— ਭਾਰਤ ਈ.ਬੀ.-2 ਬੰਦ, ਈ.ਬੀ.-1 ਪਿੱਛੇ ਗਿਆ, ਬਾਕੀ ਵਿਸ਼ਵ ਲਈ ਈ.ਬੀ.2 Current
ਵਾਸ਼ਿੰਗਟਨ, 30 ਜੂਨ (ਪੰਜਾਬ ਮੇਲ)- ਯੂ.ਐੱਸ. ਡਿਪਾਰਟਮੈਂਟ ਆਫ ਸਟੇਟ ਵੱਲੋਂ ਜੁਲਾਈ 2026 ਵੀਜ਼ਾ ਬੁਲੇਟਿਨ ਜਾਰੀ ਕੀਤਾ ਗਿਆ ਹੈ। ਇਸ ਬੁਲੇਟਿਨ ਵਿਚ ਰੁਜ਼ਗਾਰ-ਅਧਾਰਿਤ ਗ੍ਰੀਨ ਕਾਰਡ ਬਿਨੈਕਾਰ ਲਈ ਕੁਝ ਚੰਗੀਆਂ ਅਤੇ ਕੁਝ ਗੰਭੀਰ ਖ਼ਬਰਾਂ ਹਨ। ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਈ.ਬੀ.-2 ਕੈਟਾਗਰੀ ”ਬਾਕੀ ਵਿਸ਼ਵ” ਲਈ Current ਰਹੀ ਹੈ, ਪਰ ਭਾਰਤ ਈ.ਬੀ.-2 ਨੂੰ ਵਿੱਤੀ ਸਾਲ 2026 ਦੇ ਬਾਕੀ ਸਮੇਂ ਲਈ ”ਅਣਉਪਲਬਧ” ਕਰ ਦਿੱਤਾ ਗਿਆ ਹੈ। ਡਿਪਾਰਟਮੈਂਟ ਆਫ਼ ਸਟੇਟ ਦੇ ਬੁਲੇਟਿਨ ਅਨੁਸਾਰ ਈ.ਬੀ.-2 ਦੀ ਭਾਰਤ ਵਿਚ ਸਾਲਾਨਾ ਸੀਮਾ ਪੂਰੀ ਹੋ ਚੁੱਕੀ ਹੈ, ਇਸ ਲਈ ਸਤੰਬਰ 30, 2026 ਤੱਕ ਇਸ ਕੈਟਾਗਰੀ ਵਿਚ ਕੋਈ ਨਵਾਂ ਇਮੀਗ੍ਰੈਂਟ ਵੀਜ਼ਾ ਨੰਬਰ ਉਪਲਬਧ ਨਹੀਂ ਰਹੇਗਾ।
ਜੁਲਾਈ 2026 ਵਿਚ ਯੂ.ਐੱਸ.ਸੀ.ਆਈ.ਐੱਸ. ਨੇ ਰੁਜ਼ਗਾਰ-ਅਧਾਰਿਤ ਐਡਜਸਮੈਂਟ ਆਫ ਸਟੇਟਸ ਫਾਈਲਿੰਗਜ਼ ਲਈ ਫਾਈਨਲ ਐਕਸ਼ਨ ਡੇਟ ਚਾਰਟ ਵਰਤਣ ਲਈ ਕਿਹਾ ਹੈ। ਇਸਦਾ ਮਤਲਬ ਹੈ ਕਿ ਜਿਹੜੇ ਬਿਨੈਕਾਰ ਅਮਰੀਕਾ ਦੇ ਅੰਦਰ ਹਨ ਅਤੇ ਆਈ-485 ਫਾਈਲ ਕਰਨਾ ਚਾਹੁੰਦੇ ਹਨ, ਉਨ੍ਹਾਂ ਨੂੰ ਡੇਟਸ ਫਾਰ ਫਾਈਲਿੰਗ ਚਾਰਟ ਨਹੀਂ, ਸਗੋਂ ਫਾਈਨਲ ਐਕਸ਼ਨ ਡੇਟ ਚਾਰਟ ਦੇਖਣਾ ਪਵੇਗਾ। ਯੂ.