ਵਾਸ਼ਿੰਗਟਨ, 20 ਮਈ (ਪੰਜਾਬ ਮੇਲ)- ਇੱਕ ਰਿਪੋਰਟ ਮੁਤਾਬਕ ਡੋਨਾਲਡ ਟਰੰਪ ਪ੍ਰਸ਼ਾਸਨ ਦੀ ਸਖ਼ਤ ਇਮੀਗ੍ਰੇਸ਼ਨ ਕਾਰਵਾਈ ਕਾਰਨ 2 ਲੱਖ ਤੋਂ ਵੱਧ ਬੱਚੇ ਘੱਟੋ-ਘੱਟ ਇੱਕ ਮਾਪੇ ਤੋਂ ਵੱਖ ਹੋ ਸਕਦੇ ਹਨ। ਰਿਪੋਰਟ ਅਨੁਸਾਰ ਇਨ੍ਹਾਂ ਵਿਚੋਂ ਲਗਭਗ 1 ਲੱਖ 45 ਹਜ਼ਾਰ ਬੱਚੇ ਅਮਰੀਕੀ ਨਾਗਰਿਕ ਹਨ।
ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ 20 ਜਨਵਰੀ 2025 ਤੋਂ 9 ਅਪ੍ਰੈਲ 2025 ਤੱਕ ਕਰੀਬ 4 ਲੱਖ ਇਮੀਗ੍ਰੈਂਟਾਂ ਨੂੰ ਹਿਰਾਸਤ ਵਿਚ ਲਿਆ ਗਿਆ। ਖੋਜਕਾਰਾਂ ਨੇ ਅਮਰੀਕਨ ਕਮਿਊਨਿਟੀ ਸਰਵੇ ਅਤੇ ਡਿਟੇਨੀ ਡੈਮੋਗ੍ਰਾਫਿਕ ਡੇਟਾ ਦੀ ਮਦਦ ਨਾਲ ਅੰਦਾਜ਼ਾ ਲਗਾਇਆ ਕਿ ਵੱਡੀ ਗਿਣਤੀ ਵਿਚ ਬੱਚੇ ਆਪਣੇ ਮਾਪਿਆਂ ਤੋਂ ਵੱਖ ਹੋਏ ਹਨ।
ਰਿਪੋਰਟ ਦੀ ਸਹਿ-ਲੇਖਿਕਾ ਤਾਰਾ ਵਾਟਸਨ ਨੇ ਕਿਹਾ ਕਿ ”ਕਿਸੇ ਵੀ ਤਰੀਕੇ ਨਾਲ ਵੇਖੋ, ਦਸਾਂ ਹਜ਼ਾਰਾਂ ਬੱਚਿਆਂ ਨੇ ਇਸ ਪ੍ਰਸ਼ਾਸਨ ਦੇ ਦੌਰਾਨ ਮਾਪਿਆਂ ਦੀ ਹਿਰਾਸਤ ਦਾ ਅਸਰ ਮਹਿਸੂਸ ਕੀਤਾ ਹੈ, ਅਤੇ ਇਨ੍ਹਾਂ ਵਿਚੋਂ ਜ਼ਿਆਦਾਤਰ ਅਮਰੀਕੀ ਨਾਗਰਿਕ ਹਨ।”
ਖੋਜਕਾਰਾਂ ਦਾ ਕਹਿਣਾ ਹੈ ਕਿ ਅਧਿਕਾਰਿਕ ਅੰਕੜੇ ਹਕੀਕਤ ਤੋਂ ਘੱਟ ਹੋ ਸਕਦੇ ਹਨ, ਕਿਉਂਕਿ ਕਈ ਵਾਰ ਹਿਰਾਸਤ ਵਿਚ ਲਏ ਗਏ ਲੋਕਾਂ ਤੋਂ ਇਹ ਨਹੀਂ ਪੁੱਛਿਆ ਜਾਂਦਾ ਕਿ ਕੀ ਉਹ ਮਾਪੇ ਹਨ। ਕੁਝ ਪਰਿਵਾਰ ਆਪਣੇ ਬੱਚਿਆਂ ਦੀ ਸੁਰੱਖਿਆ ਲਈ ਵੀ ਇਹ ਜਾਣਕਾਰੀ ਸਾਂਝੀ ਕਰਨ ਤੋਂ ਡਰਦੇ ਹਨ।
