ਵਾਸ਼ਿੰਗਟਨ, 12 ਅਗਸਤ (ਪੰਜਾਬ ਮੇਲ)- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਬੱਚਿਆਂ ਦੇ ਟੀਕਾਕਰਨ ਸਬੰਧੀ ਸੰਘੀ ਨੀਤੀ ‘ਚ ਵੱਡੇ ਬਦਲਾਅ ਕਰਨ ਵਾਲੇ ਕਾਰਜਕਾਰੀ ਹੁਕਮ ‘ਤੇ ਦਸਤਖ਼ਤ ਕੀਤੇ ਹਨ। ਨਵੀਂ ਨੀਤੀ ਤਹਿਤ ਬੱਚਿਆਂ ਦੇ ਸ਼ੁਰੂਆਤੀ ਸਾਲਾਂ ਵਿਚ ਦਿੱਤੀਆਂ ਜਾਣ ਵਾਲੀਆਂ ਕੁਝ ਸਿਫ਼ਾਰਸ਼ੀ ਵੈਕਸੀਨਾਂ ਦੀ ਗਿਣਤੀ ਘਟਾਉਣ ਅਤੇ ਟੀਕਿਆਂ ਨੂੰ ਲੰਮੇ ਸਮੇਂ ਵਿਚ ਕਈ ਡਾਕਟਰੀ ਦੌਰਿਆਂ ਦੌਰਾਨ ਦੇਣ ਦੀ ਸਿਫ਼ਾਰਸ਼ ਕੀਤੀ ਗਈ ਹੈ।
ਹੁਕਮ ਵਿਚ ਬੱਚਿਆਂ ਦੇ ਟੀਕਾਕਰਨ ਪ੍ਰੋਗਰਾਮ ਨੂੰ ਤਿੰਨ ਸ਼੍ਰੇਣੀਆਂ ਵਿਚ ਵੰਡਣ ਦੀ ਗੱਲ ਕੀਤੀ ਗਈ ਹੈ। ਇਸ ਤੋਂ ਇਲਾਵਾ ਖਸਰਾ, ਕੰਨ ਪੇੜੇ ਅਤੇ ਰੁਬੈਲਾ ਤੋਂ ਬਚਾਅ ਲਈ ਦਿੱਤੀ ਜਾਣ ਵਾਲੀ ਐੱਮ.ਐੱਮ.ਆਰ. ਵੈਕਸੀਨ ਨੂੰ ਤਿੰਨ ਵੱਖ-ਵੱਖ ਟੀਕਿਆਂ ਵਿਚ ਵੰਡਣ ਦੀ ਯੋਜਨਾ ਵੀ ਸ਼ਾਮਲ ਹੈ। ਰਿਪੋਰਟ ਮੁਤਾਬਕ ਇਹ ਕਦਮ ਮੈਡੀਕਲ ਖੇਤਰ ਵਿਚ ਵਿਆਪਕ ਵਿਗਿਆਨਕ ਸਹਿਮਤੀ ਤੋਂ ਵੱਖਰਾ ਹੈ।
ਨਵੀਂ ਨੀਤੀ ਅਨੁਸਾਰ ਸਾਰੇ ਬੱਚਿਆਂ ਲਈ ਖਸਰਾ, ਕੰਨ ਪੇੜੇ, ਰੁਬੈਲਾ, ਡਿਫਥੀਰੀਆ, ਟੈਟਨਸ, ਕਾਲੀ ਖੰਘ, ਪੋਲਿਓ, ਐੱਚ.ਆਈ.ਬੀ., ਨਿਊਮੋਕੋਕਲ ਬਿਮਾਰੀ, ਐੱਚ.ਪੀ.ਵੀ. ਅਤੇ ਚਿਕਨਪੌਕਸ ਵਿਰੁੱਧ ਵੈਕਸੀਨਾਂ ਦੀ ਸਿਫ਼ਾਰਸ਼ ਜਾਰੀ ਰਹੇਗੀ। ਜਦਕਿ ਆਰ.ਐੱਸ.ਵੀ. ਐਂਟੀਬਾਡੀਜ਼ ਅਤੇ ਹੈਪੇਟਾਈਟਸ ਏ, ਹੈਪੇਟਾਈਟਸ ਬੀ, ਮੈਨਿੰਜੋਕੋਕਲ ਅਤੇ ਡੇਂਗੂ ਵੈਕਸੀਨਾਂ ਹੁਣ ਮੁੱਖ ਤੌਰ ‘ਤੇ ਉੱਚ-ਖ਼ਤਰੇ ਵਾਲੇ ਬੱਚਿਆਂ ਲਈ ਸਿਫ਼ਾਰਸ਼ ਕੀਤੀਆਂ ਜਾਣਗੀਆਂ।