ਐੱਸ.ਸੀ.ਆਈ.ਐੱਸ. ਦੀ ਜੁਲਾਈ 2026 ਫਾਈਲਿੰਗ ਚਾਰਟ ਗਾਈਡੈਂਸ ਮੁਤਾਬਕ ਰੁਜ਼ਗਾਰ-ਅਧਾਰਿਤ ਤਰਜੀਹੀ ਕੈਟਾਗਰੀਆਂ ਲਈ ਫਾਈਨਲ ਐਕਸ਼ਨ ਡੇਟ ਚਾਰਟ ਹੀ ਆਪਰੇਟਿਵ ਚਾਰਟ ਹੈ।
ਬਾਕੀ ਵਿਸ਼ਵ ਲਈ ਈ.ਬੀ.-2 Current ਰਹਿਣਾ ਬਹੁਤ ਵੱਡੀ ਮੌਕਾ ਹੈ। ਜਿਹੜੇ ਬਿਨੈਕਾਰ ਭਾਰਤ ਅਤੇ ਚੀਨ ਤੋਂ ਇਲਾਵਾ ਹੋਰ ਦੇਸ਼ਾਂ ਤੋਂ ਹਨ ਅਤੇ ਈ.ਬੀ.-2, ਈ.ਬੀ.2 ਐੱਨ.ਆਈ.ਡਬਲਯੂ. ਜਾਂ PERM-ਅਧਾਰਿਤ ਈ.ਬੀ.-2 ਕੈਟਾਗਰੀ ਵਿਚ ਯੋਗਤਾ ਪੂਰੀ ਕਰਦੇ ਹਨ, ਉਹ ਯੋਗ ਹੋਣ ‘ਤੇ ਆਈ-485 ਐਡਜਸਮੈਂਟ ਆਫ ਸਟੇਟਸ ਫਾਈਲ ਕਰ ਸਕਦੇ ਹਨ। ਜੇ ਕੇਸ ਦੀ ਯੋਗਤਾ ਦੀ ਇਜਾਜ਼ਤ ਕਰਦੀ ਹੈ, ਤਾਂ ਕੁਝ ਬਿਨੈਕਾਰ ਆਈ-140 ਅਤੇ ਆਈ-485 ਇਕੱਠੇ ਵੀ ਫਾਈਲ ਕਰ ਸਕਦੇ ਹਨ। ਪਰ ”Current” ਹੋਣ ਦਾ ਇਹ ਮਤਲਬ ਨਹੀਂ ਕਿ ਗਰੀਨ ਕਾਰਡ ਤੁਰੰਤ ਮਨਜ਼ੂਰ ਹੋ ਜਾਵੇਗਾ; ਅੰਤਿਮ ਮਨਜ਼ੂਰੀ ਯੂ.ਐੱਸ.ਸੀ.ਆਈ.ਐੱਸ. ਅੰਤਿਮ ਮਨਜ਼ੂਰੀ ਉੱਤੇ ਨਿਰਭਰ ਕਰੇਗਾ।
