਾਂ ਦੀ ਮੌਜੂਦਗੀ ਬਾਰੇ ਗੱਲ ਉਠਾਈ ਸੀ।
ਇਹ ਪਰਿਵਾਰ ਤਹਿਰਾਨ ਦੇ ਇਤਿਹਾਸਕ ਗੁਰਦੁਆਰਾ ਭਾਈ ਗੰਗਾ ਸਿੰਘ ਸਭਾ ਵਿਚ ਸ਼ਰਨ ਲੈ ਰਹੇ ਸਨ।
ਜੈਵੀਰ ਸ਼ੇਰਗਿੱਲ ਨੇ ਦੱਸਿਆ, ”ਕਈ ਸਿੱਖ ਜੋ ਸਮੇਂ ਸਿਰ ਇਰਾਨ ਨਹੀਂ ਛੱਡ ਸਕੇ ਸਨ, ਉਨ੍ਹਾਂ ਨੂੰ ਗੁਰਦੁਆਰੇ ਵਿਚ ਸ਼ਰਨ ਦਿੱਤੀ ਗਈ ਸੀ। ਉਹ ਦਿਨ ਵੇਲੇ ਗੁਰਦੁਆਰੇ ਵਿਚ ਰਹਿੰਦੇ ਸਨ ਅਤੇ ਜੰਗ ਦੇ ਪ੍ਰਭਾਵਾਂ ਤੋਂ ਬਚਣ ਲਈ ਰਾਤ ਨੂੰ ਤਹਿਰਾਨ ਵਿਚ ਆਪਣੇ ਘਰਾਂ ਨੂੰ ਪਰਤ ਜਾਂਦੇ ਸਨ। ਮੈਂ ਅਪ੍ਰੈਲ ਦੇ ਅਖੀਰ ਵਿਚ ਵਿਦੇਸ਼ ਮੰਤਰਾਲੇ ਕੋਲ ਇਹ ਮਾਮਲਾ ਉਠਾਇਆ ਸੀ।”
ਇਰਾਨੀ ਸਿੱਖਾਂ ਦਾ ਆਖ਼ਰੀ ਬੈਚ ਸੁਰੱਖਿਅਤ ਭਾਰਤ ਪਰਤ ਆਇਆ ਹੈ।
ਨਵੀਂ ਦਿੱਲੀ ਪਰਤਣ ਤੋਂ ਬਾਅਦ ਬੋਲਦਿਆਂ, ਤੀਜੀ ਪੀੜ੍ਹੀ ਦੇ ਇਰਾਨੀ ਸਿੱਖ ਸਰਦਾਰ ਲਜਪਾਲ ਸਿੰਘ ਆਨੰਦ, ਜੋ ਆਪਣੇ ਜਨਮ ਤੋਂ ਹੀ ਇਰਾਨ ਵਿਚ ਰਹਿੰਦੇ ਸਨ, ਨੇ ਕਿਹਾ, ”ਅਸੀਂ ਆਪਣੀ ਸੁਰੱਖਿਅਤ ਵਾਪਸੀ ਯਕੀਨੀ ਬਣਾਉਣ ਲਈ ਸਰਕਾਰ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਧੰਨਵਾਦੀ ਹਾਂ। ਸਮੇਂ ਸਿਰ ਕੀਤੇ ਗਏ ਯਤਨਾਂ ਕਾਰਨ, ਅਸੀਂ ਵਾਪਸ ਘਰ ਅਤੇ ਇੱਥੇ ਆਪਣੇ ਪਰਿਵਾਰਾਂ ਵਿਚ ਹਾਂ।”
ਸ਼ੇਰਗਿੱਲ ਨੇ ਪਹਿਲਾਂ ਇਰਾਨ ਤੋਂ ਫਸੇ ਸਿੱਖਾਂ ਨੂੰ ਵਾਪਸ ਲਿਆਉਣ ਲਈ ਵਿਦੇਸ਼ ਮੰਤਰੀ ਐੱਸ ਜੈਸ਼ੰਕਰ ਨੂੰ ਪੱਤਰ ਲਿਖਿਆ ਸੀ।
ਸ਼ੇਰਗਿੱਲ ਨੇ ਸਿੱਖਾਂ ਦੇ ਹੌਂਸਲੇ ਅਤੇ ਤਹਿਰਾਨ ਵਿਚ ਫਸੇ ਪਰਿਵਾਰਾਂ ਬਾਰੇ ਪਤਾ ਲੱਗਣ ਦੀ ਘਟਨਾ ਨੂੰ ਯਾਦ ਕੀਤਾ।