ਰਿਪੋਰਟ ਅਨੁਸਾਰ ਲਗਭਗ 22 ਹਜ਼ਾਰ ਬੱਚੇ ਐਸੇ ਹਨ, ਜੋ ਘਰ ਵਿਚ ਕਿਸੇ ਵੀ ਮਾਪੇ ਤੋਂ ਬਿਨਾਂ ਰਹਿ ਗਏ ਹਨ। ਕੁਝ ਬੱਚਿਆਂ ਦੀ ਦੇਖਭਾਲ ਵੱਡੇ ਭੈਣ-ਭਰਾ ਜਾਂ ਕਮਿਊਨਿਟੀ ਮੈਂਬਰ ਕਰ ਰਹੇ ਹਨ, ਜਦਕਿ ਥੋੜ੍ਹੇ ਬੱਚੇ ਫੋਸਟਰ ਕੇਅਰ ਵਿਚ ਹਨ।
ਸਹਿ-ਲੇਖਿਕਾ ਮਾਰੀਆ ਕੈਨਸੀਅਨ ਨੇ ਕਿਹਾ ਕਿ ਬਹੁਤ ਸਾਰੇ ਬੱਚੇ ਉਨ੍ਹਾਂ ਲੋਕਾਂ ਕੋਲ ਰਹਿ ਰਹੇ ਹਨ, ਜਿਨ੍ਹਾਂ ‘ਤੇ ਕਾਨੂੰਨੀ ਤੌਰ ‘ਤੇ ਉਨ੍ਹਾਂ ਦੀ ਦੇਖਭਾਲ ਦੀ ਜ਼ਿੰਮੇਵਾਰੀ ਨਹੀਂ ਹੈ।
ਉਮਰ ਅਨੁਸਾਰ ਅੰਕੜਿਆਂ ਵਿਚ ਦੱਸਿਆ ਗਿਆ ਕਿ ਪ੍ਰਭਾਵਿਤ ਅਮਰੀਕੀ ਨਾਗਰਿਕ ਬੱਚਿਆਂ ਵਿਚੋਂ 36.5 ਫੀਸਦੀ ਦੀ ਉਮਰ 6 ਸਾਲ ਤੋਂ ਘੱਟ ਹੈ, 36.1 ਫੀਸਦੀ 6 ਤੋਂ 12 ਸਾਲ ਦੇ ਹਨ ਅਤੇ 27.4 ਫੀਸਦੀ 12 ਤੋਂ 17 ਸਾਲ ਦੀ ਉਮਰ ਦੇ ਹਨ।
ਰਿਪੋਰਟ ਦੇ ਅੰਤ ਵਿਚ ਕਿਹਾ ਗਿਆ ਹੈ ਕਿ ਜਿਵੇਂ-ਜਿਵੇਂ ਇਮੀਗ੍ਰੇਸ਼ਨ ਕਾਰਵਾਈ ਵਧ ਰਹੀ ਹੈ, ਸਰਕਾਰ ਦੀ ਜ਼ਿੰਮੇਵਾਰੀ ਬਣਦੀ ਹੈ ਕਿ ਪ੍ਰਭਾਵਿਤ ਬੱਚਿਆਂ ਦੀ ਸੁਰੱਖਿਆ, ਮਾਨਸਿਕ ਸਹਾਇਤਾ ਅਤੇ ਬੁਨਿਆਦੀ ਲੋੜਾਂ ਦਾ ਖ਼ਿਆਲ ਰੱਖਿਆ ਜਾਵੇ।