ਭਾਰਤ ਲਈ ਸਭ ਤੋਂ ਵੱਡਾ ਝਟਕਾ ਈ.ਬੀ.-2 ਕੈਟਾਗਰੀ ‘ਚ ਆਇਆ ਹੈ। ਜੂਨ 2026 ਵਿਚ ਈ.ਬੀ.-2 ਭਾਰਤ ਦੀ ਫਾਈਨਲ ਐਕਸ਼ਨ ਡੇਟ 01 ਸਤੰਬਰ 2013 ਸੀ, ਪਰ ਜੁਲਾਈ ਵਿਚ ਇਹ ਕੈਟਾਗਰੀ ”ਅਣਉਪਲਬਧ” ਹੋ ਗਈ। ਇਹ ਸਿਰਫ਼ ਰੀਟ੍ਰੋਗ੍ਰੇਸ਼ਨ ਨਹੀਂ, ਬਲਕਿ ਵਿੱਤੀ ਸਾਲ ਦੇ ਬਾਕੀ ਸਮੇਂ ਲਈ ਹਾਰਡ ਸਟਾਪ ਹੈ। ਡਿਪਾਰਟਮੈਂਟ ਆਫ ਸਟੇਟ ਨੇ ਕਿਹਾ ਹੈ ਕਿ ਅਕਤੂਬਰ 2026, ਯਾਨੀ ਵਿੱਤੀ ਸਾਲ 2027 ਦੀ ਸ਼ੁਰੂਆਤ ‘ਤੇ, ਕੈਟਾਗਰੀ ਮੁੜ ਖੋਲ੍ਹਣ ਦੀ ਸੰਭਾਵਨਾ ਹੋ ਸਕਦੀ ਹੈ, ਪਰ ਮਿਤੀ ਦੀ ਮੰਗ ਅਤੇ ਸਾਲਾਨਾ ਸੀਮਾ ‘ਤੇ ਨਿਰਭਰ ਕਰੇਗੀ।
ਭਾਰਤ ਈ.ਬੀ.-1 ਕੈਟਾਗਰੀ ਵਿਚ ਵੀ ਰੀਟ੍ਰੋਗ੍ਰੇਸ਼ਨ ਆਈ ਹੈ। ਜੁਲਾਈ 2026 ਵਿਚ ਈ.ਬੀ.-1 ਭਾਰਤ ਦੀ ਫਾਈਨਲ ਐਕਸ਼ਨ ਡੇਟ 15 ਅਕਤੂਬਰ 2022 ਹੋ ਗਈ ਹੈ। ਡਿਪਾਰਟਮੈਂਟ ਆਫ਼ ਸਟੇਟ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇ ਭਾਰਤ ਦਾ ਪ੍ਰੋ-ਰੇਟ ਈ.ਬੀ.-1 ਲਿਮਟ ਵਿੱਤੀ ਸਾਲ ਖ਼ਤਮ ਹੋਣ ਤੋਂ ਪਹਿਲਾਂ ਪੂਰਾ ਹੋ ਗਿਆ, ਤਾਂ ਹੋਰ ਰੀਟ੍ਰੋਗ੍ਰੇਸ਼ਨ ਜਾਂ ਕੈਟਾਗਰੀ ਅਣਉਪਲਬਧ ਹੋਣ ਦੀ ਸੰਭਾਵਨਾ ਰਹਿ ਸਕਦੀ ਹੈ।
ਚੀਨ ਲਈ ਈ.ਬੀ.-2 ਕੈਟਾਗਰੀ 01 ਸਤੰਬਰ 2021 ‘ਤੇ ਕੋਈ ਬਦਲਾਅ ਨਹੀਂ ਹੈ। ਪਰ ਡਿਪਾਰਟਮੈਂਟ ਆਫ਼ ਸਟੇਟ ਨੇ ਚੀਨ ਈ.ਬੀ.-2 ਲਈ ਵੀ ਚੇਤਾਵਨੀ ਦਿੱਤੀ ਹੈ ਕਿ ਡਿਮਾਂਡ ਵਧਣ ਕਾਰਨ ਆਉਣ ਵਾਲੇ ਮਹੀਨਿਆਂ ਵਿਚ ਰੀਟ੍ਰੋਗ੍ਰੇਸ਼ਨਜਾਂ ਕੈਟਾਗਰੀ ਅਣਉਪਲਬਧ ਹੋ ਸਕਦੀ ਹੈ। ਚੀਨ ਈ.ਬੀ.-1 ਵਿਚ ਜੁਲਾਈ ਬੁਲੇਟਿਨ ਅਨੁਸਾਰ ਮੂਵਮੈਂਟ ਹੋਈ ਹੈ ਅਤੇ ਮਿਤੀ 01 ਜੂਨ 2023 ਹੈ।