ਸ਼ੇਰਗਿੱਲ ਨੇ ਦੱਸਿਆ, ”ਤਹਿਰਾਨ ਦੇ ਸਭ ਤੋਂ ਪੁਰਾਣੇ ਗੁਰਦੁਆਰਿਆਂ ਵਿਚੋਂ ਇੱਕ, ਭਾਈ ਗੰਗਾ ਸਿੰਘ ਸਭਾ ਵਿਖੇ ਵਿਸਾਖੀ ਮਨਾਉਂਦੇ ਸਿੱਖਾਂ ਦੀਆਂ ਤਸਵੀਰਾਂ ਤੋਂ ਇਸ ਬਾਰੇ ਪਤਾ ਲੱਗਿਆ। ਜੰਗ ਦੇ ਬਾਵਜੂਦ, ਤਹਿਰਾਨ ਵਿਚ ਸਿੱਖਾਂ ਨੇ ਸਥਾਨਕ ਲੋਕਾਂ ਨਾਲ ਤਿਉਹਾਰ ਮਨਾਇਆ ਅਤੇ ਸ੍ਰੀ ਅਖੰਡ ਪਾਠ ਸਾਹਿਬ ਤੇ ਸ਼ਬਦ ਕੀਰਤਨ ਸਮੇਤ ਸਾਰੀਆਂ ਧਾਰਮਿਕ ਮਰਿਆਦਾਵਾਂ ਦਾ ਪਾਲਣ ਕੀਤਾ।” ਉਨ੍ਹਾਂ ਪੱਛਮੀ ਏਸ਼ੀਆ ਦੇ ਸੰਕਟ ਵਿਚ ਫਸੇ ਭਾਰਤੀਆਂ ਨੂੰ ਵਾਪਸ ਲਿਆਉਣ ਲਈ ਸਰਕਾਰ ਵੱਲੋਂ ਸ਼ੁਰੂ ਕੀਤੇ ਗਏ ‘ਅਪਰੇਸ਼ਨ ਸਿੰਧੂ’ ਦਾ ਵੀ ਜ਼ਿਕਰ ਕੀਤਾ।
ਸ਼ੇਰਗਿੱਲ ਨੇ ਕਿਹਾ ਕਿ ਇਰਾਨੀ ਸਿੱਖ ਪਰਿਵਾਰਾਂ ਦੀ ਵਾਪਸੀ, ਸਿੱਖ ਭਾਈਚਾਰੇ ਲਈ ਪੀ.ਐੱਮ. ਮੋਦੀ ਦੀਆਂ ਚੱਲ ਰਹੀਆਂ ਪਹਿਲਕਦਮੀਆਂ ਦਾ ਹੀ ਇੱਕ ਹਿੱਸਾ ਹੈ। ਇਸ ਦਾ ਮਕਸਦ, ਹੋਰ ਪਹਿਲਕਦਮੀਆਂ ਦੇ ਨਾਲ-ਨਾਲ ਅਫ਼ਗਾਨਿਸਤਾਨ ਤੋਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਸਰੂਪਾਂ ਦੀ ਸੁਰੱਖਿਅਤ ਵਾਪਸੀ ਨੂੰ ਯਕੀਨੀ ਬਣਾਉਣਾ ਵੀ ਸੀ।
ਸ਼ੇਰਗਿੱਲ ਨੇ ਦੱਸਿਆ ਕਿ ਲਗਪਗ 100 ਸਿੱਖ ਪਰਿਵਾਰ 1900 ਦੇ ਦਹਾਕੇ ਦੀ ਸ਼ੁਰੂਆਤ ਤੋਂ ਹੀ, ਯਾਨੀ ਇੱਕ ਸਦੀ ਤੋਂ ਵੱਧ ਸਮੇਂ ਤੋਂ ਇਰਾਨ ਵਿਚ ਰਹਿ ਰਹੇ ਹਨ।
ਸ਼ੇਰਗਿੱਲ ਨੇ ਕਿਹਾ, ”ਇਸੇ ਕਰਕੇ ਉਨ੍ਹਾਂ ਦੀ ਭਾਰਤ ਵਿਚ ਸੁਰੱਖਿਅਤ ਵਾਪਸੀ ਦੁਨੀਆਂ ਭਰ ਦੇ ਸਿੱਖ ਭਾਈਚਾਰੇ ਲਈ ਡੂੰਘੇ ਜਜ਼ਬਾਤੀ ਮਹੱਤਵ ਦਾ ਵਿਸ਼ਾ ਹੈ।”