ਟਰੰਪ ਨੇ ਕਿਹਾ ਕਿ ਬੱਚਿਆਂ ਨੂੰ ਇੱਕੋ ਸਮੇਂ ਵੱਡੀ ਗਿਣਤੀ ਵਿਚ ਟੀਕੇ ਦੇਣ ਦੀ ਬਜਾਏ ਉਨ੍ਹਾਂ ਨੂੰ ਵੱਖ-ਵੱਖ ਡਾਕਟਰੀ ਦੌਰਿਆਂ ਵਿਚ ਦੇਣਾ ਚਾਹੀਦਾ ਹੈ। ਹਾਲਾਂਕਿ ਰਿਪੋਰਟ ਮੁਤਾਬਕ ਟਰੰਪ ਵੱਲੋਂ ਟੀਕਿਆਂ ਦੀ ਮਾਤਰਾ ਬਾਰੇ ਕੀਤੇ ਗਏ ਦਾਅਵਿਆਂ ਨੂੰ ਸਮਰਥਨ ਦੇਣ ਵਾਲੇ ਸਬੂਤ ਮੌਜੂਦ ਨਹੀਂ ਹਨ।
ਰਿਪਬਲਿਕਨ ਸੈਨੇਟਰ ਅਤੇ ਡਾਕਟਰ ਬਿਲ ਕੈਸੀਡੀ ਨੇ ਹੁਕਮ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਵੈਕਸੀਨਾਂ ਬਹੁਤ ਹੱਦ ਤੱਕ ਸੁਰੱਖਿਅਤ ਅਤੇ ਪ੍ਰਭਾਵਸ਼ਾਲੀ ਹਨ ਅਤੇ ਵੈਕਸੀਨਾਂ ਦਾ ਆਟੀਜ਼ਮ ਨਾਲ ਕੋਈ ਸਬੰਧ ਨਹੀਂ ਹੈ। ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਵੈਕਸੀਨਾਂ ਨੂੰ ਵੱਖ ਕਰਨ ਨਾਲ ਬੱਚਿਆਂ ਨੂੰ ਇੱਕੋ ਸੁਰੱਖਿਆ ਲਈ ਹੋਰ ਟੀਕੇ ਲਗਵਾਉਣੇ ਪੈ ਸਕਦੇ ਹਨ।
ਬਾਲ ਰੋਗ ਮਾਹਿਰਾਂ ਨੇ ਇਹ ਵੀ ਚਿੰਤਾ ਜਤਾਈ ਹੈ ਕਿ ਕੁਝ ਵੈਕਸੀਨਾਂ ਦੀ ਆਮ ਸਿਫ਼ਾਰਸ਼ ਹਟਾਉਣ ਨਾਲ ਉਨ੍ਹਾਂ ਮਾਪਿਆਂ ਲਈ ਖਰਚ ਵਧ ਸਕਦਾ ਹੈ, ਜੋ ਆਪਣੇ ਬੱਚਿਆਂ ਦਾ ਪੂਰਾ ਟੀਕਾਕਰਨ ਕਰਵਾਉਣਾ ਚਾਹੁੰਦੇ ਹਨ। ਸਰਕਾਰ ਨੇ ਕਿਹਾ ਹੈ ਕਿ ਐੱਮ.ਐੱਮ.ਆਰ. ਦੇ ਵੱਖਰੇ ਟੀਕੇ ਉਪਲਬਧ ਕਰਵਾਉਣ ਲਈ ਨਿੱਜੀ ਖੇਤਰ ਨਾਲ ਕੰਮ ਕੀਤਾ ਜਾ ਰਿਹਾ ਹੈ ਅਤੇ ਇਸ ਸਬੰਧੀ ਯੋਜਨਾ 90 ਦਿਨਾਂ ‘ਚ ਤਿਆਰ ਕਰਨ ਦੀ ਉਮੀਦ ਹੈ।