ਈ.ਬੀ.-3 ਕੈਟਾਗਰੀ ਵਿਚ ਬਾਕੀ ਵਿਸ਼ਵ ਲਈ ਫਾਈਨਲ ਐਕਸ਼ਨ ਡੇਟ 01 ਅਗਸਤ 2024 ਹੈ। ਚੀਨ ਲਈ ਈ.ਬੀ.-3 ਮਿਤੀ 22 ਦਸੰਬਰ 2021 ਹੈ, ਭਾਰਤ ਲਈ 01 ਜਨਵਰੀ 2014, ਅਤੇ ਫਿਲੀਪੀਨਜ਼ ਲਈ 01 ਅਗਸਤ 2023 ਹੈ। ਫਿਲੀਪੀਨਜ਼ ਈ.ਬੀ.-3 ਲਈ ਵੀ ਡਿਪਾਰਟਮੈਂਟ ਆਫ਼ ਸਟੇਟ ਨੇ ਚੇਤਾਵਨੀ ਦਿੱਤੀ ਹੈ ਕਿ ਵਧੀ ਹੋਈ ਮੰਗ ਕਾਰਨ ਆਉਣ ਵਾਲੇ ਮਹੀਨਿਆਂ ਵਿਚ ਰੀਟ੍ਰੋਗ੍ਰੇਸ਼ਨ ਜਾਂ ਅਣਉਪਲਬਧਤਾ ਹੋ ਸਕਦੀ ਹੈ।
ਈ.ਬੀ.-5 ਕੈਟਾਗਰੀ ਵਿਚ ਵੀ ਭਾਰਤ ਲਈ ਵੱਡਾ ਝਟਕਾ ਹੈ। ਈ.ਬੀ.-5 ਅਨਰਿਜ਼ਰਵਡ ਭਾਰਤ ਜੁਲਾਈ 2026 ‘ਚ ”ਅਣਉਪਲਬਧ” ਹੈ। ਚੀਨ ਲਈ ਈ.ਬੀ.-5 ਅਨਰਿਜ਼ਰਵਡ ਦੀ ਮਿਤੀ 01 ਦਸੰਬਰ 2016 ਹੈ, ਜਦਕਿ ਬਾਕੀ ਵਿਸ਼ਵ ਲਈ ਇਹ Current  ਹੈ। ਪਰ ਈ.ਬੀ.-5 ਸੈਟ-ਅਸਾਈਡ ਕੈਟਾਗਰੀਆਂ — ਪੇਂਡੂ, ਉੱਚ ਬੇਰੁਜ਼ਗਾਰੀ ਅਤੇ ਬੁਨਿਆਦੀ ਢਾਂਚਾ — ਸਾਰੇ ਦੇਸ਼ਾਂ ਲਈ Current ਹਨ, ਜਿਸ ਵਿਚ ਭਾਰਤ ਅਤੇ ਚੀਨ ਵੀ ਸ਼ਾਮਲ ਹਨ।
ਹੁਣ ਸਵਾਲ ਹੈ ਕਿ ਬਿਨੈਕਾਰਾਂ ਲਈ ਇਸਦਾ ਵਿਹਾਰਕ ਅਰਥ ਕੀ ਹੈ। ਜੇ ਕੋਈ ਬਿਨੈਕਾਰ ਅਮਰੀਕਾ ਦੇ ਅੰਦਰ ਵੈਧ ਨਾਨ-ਇਮੀਗਰੈਂਟ ਸਟੇਟਸ, ਜਿਵੇਂ ਐੱਚ-1ਬੀ, ਐੱਲ-1, ਓ-1, ਐੱਫ-1 ਜਾਂ ਹੋਰ ਕਾਨੂੰਨੀ ਸਥਿਤੀ ਵਿਚ ਹੈ ਅਤੇ ਉਸਦੀ ਕੈਟਾਗਰੀ Current ਹੈ, ਤਾਂ ਉਹ ਆਈ-485 ਫਾਈਲਿੰਗ ਦਾ ਵਿਕਲਪ ਐਕਸਪਲੋਰ ਕਰ ਸਕਦਾ ਹੈ। ਆਈ-485 ਫਾਈਲ ਹੋਣ ਤੋਂ ਬਾਅਦ ਬਿਨੈਕਾਰ ਈ.ਏ.ਡੀ. ਵਰਕ ਪਰਮਿਟ ਅਤੇ ਐਡਵਾਂਸ ਪੈਰੋਲ ਯਾਤਰਾ ਦਸਤਾਵੇਜ਼ ਲਈ ਵੀ ਅਪਲਾਈ ਕਰ ਸਕਦਾ ਹੈ। ਪਰ ਜੇ ਬਾਅਦ ਵਿਚ ਵੀਜ਼ਾ ਨੰਬਰ ਅਣਉਪਲਬਧ ਹੋ ਜਾਵੇ, ਤਾਂ ਪੈਂਡਿੰਗ ਆਈ-485 ਰਹਿ ਸਕਦੀ ਹੈ, ਪਰ ਗ੍ਰੀਨ ਕਾਰਡ ਦੀ ਮਨਜ਼ੂਰੀ ਤਦ ਤੱਕ ਨਹੀਂ ਹੋਵੇਗੀ, ਜਦੋਂ ਤੱਕ ਵੀਜ਼ਾ ਨੰਬਰ ਦੁਬਾਰਾ ਉਪਲਬਧ ਨਾ ਹੋਵੇ।
ਭਾਰਤ ਈ.ਬੀ.-2 ਬਿਨੈਕਾਰਾਂ ਲਈ ਸਭ ਤੋਂ ਜ਼ਰੂਰੀ ਗੱਲ ਇਹ ਹੈ ਕਿ ”ਅਣਉਪਲਬਧ” ਹੋਣ ਨਾਲ ਆਈ-140 ਪਟੀਸ਼ਨ ਕੈਂਸਲ ਨਹੀਂ ਹੁੰਦੀ। ਜੇ ਕਿਸੇ ਦੀ ਆਈ-140 ਪੈਂਡਿੰਗ ਜਾਂ ਮਨਜ਼ੂਰ ਹੈ, ਉਹ ਪਟੀਸ਼ਨ ਆਪਣੀ ਜਗ੍ਹਾ ਰਹਿੰਦੀ ਹੈ। ਤਰਜੀਹੀ ਮਿਤੀ ਵੀ ਖਤਮ ਨਹੀਂ ਹੁੰਦੀ। ਪਰ ਇਸ ਵੇਲੇ ਭਾਰਤ ਈ.ਬੀ.-2 ਕੈਟਾਗਰੀ ਵਿਚ ਗ੍ਰੀਨ ਕਾਰਡ ਦੀ ਪ੍ਰਵਾਨਗੀ ਜਾਂ ਇਮੀਗ੍ਰੈਂਟ ਵੀਜ਼ਾ ਜਾਰੀ ਕਰਨਾ ਵਿੱਤੀ ਸਾਲ 2026 ਦੇ ਅੰਤ ਤੱਕ ਸੰਭਵ ਨਹੀਂ ਹੈ।
ਜਿਹੜੇ ਭਾਰਤੀ ਨਾਗਰਿਕ ਈ.ਬੀ.-2 ਐੱਨ.ਆਈ.ਡਬਲਯੂ. ਦੀ ਯੋਜਨਾ ਕਰ ਰਹੇ ਹਨ, ਉਨ੍ਹਾਂ ਲਈ ਵੀ ਇਹ ਬੁਲੇਟਿਨ ਮਹੱਤਵਪੂਰਨ ਹੈ। ਈ.ਬੀ.-2 ਐੱਨ.ਆਈ.ਡਬਲਯੂ. ਪਟੀਸ਼ਨ ਫਾਈਲ ਕੀਤੀ ਜਾ ਸਕਦੀ ਹੈ, ਪਰ ਭਾਰਤ ਵਿਚ ਜਨਮੇ ਬਿਨੈਕਾਰਾਂ ਲਈ ਗ੍ਰੀਨ ਕਾਰਡ ਦੀ ਅੰਤਿਮ ਪ੍ਰਵਾਨਗੀ ਵੀਜ਼ਾ ਨੰਬਰ ਦੀ ਉਪਲਬਧਤਾ ‘ਤੇ ਨਿਰਭਰ ਕਰੇਗੀ। ਅਕਤੂਬਰ 2026 ਵਿਚ ਵਿੱਤੀ ਸਾਲ 2027 ਦੇ ਵੀਜ਼ਾ ਨੰਬਰ ਰੀਸੈਟ ਹੋਣ ‘ਤੇ ਕੈਟਾਗਰੀ ਰੀਓਪਨ ਹੋ ਸਕਦੀ ਹੈ, ਪਰ ਸਹੀ ਗਤੀਵਿਧੀ ਦੀ ਗਰੰਟੀ ਨਹੀਂ ਕੀਤੀ ਜਾ ਸਕਦੀ।
ਕੌਂਸਲਰ ਪ੍ਰੋਸੈਸਿੰਗ ਵਾਲੇ ਬਿਨੈਕਾਰਾਂ ਲਈ ਵੀ ਫਾਈਨਲ ਐਕਸ਼ਨ ਡੇਟ ਬਹੁਤ ਮਹੱਤਵਪੂਰਨ ਹੈ। ਜੇ ਕੋਈ ਬਿਨੈਕਾਰ ਅਮਰੀਕਾ ਤੋਂ ਬਾਹਰ ਹੈ, ਤਾਂ ਫਾਈਨਲ ਐਕਸ਼ਨ ਡੇਟ ਇਹ ਤੈਅ ਕਰਦੀ ਹੈ ਕਿ ਇਮੀਗ੍ਰੈਂਟ ਵੀਜ਼ਾ ਜਾਰੀ ਹੋ ਸਕਦਾ ਹੈ ਜਾਂ ਨਹੀਂ। ਬਾਕੀ ਵਿਸ਼ਵ ਈ.ਬੀ.-2 Current ਹੋਣ ਕਰਕੇ ਕੌਂਸਲਰ ਕੇਸਾਂ ਲਈ ਤਰਜੀਹੀ ਮਿਤੀ ਬੈਕਲਾਗ ਨਹੀਂ ਹੈ, ਪਰ ਐੱਨ.ਵੀ.ਸੀ. ਦਸਤਾਵੇਜ਼, ਅੰਬੈਸੀ ਅਪੁਆਇੰਟਮੈਂਟ ਉਪਲਬਧਤਾ ਅਤੇ ਕੰਟਰੀ-ਸਪੈਸੀਫਿਕ ਕੌਂਸਲਰ ਪਾਬੰਦੀਆਂ ਵਿਹਾਰਕ ਦੇਰੀ ਪੈਦਾ ਕਰ ਸਕਦੇ ਹਨ।
ਇਸ ਬੁਲੇਟਿਨ ਦਾ ਸਭ ਤੋਂ ਵੱਡਾ ਸੁਨੇਹਾ ਇਹ ਹੈ ਕਿ ਵਿੱਤੀ ਸਾਲ ਦੇ ਆਖ਼ਰੀ ਮਹੀਨਿਆਂ ਵਿਚ ਵੀਜ਼ਾ ਨੰਬਰ ਤੇਜ਼ੀ ਨਾਲ ਖਤਮ ਹੋ ਸਕਦੇ ਹਨ। ਡਿਪਾਰਟਮੈਂਟ ਆਫ ਸਟੇਟ ਨੇ ਖੁਦ ਕਿਹਾ ਹੈ ਕਿ ਡਿਮਾਂਡ ਵਧਣ ਨਾਲ ਆਉਣ ਵਾਲੇ ਮਹੀਨਿਆਂ ਵਿਚ ਰੀਟ੍ਰੋਗ੍ਰੇਸ਼ਨ ਹੋ ਸਕਦੀ ਹੈ ਅਤੇ ਸਾਲਾਨਾ ਸੀਮਾਵਾਂ ਪੂਰੇ ਹੋਣ ‘ਤੇ ਕੈਟਾਗਰੀਆਂ ਅਣਉਪਲਬਧ ਵੀ ਹੋ ਸਕਦੀਆਂ ਹਨ।
ਇਮੀਗ੍ਰੇਸ਼ਨ ਵਕੀਲ ਬਿਨੈਕਾਰ ਨੂੰ ਸਲਾਹ ਦੇ ਰਹੇ ਹਨ ਕਿ ਜਿਹੜੀਆਂ ਕੈਟਾਗਰੀਆਂ ਦਾ ਸਟੇਟਸ Current ਹੈ, ਉਹ ਦੇਰੀ ਨਾ ਕਰਨ ਅਤੇ ਆਪਣੇ ਅਟਾਰਨੀ ਨਾਲ ਯੋਗਤਾ ਸਮੀਖਿਆ ਕਰਵਾਉਣ। ਜਿਹੜੀਆਂ ਦੀ ਕੈਟਾਗਰੀ ਅਣਉਪਲਬਧ ਜਾਂ ਰੀਟ੍ਰੋਗ੍ਰੇਸਡ ਹੈ, ਉਹ ਆਪਣੇ ਆਈ-140, ਤਰਜੀਹੀ ਮਿਤੀ, ਸਟੇਟਸ ਮੈਨਟੈਨੈਂਸ, ਈ.ਏ.ਡੀ., ਐਡਵਾਂਸ ਪੈਰੋਲ ਅਤੇ ਬੈਕਅੱਪ ਇਮੀਗ੍ਰੇਸ਼ਨ ਵਿਕਲਪ ਬਾਰੇ ਉਚਿਤ ਕਾਨੂੰਨੀ ਸਲਾਹ ਲੈਣ।
ਜੁਲਾਈ 2026 ਵੀਜ਼ਾ ਬੁਲੇਟਿਨ ਇੱਕ ਮਿਸ਼ਰਤ ਸੰਕੇਤ ਦਿੰਦਾ ਹੈ। ਬਾਕੀ ਵਿਸ਼ਵ ਦੇ ਈ.ਬੀ.-2 ਬਿਨੈਕਾਰਾਂ ਲਈ ਦਰਵਾਜ਼ਾ ਖੁੱਲ੍ਹਾ ਹੈ, ਪਰ ਭਾਰਤੀ ਬਿਨੈਕਾਰਾਂ ਲਈ ਈ.ਬੀ.-2 ਅਤੇ ਈ.ਬੀ.-5 ਅਨਰਿਜ਼ਰਵਡ ਕੈਟਾਗਰੀਆਂ ਵਿਚ ਵੱਡਾ ਠਹਿਰਾਅ ਆ ਗਿਆ ਹੈ। ਭਾਰਤ ਈ.ਬੀ.-1 ਵਿਚ ਵੀ ਦਬਾਅ ਵਧ ਰਿਹਾ ਹੈ। ਇਸ ਲਈ ਗ੍ਰੀਨ ਕਾਰਡ ਬਿਨੈਕਾਰ ਨੂੰ ਆਪਣੇ ਤਰਜੀਹੀ ਮਿਤੀ, ਚਾਰਜਯੋਗਤਾ ਦਾ ਦੇਸ਼ ਅਤੇ ਕੈਟਾਗਰੀ ਨੂੰ ਧਿਆਨ ਨਾਲ ਜਾਂਚ ਕਰਕੇ ਹੀ ਅਗਲਾ ਕਦਮ ਚੁੱਕਣਾ ਚਾਹੀਦਾ ਹੈ।